ՀՀԿ-ի ու ՕՐՕ-ի երիտասարդների միջեւ Չարենցավանում քաշքշուկ է եղել

Այսօր Կոտայքի մարզի Չարենցավան քաղաքում վիճաբանություն ու քաշքշուկ է տեղի ունեցել ՕՐՕ դաշինքի երիտասարդ ներկայացուցիչների ու տեղի ՀՀԿ-ական ներկայացուցիչների հետ։ Դաշինքի քարոզարշավի մասին իրազեկող խումբը նախընտրական թռուցիկներ են բաժանել քաղաքացիներին, ինչը դուր չի եկել քաղաքի ՀՀԿ-ական երիտասարդներին, որոնք փորձել են խոչընդոտել, ասելով, որ այդ տարածքում իրենք գիտեն, թե ում են ընտրելու։ Նշենք, որ ՕՐՕ-ի իրազեկող խմբում է նաեւ Ազատ Արշակյանը, վերջինս մեզ փոխանցեց, որ թեթեւ միջադեպը հարթվել է, քանի որ միջամտել են ավելի հասուն մարդիկ։ -Պարոն Արշակյան, նախընտրական քարոզարշավի մեկնարկից հետո հաճախ են մեզ տեղեկություններ հասնում, որ մարզերում փորձում են խոչընդոտներ ստեղծել ՕՐՕ-ի հանդիպումների, հավաքների համար, դահլիճներ, տարածքներ չեն տրամադրում։ -Հրապարակներ տրամադրում են, որովհետեւ այստեղ մի նրբություն կա։ Քաղաքներում ու հատկապես փոքր քաղաքներում, օրինակ Նոր Հաճնում, հենց մեր շտաբի առջեւ փոքրիկ հրապարակ կա, որտեղ բեմահարթակ կսարքվի եւ ելույթներ կունենան։ Այդ առումով խոչընդոտներ չկան։ Իսկ դահլիճներ, այո, չեն տրամադրվում։ Եւ ի վերջո, ես այս հարցում օբյեկտիվ չեմ կարող պատասխանել, որովհետեւ որտեղ ես մտնում եմ, որ բակ այցելում եմ, ինձ սիրով են ընդունում եւ ոչ միայն քարոզարշավի մասին ենք խոսում, այլ առհասարակ։ -Արդեն մի քանի օր է մեկնարկել է նախընտրական քարոզարշավը, ՕՐՕ-ի քարոզչությունն անձամբ ստանձնել է Սեյրան Օհանյանը, որին գրեթե բոլոր համայնքներում հարցնում են, թե ինչու շուտ դուրս չի եկել պետական համակարգից, եթե ամեն ինչ այդքան վատ էր, այս առումով դուք ձեր շանսերը ինչպես եք գնահատում։ -Դուք ուզում եք, որ ես ասեմ, թե բոլորը մեզանից լա՞վն են, ես հաստատ դա չեմ անի։ -Դո՞ւք եք իշխանության համար ամենավտանգավոր, անցանկալի ընդդիմությունը։ -Կարծում եմ, որ իշխանության համար բոլոր ընդդիմադիրներն էլ վտանգավոր են։ Բայց թիրախավորված է, հատկապես, Սեյրան Օհանյանը։ _Ինչո՞ւ։ -Չգիտեմ, բայց կարծում եմ, որ սխալ է, որովհետեւ այդ կարգի թիրախավորում, հակաքարոզչություն, արդեն իսկ քարոզչություն է։ -Հավանաբար, ցանկանում են ՕՐՕ-ին ուժեղացնել։ -Չէ, չեն կարողանում, չափի զգացողությունն են կորցրել, հնացած ու հնաոճ են։ Անի Սահակյան