Վարչապետը Արփինե Հովհաննիսյանին մեկ ամիս ժամանակ տվեց
«Մեր համաքաղաքացիների և, հատկապես, տնտեսվարողների կողմից հաճախ իրավացիորեն բարձրաձայնվում են դատական ակտերի հարկադիր կատարման ծառայության կողմից դրամական միջոցների վրա պարտավորության չափի անհամաչափ արգելանք դնելու խնդիրը, այն պարագայում, երբ վերջիններիս մոտ առկա է լինում շարժական կամ անշարժ գույք, որի արժեքը համաչափ է լինում պարտավորությանը կամ հակառակը», - Կառավարության այսօրվա նիստում վարչապետ Կարեն Կարապետյանը գույքի վրա արգելանք դնելու վերաբերյալ հանձնարարական տվեց: «Իրավիճակը հաճախ խոչընդոտ է դառնում բիզնեսի համար:Ստեղծված իրավիճակը հիմնականում պայմանավորված է լինում օրենսդրական մակարդակով առկա խոչընդոտներով», - նշեց նա: Կարեն Կարապետյանը ՀՀ արդարադատության նախարարին հանձնարարեց մեկամսյա ժամկետում դատական ակտերի հարկադիր կատարման ծառայության կողմից ֆիզիկական և իրավաբանական անձանց՝ որպես հայցի ապահովման միջոց արգելանքները գույքի կամ դրամական միջոցների վրա առավել համաչափորեն դրվելու ու այդ ոլորտում առկա խոչընդոտները վերացնելու ուղղությամբ ներկայացնել առաջարկություն ՀՀ կառավարության աշխատակազմ:
Հետևեք մեզ Viber-ում
