Պատժել Ալիևին` պատերազմը կանխելու համար. Օնալդն ընկալեց Սարգսյանի մեսիջը
Փարիզ կատարած այցից առաջ Սերժ Սարգսյանը հանդես եկավ կարևոր ուղերձով: Նա France-Presse լրատվական գործակալությանը տված հարցազրույցում կոչ արեց Փարիզին, Մոսկվային ու Վաշինգտոնին ցույց տալ Ադրբեջանին՝ ինչ գին է վճարելու ղարաբաղյան հակամարտության կողմերից մեկը պատերազմ սկսելու դեպքում: «Հայաստանում հասարակական ընկալմամբ՝ ռազմական գործողությունների վերսկսումը ժամանակի, միգուցե շաբաթների կամ ամիսների հարց է, ըստ այդմ՝ Զինված ուժերի առաջնորդն ու պաշտպանության նախարարը պետք է պատրաստ լինեն պատերազմի, որը կարող է սկսվել վաղը», - ասել է Ս. Սարգսյանը, միաժամանակ ընդգծելով՝ չի կարծում, որ նոր պատերազմի վերսկսումը մոտ ապագայի հարց է, բայց և ոչինչ չի բացառում: Փաստացի, Սերժ Սարգսյանը Փարիզում զգուշացրել է մոտ ապագայում պատերազմի բռնկման վտանգի մասին: Ընդ որում, նա նաև դժգոհել է Ադրբեջանին Ռուսաստանի կողմից զենքի վաճառքի համար. «Մենք դա ցավով ենք ընդունում, քանի որ Ռուսաստանը մեր ռազմավարական գործընկերն է»: Հիշեցնենք նաև, որ Փարիզ կատարած այցից մի քանի օր առաջ Երևանում Հայաստանի արտգործնախարարության ղեկավար կազմի հետ հավաքում Սերժ Սարգսյանը հանդես եկավ ծրագրային ելույթով, որտեղ կոնկրետ նախազգուշական մեկ այլ ուղերձով հղեց` ասելով, որ չնայած Երևանը և Ստեփանակերտը պատերազմ չեն ցանկանում, բայց, եթե Ադրբեջանը շարունակի նույն ոգով և իրավիճակը հասցնի պատերազմականի, ապա` «Արցախի ժողովրդի անվտանգությունն ապահովելու համար մենք մեկ վայրկյան անգամ կանգ չենք առնի՝ կիրառելու մեր զինանոցում եղած բոլոր հնարավորությունները»: Փարիզում Սերժ Սարգսյանի ուղերձը ցույց է տալիս, թե որքան բարդ է իրավիճակը: Նա հասկացնել է տվել, որ օր-օրի մոտենում ենք պատերազմի, իսկ միջազգային հանրությունն անհրաժեշտ ձևով չի արձագանքում իրավիճակին, ավելի ճիշտ` Ադրբեջանի պահվածքին: Ֆրանսիայի նախագահն, ըստ երևույթին, ճիշտ է ընկալել Սերժ Սարգսյանի ուղերձը: Նա կարևոր գնահատական է հնչեցրել, որը խիստ անհրաժեշտ է կիրառել, որպեսզի կանխվի հնարավոր պատերազմը: Հավանական է, որ պատժամիջոցների կիրառվեն Ղարաբաղում հրադադարը խախտող կողմի դեմ, ասել է Ֆրանսիայի նախագահը: France-Presse գործակալության հաղորդմամբ՝ Ելիսեյան պալատում Հայաստանի նախագահ Սերժ Սարգսյանի հետ կայացած հանդիպման ընթացքում, Ֆրանսիայի նախագահ Ֆրանսուա Օլանդը հայտնել է այն մասին, որ հնարավոր է սահմանվեն պատժամիջոցներ՝ հրադադարի հավանական խախտումները կանխարգելելու և այդ ռեժիմը անտեսող կողմին պատժելու համար: Օլանդն ասել է. «ԵԱՀԿ Մինսկի խմբի պարտականությունն է ազդեցիկ ելք գտնել Ղարաբաղյան հակամարտության կարգավորման համար»: Սա առավել քան կարևոր ուղերձ է, որի կյանքի կոչմանը նպաստելու համար հայկական դիվանագիտությունը պետք է օր ու գիշեր հետևողական աշխատանք տանի: Ֆրանսիայի պետք է հետևեն այլ երկրների առաջնորդների, արտգործնախարարների նմանատիպ հայտարարությունները, որոնք կարող են «սանձել» Ալիևին: Թամար Բագրատունի