ՕՐՕ-ի մեկ օրը Կոտայքի մարզում․ ով ինչու էր եկել հանդիպման/տեսաշար/

Արդեն հայտնել էինք, որ Կոտայքի մարզկենտրոն Հրազդան քաղաքում մեկնարկեց ՕՐՕ դաշինքի նախընտրական հանդիպումները հրազդանցիների հետ։ Հրազդանի հրապարակում հավաքվածները մի քանի տասնյակ մարդիկ էին։ Նախկին նախարարին նախ դիմավորեցին մարտական ընկերները, որոնք Օհանյանը չէր ճանաչել․ «Կռվել ենք իրար հետ, չե՞ք հիշում»,-հարցրեց ազատամարտիկներից մեկը։ Օհանյանը հետաքրքրվեց, թե ազատամարտիկները որ ջոկատից են եղել, ապա շնորհակալություն հայտնեց, որ եկել են։ Հրազդանցիները հիմնականում ասում էին, որ եկել են լսելու, թե դաշինքն ինչ է առաջարկում։ Կային մարդիկ, որոնք մեզ հետ զրույցում ասացին, որ համակրում են Սեյրան Օհանյանին ու նրա անցած ուղին, դրա համար էլ եկել են նախընտրական հանդիպմանը։ Մեր զրուցակիցները մեկը շատ անկեղծ գտնվեց՝ ասելով, որ չի համակրում այս ուժին, ուղղակի «պարապ էր, եկել է» «Ոչ մեկին էլ չեմ համակրում, սաղ լավ խոսում են, բայց մեջը բան չկա, սաղ սուտ բան ա, ասում ա՝ եղունգ ունես գլուխդ քորի»,-ասաց նա։ Հանդիպումից հետո Սեյրան Օհանյանին մոտեցավ դասընկերը՝ ասելով, որ չորս տարի իրար հետ սովորել են։ Հրազդանում ելույթ ունեցավ նաեւ դաշինքի համակիր, ապրիլյան պատերազմի մասնակից Մանուել Մանուկյանը՝ կոչ անելով, որ բոլորը ընտրեն ՕՐՕ դաշինքը։ Դաշինքի մյուս հանդիպումը Չարենցավան քաղաքում էր, որը հայտնի է որպես ՀՀԿ-ական պատգամավոր Վարդան Այվազյանի «տարածք»։ Այստեղ հետաքրքրվեցինք՝ ընտրակաշառք բնակիչներին չի՞ առաջարկվել, ներկաներից մեկը կատակե՞ց․ «Ո՞նց Հայաստանում տենց բան կա՞, էդ ինչ ա՞, ի՞նչ ընտրակաշառք»։ Մեր զրուցակիցները վստահեցրին, որ Չարենացավանում վախի մթնոլորտ չկա․ բոլոր ուժերի նախընտրական հանդիպումներին էլ գնում են, ծրագրերը լսում։ Այստեղ էլ կային դաշինքին ե՛ւ համակրողներ, ե՛ւ չէ․ «Դաշինքին հավատում եմ, եթե ճնշումներ չլինեն իրանց հանդեպ»,-ասաց մեր զրուցակիցներից մեկը։ Չարենցավանից հետո քարոզչությունը շարունակվեց Նոր Հաճն քաղաքում, այստեղ ուշագրավ էր, որ ՕՀՕ-ի եւ Ծառուկյանի դաշինքի նախընտրական շտաբերն անմիջապես իրար կողք կողքի էին, եւ փաստորեն դաշինքի քարոզչությունն արվում էր Գագիկ Ծառուկյանի լուսանկարի ներքո։ Այստեղ էլ հավաքվածները մի քանի տասնյակ էին, հիմնականում տարեցներ ու միջին տարիքի անձինք, հազվադեպ՝ երիտասարդներ․ «Բոլորն ուզում են ԱԺ-ում լինել մենակ էդ աթոռների համար, հիմա ես հասարակ քաղաքացի եմ, ո՞ւմ ընտրեմ, որ ճիշտ լինի աղջիկ ջան»,-ինձ հետ զրույցում ասաց ներկաներից մեկը։ Նոր Հաճնում զրուցեցինք նաեւ ՀՅԴ-ական ներկայացուցչի հետ, ասաց եկել է ծրագիրը լսի, ընկերն էլ կողքից կատակեց՝ լրտես ա, ինքն էլ հավելեց՝ չէ, ղարաբաղցի չեմ։ Մեր զրուցակցի խոսքով՝ էլեկտրոցանցի աշխատողներին ստիպում են ՀՀԿ-ին ընտրել՝ կամ գործից ազատվելու դիմում ես գրում, կամ՝ ՀՀԿ-ին ընտրում։ Կոտայքի մարզում դաշինքի նախընտրական հանդիպումն ավարտվեց Աբովյան քաղաքում։ Սեդա Ղուկասյան