Դրայվը, թմբուկն ու հնությունը

Հանրության շրջանում աղմուկ է առաջացրել ՀՀԿ նախընտրական տեսահոլովակը: Աղմուկի եւ ուշադրության պատճառը մեկ չէ։ Աղմուկն ավելի շատ կապված էր այն հանգամանքի հետ, որ նախընտրական երգը կատարում է Ռեինկարնացիա խումբը, որը Հայաստանում բավական հայտնի, համակրելի խումբ է: Հանրային տարբեր շրջանակներում մեծ վրդովմունք էր բարձրացել, որ հենց Ռեինկարնացիան է կատարում ոչ սիրված եւ ոչ համակրելի իշխող կուսակցության նախընտրական երգը: Այդ վրդովմունքը փոխվեց ցասումի, երբ խումբը անիմաստ փորձեց արդարանալ՝ ասելով, որ տեսահոլովակը քաղաքականության հետ կապ չունի։ Իհարկե, քաղաքակիրթ երկրներում ընդունված ոճ է, երբ հայտնի կամ անհայտ խմբերին պատվեր իջեցնելով քաղաքական խմբերը ստանում են նախընտրական հոլովակ, սակայն հայտարարել, թե այն չի աղերսվում քաղաքականությանը, նույնն է, թե հայտարարել Կարեն Կարապետյանն էլ չի առնչվում քաղաքականությունը, ով այդ հոլովակում հարվածային գործիք է նվագում: Եւ վերջապես, հարվածը անսպասելի տեղից էր,ոչ հեռավոր անցյալում «Ռեինկարնացիա» խմբի հիմնադիր, կիթառահար և վոկալիստ Ռոլանդ Գասպարյանը իր հարցազրույցներից մեկում՝ « Ի՞նչ կլիներ, եթե Դուք լինեիք ահաբեկիչ», հարցին պատասխանել էր ․«Ինչ լիներ, չլիներ, Ազգային ժողովը հաստատ չէր լինի»։ Այսինքն մեծ հաշվով ՀՀԿ-ն պայթեցնելու անթաքույց ցանկություն ունեցող երիտասարդը հիմա դարձել է այդ ուժի քարոզչության մասնակիցը։ Ու չնայած ՀՀԿ-ին այս անգամ հաջողվել է արտաքուստ «կլասսը» բարձրացնել, մանր-մունր աստղիկների փոխարեն հոլովակում նկարահանվել են աշխահահռչակ հայ հայտնիների՝ շախմատիստ Լեւոն Արոնյանը, բռնցքամարտիկ Արթուր Աբրահամը, թավջութակահար Նարեկ Հախնազարյանը, հոլովակում երեւում է նաեւ Հենրիխ Մխիթարյանի լուսանկարը, ով հավանաբար իրեն ավելի թանկ է գնահատել, կամ էլ ֆուտբոլային ակումբը, որի հետ համագործակցում է պատեհ չի համարել Հենրիխի անմիջական մասնակցությունը։ Այդուհանդերձ, ՀՀԿ քարոզչական հոլովակը մնացել է Կարեն Կարապետյանի ոճի մեջ ՝ դրայվոտ, թեթեւ, մակերեսային ու որ ամենացավալին է՝ իրականությունից կտրված , ինչպես սովետական դարաշրջանի ֆիլմերը, որոնցում պլպլան, վառ, կայտառ դեմքերի ցուցադրումով խզվում էր կապը գորշ իրականության հետ։ Երիտասարդության համար գտնված ՀՀԿ տեսահոլովակը, որտեղ սկզբից մինչեւ վերջ իշխում է ռիթմիկ երաժշտություն, աշխուժություն ու բարձր տրամադրություն, ոչ մի հույզ չի փոխանցում մեծահասակներին, բանվորին, գյուղացուն, հողագործին, իր հանապազօրյա հացի դատավճռով ապրող հայ քաղաքացուն։ Մի քանի հազար տեսակ խնդիր ունեցող երկրում այդ հոլովակում գեթ մեկը չի շոշափվում, ուստի գիտակից մարդը, թե ինչ կարող է ստանալ այդ «շոուից», դժվար է պատկերացնել։ Միայն ուրախ-զվարթ թռչկոտող այդ ՀՀԿ-ական երիտասարդները կհասկանան հոլովակում երեւացող ուրախության պատճառը, իսկ մարդիկ իրենց հոգս ու ցավի հետ են։ «Ծառուկյան դաշինքի» քարոզչանյութն էլ բացառապես կառուցված է Գագիկ Ծառուկյանի անձի հիմքով եւ շեշտադրված է սպորտի ոլորտը, տեսանյութը պատմում է, թե ինչպես է տարիների ընթացքում Գագիկ Ծառուկյանը զրոյից այդ ոլորտը դարձրել է ծաղկուն ու բարգավաճող։ ԲՀԿ-ում անձի պաշտամունքը եղել է իսկզբանե, Գագիկ Ծառուկյանի խարիզմայի վրա կառուցված այս կուսակցությունը նախորդ բոլոր ընտրություններին էլ երեւացել է ճիշտ նույն ձեւով՝ կենտրոնում պահելով Ծառուկյանի անձը, բարեգործությունները։ Սակայն հիմա իրավիճակը փոքր-ինչ այլ էր, ծալած էջը վերստին բացելուց հետո թերեւս կարելի էր ու պետք նոր, ինչ-որ թարմ մոտեցում ցուցաբերել ։ Չէ՞, որ ընտրությունն ինքնին փոփոխության ակնկալիքով է։ Անի Սահակյան