Քո սերը մի ուրիշ աշխարհ է

ՕԵԿ-ից «Հայկական վերածնունդ» ռեբրենդինգով Արթուր Բաղդասարյանը հույս ուներ, թե կազատվեր ՕԵԿ խարանից, բայց դրանից ազատվելու համար մի առիթով հայտնել ենք՝ ինքն անձամբ առնվազն պլաստիկ վիրահատություն պետք է անցներ։ Արթուր Բաղդասարյանը, սակայն, այդքան անհրաժեշտ մտքի վիրահատության էլ չի ենթարկել իրեն, խոսում է նույն ցինիկ ինքնավստահությամբ, ինչպես ընդդիմադիր քվեն աճուրդի հանելուց առաջ։ Ու որքան էլ Արթուր Բաղդասարյանն այսօր իր «Վերածնված Հայաստանով» ջանում է ընդդիմություն ներկայանալ, սակայն ոչ ոք չի հավատում նրա խոսքերի անկեղծությանը: Չեն հավատում, քանի որ տարիներ շարունակ տեսել են, թե որքանով է նա ընդդիմադիր և քանի անգամ հրաժարվեց` հանուն իշխանության մաս կազմելու: Արթուր Բաղդասարյանն էլ առանձնակի ջանքեր չի գործադրում մարդկանց հավատացնելու ընդդիմություն լինելու մասին՝ ոչ մի թթու խոսք, ոչ մի հասցեական քննադատություն, նա իր ոճին հարիր միայն օդ է կրակում,ու քանի որ շատ բան չկա իշխանություններին ասելու, մնում է ինքնաբացահայտումով զբաղվել։ Օրինակ այսօր Երեւանի Եվրոպական ակադեմիայում ընտրողների հետ հանդիպման ժամանակ նա սովորեցնում էր, թե ինչպես ընտրակաշառք վերցնել, բայց ընտրել մեկ այլ քաղաքական ուժի: «Ժողովուրդ, եթե նույնիսկ ստիպված եք ընտրակաշառք վերցնել, գոնե ձեր քվեն տվեք այն քաղաքական ուժին, ում հավատում եք»,- ասում էր Արթուր Բաղդասարյանը, սակայն մի քանի վայրկյան հետո լեզուն կծում, երբ ներկաներից մեկը նրան պատին դեմ տվեց․«Պարոն Բաղդասարյան, ասում եք ընտրեք այն ուժին ում հավատում եք, բայց կան խոսակցություններ, որ ընտրակաշառք բաժանող քաղաքական ուժը մինչ գումար տալը, տալիս է բջջային հեռախոս, որով դու պետք է նկարես քո քվեաթերթիկը եւ համոզվելուց հետո, որ տվյալ կուսակցությունը կամ դաշինքն ես ընտրել, միայն դրանից հետո են գումար տալիս»:Արթուր Բաղդասարյանն արդարացավ․«Ես նման բան չեմ ասել, թե ընտրակաշառքը վերցրեք եւ ընտրեք լրիվ այլ կուսակցության: Դուք ինձ սխալ եք հասկացել: Քվեարկության կարգն այնպիսին է, որ դուք կարող եք նկարել այն քվեաթերթիկը, որը ցանկանում եք: Ձեզ տալիս են 9 քվեաթերթիկ: Նախկին կառուսել կոչվածն այլեւ չի գործում, որովհետեւ ձեզ տալիս են 9 քվեաթերթիկ, դրանից ընտրում եք մեկը, դնում ծրարի մեջ եւ գցում քվեատուփը: Իսկ եթե ձեզ պետք է նկարել դրանցից մեկը, նկարեք այն եւ տարեք, ցույց տվեք կառաշք տվող մարդուն: Դուք կարող եք սա անել, բայց ես ուզում եմ, որ այս հոգեբանությունից մենք ազատվենք: Ամոթ է, պետք է հասկանանք, որ ապրիլի 2-ից հետո աշխարհը չի վերջանում: Հո մենք, վերջիվերջո, թաղի տղա չե՞նք ընտրում, ընտրում ենք երկրի քաղաքական բարձրագույն իշխանությունը՝ երկրի նախագահին, վարչապետին»: Հետաքրքիր է իմանալ՝ իսկ ի դեմս Արթուր Բաղդասարյանի ընտրողն այս անգամ է՞լ է դավաճան ընտրելու,ով ընտրությունից հետո կարող է ասել՝ աշխարհը հո չի ավարտվում, կարող ենք բարի գործի համար գործակցել անգամ սատայի հետ էլ, որը նրա դեպքում կլինի ՀՀԿ-ն։ Զարմանալի է, որ քարոզարշավի ողջ ընթացքում Բաղդասարյանը ոչ միայն Սերժ Սարգսյանի անունը չի տալիս, այլեւ ամենակարկառուն օլիգարխներին հարկ չի համարում անվանապես քննադատել, քանի որ ոչ վաղ անցյալում ինքն էլ նույն կաստայում էր ու մոտ ապագայում էլ կհայտնվի նույն վայրում, քանզի իշխանության հանդեպ անանց սիրով է կապված։ Օրինակ նա խոսում է, թե ՀՀԿ-ում ընտրակաշառքով գնելու են քաղաքացիների ձայները եւ բերեց մի քանի օրինակ, թե ինչպես են թեկնածուները գնում ընտրողների ձայները եւ ինչ միջոցներով. «Նայեք «Սիթի»-ները ինչքան է գները թանկացել: Միայն շաքարավազը 50 դրամով թանկացել է, երկու ամսվա կտրվածքով Հայաստանում շաքարավազի վաճառքը 50 դրամով թանկ նշանակում է 2 միլիոն դոլար: 2 միլիոն դոլար հավելյալ շահույթ» ։ Անի Սահակյան