Մեկնարկը խոսուն է.նրանցից ո՞վ կխմի շոմպայնը
Նախընտրական քարոզարշավը մեկնարկել է, ու այդ գործընթացը ոմանց պարագայում շրջիկ խումբ է հիշեցնում, որոնք հյուրախաղերով մարզից մարզ են անցնում, համայնքից համայնք՝ իրենց առաքելությունը կատարելու: Միայն թե մարդիկ այնքան են հոգնել առօրյա հոգսերից ու սոցիալական ծանր կարգավիճակից, որ ուրախանալու սիրտ չի մնացել: Հոգսաշատ դեմքեր, դժգոհ մարդիկ ու համատարած բողոքներ, մարզերում քաղաքական ուժերին դիմավորելու գնացած փոքր խումբ մարդկանց շրջանում միայն սա կարելի է տեսնել: Այնինչ թեկնածուները ժիր են ու կայտառ, ինչպես երբեւէ, հատկապես այն ժամանակահատվածում, երբ հենց իրենք էին նաեւ իշխանության առանցքային դերակատարներ ու նաեւ իրենց սրտացավությունը կարող էր գոնե տասնյակ սրտեր ամոքել: Բանակի նախկին հրամանատար Սեյրան Օհանյանի նախընտրական քարոզչությունից, հատկապես իշխանության հասցեին անխնա քննադատական հայտարարություններից ապշել կարելի է: Այսօր առանց վարանելու ՀՀԿ-ին թիրախավորված քննադատում է, համարձակ հայտարարում, որ իր ղեկավարած ՕՐՕ դաշինքի պայքարը Հանրապետականի դեմ է.<< ՀՀԿ-ն այս տարիներին առաջընթաց չի ապահովել մեր երկրի համար, կառավարման համակարգում թարմություն պետք է մտցվի: Իսկ թարմություն նշանակում է, որ ՀՀԿ-ն պետք է իր տեղը զիջի մնացած ուժերին»,- սահմանամերձ Տավուշում ասում է Օհանյանը ու առավել ինքնավստահությամբ խոստանում, որ եթե դաշինքը գա իշխանության, ապա չեն լինելու բոլոր արատավոր երերույթները, որոնք գործածում է ՀՀԿ-ն՝ ճնշումներ ընտրողների վրա, վախի մթնոլորտ եւ այլն. <<Եվ մեր մոտ արդեն որպես ավանդույթ ձևավորված քաղաքական հայացքների համար կամ ծանոթ, բարեկամ իրավիճակի համար պաշտոնի նշանակելը կամ պաշտոնից ազատելը անընդունելի է լինելու: Ես դա կարող եմ ապացուցել, որովհետև, ի տարբերություն որոշների, անուններ չեմ ուզում տալ, երբևիցե չեք գտնի, որ Օհանյան Սեյրանի եղբայրը, քույրը, փեսան․․․ տարբեր պաշտոնների են նշանակված կամ ես էս եմ ներկրում, էն եմ ներկրում»:Մի կողմից հաճելի է լսել, թե ինչպես է իշխանության պորտալարից նոր-նոր պոկված գործիչը նման համարձակ հայտարարություններ անում, մանավանդ, որ առանց այդ հայտարարությունների էլ իշխանության թիրախում է: Բայց մյուս կողմից՝ մի՞թե այդ խոստովանությունը էլ ավելի չի մեծացնում Սեյրան Օհանյանի հանցակցության չափը, ով, փաստորեն, բոլորիցս լավ իմանալով իշխանությունների ապօրինի քայլերի մասին գեթ մեկ անգամ չի խոսել դրանց մասին: Բայց նույնիսկ կարելի է այս հարցում ներողամտությամբ լցվել, եթե Սեյրան Օհանյանը ի վերջո ամրագրի իր ընդդիմադիր հայտը: Օդում կախված քննադատություններից անցնի իսկապես բացահայտումների, որոնք մասին անձամբ ինքն է խոստանում: Օրինակ բացի փակագծեր կերոսինի գործով, որը օրերս իշխանության թերեւ ձեռքով շրջանառության մեջ դրվել: Կամ մտնի այլ ոլորտներ՝ պատռելով իշխանության իրական դեմքը, ջրի երես հանելով բոլոր կեղտերը, չէ՞ որ ինչպես հայտարարում է՝ ինքը վախենալու ոչինչ չունի, չի տեղավորվել իշխանության գծած գծում: Այդ ժամանակ նա անկասկած ու վերջնական կնվաճի ընդդիմության առաջամարտիկի դափնին: Ու այդժամ ոչ ոք չի կասկածի, որ սա հերթական ներկայացումն է, այն նույն սցենարով, որը տեսել ենք տարիներ շարունակ՝ Հայաստանում տխուր օրինաչափությամբ նախկին իշխանավորները ընտրությունից ընտրություն կարողանում են լալահառաչ խոսքերով խաղալ չկողմնորոշված էլեկտորատի վրա, հետո խաղի արդյունքում հայտնվել իշխանության խաղի մեջ՝ առաջիկա 4-5 տարիները դարձնելով բացառապես սեփական բարեկեցության ապահով շրջան, որից ընտրողը գեթ մի կաթիլ օգուտ չունի.Հայաստանում աղքատության, արտագաղթի պաշտոնական թվերը տարեցտարի աճում են, երկիրում հետընթաց արձանագրվում: Այս համատեքստում ուշադրության է արժանի Ծառուկյան դաշինքի քարոզարշավի մեկնարկը: Ի տարբերություն Սեյրան Օհանյանի, Գագիկ Ծառուկյանը, ով անձամբ է մասնակցում արշավներին, իշխանությանը հասցեական քննադատության չի ենթարկում: Ավելին, ի տարբերություն նախորդ ընտրարշավի նա առաջ է մղում ոչ թե իր անձը ու այդ անձով պայմանավորված բարեգործի իմիջ, այլ ծրագրերը. «Բարեգործությամբ, օգնությամբ երկիր չես կառուցի, այլ հարկավոր է պայման ու հնարավորություն տրամադրել այդ մարդկանց», Տավուշում հայտարարել է նա ու խոսել իր ղեկավարած քաղաքական ուժի 15 կետից բաղկացած նախընտրական ծրագրի կարեւորության մասին, որով խոստանում են բարձրացնել նվազագույն աշխատավարձը, վերացնել արագաչափերն ու կարմիր գծերը, առաջիկա 3 տարիներին փոքր ու միջին ձեռնարկություններն ազատել հարկային բեռից, առաջնագծում զինվորական ծառայության առաջնահերթությունը վերապահել պայմանագրային զինծառայողներին եւ այլն: Ծառուկյանի այս մարտավարությունը ըստ ամենայնի պայմանավորված է իր կարգավիճակով՝ ծալած էջը նորից բացելուց հետո առաջ եկած վտանգներով, նա չի մտնում անձնական, հասցեական տարածք, ռիսկի չի դիմում ի տարբերություն Օհանյանի, մնում է սպասել, տեսնել, թե ով է նրանցից շոմպայնը խմելու: Անի Սահակյան