Դեմարշ տիկնոջ, թե իշխանության դեմ
Այսօր կառավարության նիստի ժամանակ բուռն բանավեճ տեղի ունեցավ քննչական կոմիտեի ղեկավար Աղվան Հովսեփյանի եւ արդարադատության նախարար Արփինե Հովհաննիսյանի միջեւ։ Վերջինիս պաշտպանեց նաեւ կառավարության աշխատակազմի ղեկավար-նախարար Դավիթ Հարությունյանը։ Արդարադատության նախարարը բերել էր դատախազության մասին օրենքում փոփոխություններ կատարելու վերաբերյալ նախագիծ, որը հակակոռուպցիոն քայլեր է ենթադրում։ Համաձայն այդ լրացման, նախատեսվում է սահմանել օրենսդրական նորմ, ըստ որի նախաքննական մարմինները օրենսդրորեն պարտավորվում են դատախազությանը ներկայացնել հանցագործությունների քննման վերաբերյալ տվյալներ, որոնք էլ դատախազը պետք է հրապարակի մինչեւ ապրիլի 1-ը: Աղվան Հովսեփյանը հայտարարել է, որ այդ կարգն այժմ էլ կարգավորվում է կառավարության որոշումով եւ չկա օրենքով պարտավորություն սահմանելու կարիք, օրենքը հակասահմանադրական է: «Յուրաքանչյուր ամիս, եռամսյակ, կիսամյակ, տարի քննչական մարմինները դատախազությանն են ներկայացնում նախաքննության տվյալները։ Հարցն արդեն կարգավորված է և օրենքով այն կարգավորելու կարիք չկա։ Դատախազությունը չի կարող քննչական մարմնի համար իրավական ակտ սահմանել»,-մասնավորապես հիմնավորել է Աղվան Հովսեփյանը, ինչին Արփինե Հովհաննիսյանը հակադարձեց՝ «նոր սահմանադրությամբ կարող է»։ Արդյոք Աղվան Հովսեփյանի անսովոր բուռն ելույթը պայմանավորված էր զուտ միջգերատեսչական շահերի բախումո՞վ, թե բոլորովին այլ հանգամանքով, դժվար է ասել։ Հասկանալի է, որ Աղվան Գառնիկիչը այս նորամուծությունը կարող էր դիտել իր լիազորությունների սահմանափակում, իր ազդեցության տիրույթի նեղացում, քանզի նա արդեն օրենքով հաշվետու է լինելու Դատախազությանը, որի հետ առկա սուր հակամարտության մասին մամուլը տարիներ շարունակ գրել է։ Սակայն դժվար թե Աղվան Հովսեփյանը նման բացահայտ դեմարշի գնար կառավարության դեմ, եթե նման որոշումը կայացված լիներ «ամենավերեւներում»։ Նույնիսկ եթե այդ որոշումը ավելի քան խարխլեր Աղվան Հովսեփյանի դիրքերը։ Խնդիրը թերեւս այլ դաշտում է։ Աղվան Հովսեփյանը հայտնեց, որ քննչական մարմիններից ոչ մեկը տեղյակ չի եղել մշակվող օրինագծից, ինչին, իհարկե, Դավիթ Հարությունյանը առարկեց, որ էլեկտրոնային տարբերակը ուղարկված է եղել բոլոր մարմիններին, այդ թվում՝ ՔԿ-ին։ Նախագահի աշխատակազմի ղեկավար Արմեն Գեւորգյանը երկու շաբաթ ժամանակ խնդրեց լրացուցիչ քննարկելու եւ տարաձայնությունները վերացնելու համար։ Իսկ վարչապետը կատակեց, որ տարաձայնությունները երեւի չեն վերանա, բայց թող քննարկեն, և 3 օր ժամանակ տվեց։ «Չեն վերանա, բայց քննարկենք»,- համաձայնվեց արդրադատության նախարարը։ Արփինե Հովհաննիսյանի ինքնավստահությունը այլեւս անկարելի է անտեսել, ինչն ըստ ամենայնի հունից հանել է նաեւ Աղվան Հովսեփյանին։ «ՀՀԿ-ի առաջին տիկնոջ» տիտղոսակիր Արփինե Հովհաննիսյանի անբովանդակ ձայնը վերջին ժամանակներս սկսել է ազդել յուրայինների վրա։ Առավել եւս իշխանության մեջ իր «մայրամուտին» հասած Աղվան Հովսեփյանի վրա։ Անի Սահակյան
Հետևեք մեզ Viber-ում
