Սերժ Սարսգայնի մտքերը իրականությանը չեն համապատասխանում․ քաղաքագետ
Քաղաքագետ Գագիկ Համբարյանը «բացարձակ չի հավատում» Սերժ Սարգսյանի այն հայտարարությանը, որ ՀՀ-ին արտաքին քաղաքականության մասով թույլ է տրված եւ-եւ-ի տարբերակը կիրառել․ «Եթե ե՛ւ-ե՛ւը լիներ, ՀՀ-ն կստորագրեր Ասոցացման մասին համաձայնագիր Վիլնյուսում, ԵՄ-ն երբեք չի թաքցրել, որ համապատասխան մակարդակի հարաբերություններ չի հաստատելու այն երկրների հետ, որոնք ԵԱՏՄ անդամ են»,-Hayeli.am-ի հետ զրույցում ասաց քաղաքագետը՝ հակադարձելով Սերժ Սարգսյանի՝ Euronews-ին տված հարցազրույցին։ «Ես շատ ուրախ կլինեի, եթե ՀՀ նախագահ Սերժ Սարգսյանի մտքերը գոնե մի փոքր իրականությանը համապատասխանեին․ ԵՄ պայմանագիրը կստորագրվի, բայց կարեւոր տնտեսական դրույթները, որոնք մեզ շատ հետաքրքիր էին ԵՄ-ի հետ հարաբերություններում չեն լինելու։ Լինելով ԵԱՏՄ անդամ ու անդամակցելով ՀԱՊԿ-ին, մեր գխավոր տնտեսական գործընկերը, ինչը պարադոքսալ է ու զարմանալի, մնում է ԵՄ-ն»,-ասաց նա։ Քաղաքագետը համաձայն է Սերժ Սարգսյանի այն մտքի հետ, որ խորհրդարանական համակարգն ավելի ժողովրդավարական է, քան կիսանախագահականը, սակայն մեկ խնդիր կա․ «Արդյոք ՀՀ հասարակությունը պատրա՞ստ է այս համակարգին, ես գտնում եմ, որ բացարձակ պատրաստ չէ, ամենակարեւոր խնդիրն այն է, որ երկիրը խորհրդարանական դառնում է այն դեպքում, երբ ունի կայացած կուսակցական համակարգ։ ՀՀ բնակչության 99,9%-ը բացարձակ չի հետաքրքրվում կուսկացությունների ծրագրով ու գաղափարախոսությամբ»,-ասաց Համբարյանը։ Քաղաքագետը օրինակ բերեց, որ քարոզարշավը դեռ չմեկնարկած արդեն իսկ սկանդալային պատմություններ են հայտնվում պատգամավորի թեկնածուների միջեւ․ «Նորաթուխ օլիգարխիկներ՝ ֆեոդալիկներ, տարածաշրջանները բաժանում են իրար մեջ, Արարատից մեկը քիթը չպետք է մտցնի Մասիս, Մասիսից մյուսը քիթը չպետք է մտցնի Վեդի, ո՞վ է նման բան թույլ տվել, եւ էս համակարգով դառնալո՞ւ ենք պառլամենտական երկիր։ Ինչը Եվրոպայում կիրառելի է, բացարձակ չի կիրառվում ՀՀ-ում»,-ասաց նա։ Ինչ վերաբերում է Սերժ Սարգսյանի պատասխանին այն հարցին, թե ինչու ինքը ցուցակում չկա, արդյոք դրանով իշխանությունը զիջո՞ւմ է ընդդիմությանը, ինչին Սարգսյանն ասել էր, որ երիտասարդների համար է հնարավորություն ստեղծում, քաղաքագետն ասաց․ «Ինչ վերաբերում է երիտասարդներին իշխանությունը զիջելուն, ուրախ եմ, որ փոփոխություն կա, սակայն տեսնելով ցուցակները շատ քիչ եմ հպարտություն ապրել, քանի որ շատերը չունեն այն խարիզման, որը պետք է քաղաքական գործչին, նրանց մեծ մասը տարրական կարիերիստներ են, որոնք ծխախոտ ու լուցկի են հասցնում իրենց վերադասներին»։ Խոսելով ՀՀԿ ցուցակի երկրորդ տասնյակի մասին, քաղաքագետն այն «խայտառակություն» որակեց․ «Ինձ համար տարօրինակ է Արտաշես Գեղամյանին, Խոսրով Հարությունյանին ու հասարակության համար այլ ատելի դեմքերին տեսնելն այդ ցուցակում։ Բոլորս ծիծաղում ենք Ադրբեջանի վրա, որ նախագահն իր կնոջը տեղակալ է նշանակել, մեզ մոտ գրեթե նույն համակարգն է, մեր պաշտոնյաները գերադասում են իրենց պաշտոնները փոխանցել իրենց անպատկառ ու տգետ որդիներին ու դուստրերին, որոնք չեն հասկանում ինչ է կառավարելը։ Միայն մի բանով է լավ, որ Սերժ Սարգսյանն իր կնոջը դեռ դեյուրե պաշտոն չի տվել»,-եզրափակեց նա։ Սեդա Ղուկասյան