Երկու ամիս՝Արծվիկ Մինասյանին

Բնապահպանական վճարների վերաբերյալ կառավարության այսօրվա նիստում վարչապետ Կարեն Կարապետյանը ՀՀ բնապահպանության նախարար Արծվիկ Մինասյանին հանձնարարական տվեց: «Բնապահպանական վճարների հիմնական մասը վճարվում է խոշոր աղտոտողների կողմից, սակայն թղթաբանությունը, հաշվետվությունների ներկայացման ձևը և ծավալը նույնն է բոլոր աղտոտողների համար», - ասաց նա: «Չունենալով աղտոտման և վճարումների մեծ ծավալներ, փոքր ծավալի աղտոտողները զգալի ժամանակ և ռեսուրսներ են ծախսում նախագծերի ուսումնասիրությունների և հաշվետվությունների համար, իսկ լիազոր մարմինները զգալի աշխատանքային և այլ ռեսուրսներ են ծախսում վերջիններիս հսկողության, տեղեկատվական հավաքագրման, ամփոփման և վերլուծման համար: Հանձնարարում եմ ՀՀ բնապահպանության նախարարին երկամսյա ժամկետում ուսումնասիրել բնապահպանական վճար վճարողների կառուցվածքը, տարանջատել փոքրածավալ և նվազ վտանգավորություն ներկայացնող աղտոտողներին, մշակել պարզեցված ընթացակարգեր բնապահպանական վճարների վճարման, նախագծերի և հաշվետվությունների համար, դիտարկել ըստ գործունեության տեսակի ընդհանրացված և տիպային վճարների ներդրման հնարավորությունները»,- հանձնարարեց  վարչապետը: Կարեն Կարապետյանը ՀՀ բնապահպանության նախարարին հանձնարարեց նաև  երկամսյա ժամկետում ուսումնասիրել բնապահպանական վճարը վճարողների կառուցվածքը, տարանջատել փոքրածավալ ու նվազ վտանգավորություն ներկայացնող աղտոտողներին, մշակել պարզեցված ընթացակարգեր բնապահպանական վճարների վճարման նախագծերի և հաշվետվությունների համար: «Դիտարկել ըստ գործողության տեսակի  ընդհանրացված և տիպային վճարների ներդրման հնարավորությունները», - նշեց Կ. Կարապետյանը: