Օհանյանի ջանքերով թռփոշացած գեներալները պաշտոնանկ արվեցին
Աբովյան քաղաքում ՕՐՕ դաշինքի քարոզարշավը կայացավ «Երաշտության տանը»՝ ի տարբերություն մարզի այլ քաղաքների, որտեղ բացօթյա հանդիպումներ էին ընտրողների հետ։ Այստեղ եւս, ինչպես Հրազդանում, Օհանյանի կողքին ապրիլյան պատերազմի մասնակից կար՝ Արթուր Սարգսյանը: «Ես ուզում եմ ինչպես ապրիլյան պատերազմի ժամանակ, այնպես էլ հիմա բոլորը համախմբվեն եւ անդամագրվեն Օհանյան-Րաֆֆի –Օսկանյան դաշինքին»,-ասաց նա։ Դաշինքի անդամ, Ժառանգություն կուսակցության անդամ Անդրանիկ Գրիգորյանը շնորհակալություն հայտնեց աբովյանցիներին 2013 թվականի նախագահական ընտրություններում «63% խփելու համար»։ Վերջինս ներկայացրեց դաշինքի առաջնորդների կենսագրականներից հատվածներ՝ բացատրելով, թե ինչու պետք է մարդիկ ընտրեն այս դաշինքին։ «Հաճախ են մարդիկ հարցնում, թե ի՞նչ է արել Սեյրան Օհանյանը, Օսկանյանը, Րաֆֆին. Սեյրան Օհանյանը ի՞նչ արեց․ զինակոչիկների վիճակահանությունն ո՞ւմ օրոք տեղի ունեցավ, պարոն Օհանյանի ջանքերով չէ՞ր որ թռփոշացած գեներալները պաշտոնանկ արվեցին: Պարոն Օսկանյանի արտգործնախարար եղած ժամանակ ՀՀ-ն վարում էր խիստ կոմպլեմենտար քաղաքականություն, նրա արտգործնախարար եղած ժամանակ մեկ գիշերում ՀՀ-ն չի մտել ԵՏՄ»,-ասաց նա։ Բանաստեղծ Սարգիս Միքայելյանն էլ իր ելույթում ասաց, որ մտավորականները դեմ են ՀՀԿ-ին սատարել, բայց չգիտեին ում ընտրել. «Իմ մարտական ընկերներից մեկը շատ ճիշտ բան ասեց, երբ ասեցի Օհանյան, Րաֆֆի, Օսկանյան, ասեց՝ այդ երեքից ոչ մեկի կողքը կանգնելուց ես չեմ ամաչի»,-ասաց նա՝ կոչ անելով ընտրել այս դաշինքին: Սեդա Ղուկասյան