Հայաստանի ԶՈւ-ը շարունակում են կատարելագործվել. Սերժ Սարգսյան. «Известия»
Նախագահ Սերժ Սարգսյանը «Известия»-ին տված հարցազրույցում ասել է, որ Հայաստանն անցել է Երրորդ հանրապետության 25-ամյա յուրօրինակ շրջափուլը՝ պետականաշինության որոշակի արժեքավոր փորձով, իր ձեռքբերումներով եւ սխալներով, բայց ապագային ուղղված վստահ հայացքով: «Այդ ճանապարհը հեշտ չի եղել: Չնայած դժվարություններին և1988 թվականին երկրաշարժի հետևանքների հաղթահարմանը, մեզ պարտադրված պատերազմին, փախստականների հոսքին, շրջափակմանը, արտաքին աշխարհի հետ տնտեսական կապերի խզմանը, էներգետիկ ճգնաժամին և բազմաթիվ այլ խնդիրներին՝ Հայաստանը վստահ քայլեր է ձեռնարկել իր անկախ պետականության վերականգնման ուղղությամբ: Հենց այդ ձգտումն է միավորել ու միավորում գրեթե 10 մլն մեր հայրենակիցներին ամբողջ աշխարհում, ովքեր միասնական են Հայաստանն անվտանգ, ժողովրդավարական և ծաղկուն երկիր տեսնելու իրենց ցանկության մեջ: Լեռնային Ղարաբաղի ժողովրդի ֆիզիկական ոչնչացման շարունակվող սպառնալիքի, Հայաստանի նկատմամբ տարածքային պահանջների պայմաններում մենք ուշադրություն ենք դարձրել երկրի պաշտպանունակության ամրապնդմանը: Զարմանալի չէ, որ կայացած առաջին պետական իսնտիտուտներից մեկը հենց մեր բանակն էր, որն արդեն երկար ժամանակ համարվում է տարածաշրջանում ամենաուժեղն ու ամենամարտունակը: Եվ այսօր՝ կազմավորումից 25 տարի անց, Հայաստանի ԶՈւ-ը շարունակում են կատարելագործվել՝ ամրապնդելով իրենց օպերատիվ հնարավորութուններն ու ժամանակակից սպառազինություններով հագեցածությունը», – ընդգծել է նա: