Թոխմախի Մհերը և հնազանդվում է, և սպառնում

ԱԺ վերջին հերթական քառօրյայի ամենաանակնկալ պահը ՀՀԿ խմբակցության պատգամավոր Մհեր Սեդրակյանի հայտնությունն էր։ Նա վերջին ժամանակները խզել էր կապը կուսակցության հետ, ԱԺ չէր հաճախում, քանզի նեղսրտել էր հարազատ կուսակցությունից հայտնի դիպվածի պահով, համաձայն որի՝ ոստիկանները փորձել են ներխուժել իր տուն ու խուզարկություն անել։Մհեր Սեդրակյանի վիրավորանքն այն աստիճան էր խորացել, որ նա որոշել էր ընտրություններին պատժել հարազատ կուսակցությանը, որդուն տեղավորել Ծառուկյան դաշինքում, ինքն էլ աշխատել Ծառուկյանի օգտին։ Սակայն ուրբաթը շաբաթից շուտ եկավ, մինչ նա կհասցներ իրենց գործերը դասավորել, իշխանությունն առաջ ընկավ ու ճնշումների, կոմպրոմատների միջոցով Սեդրակյանին հետ պահեց այդ ճանապարհից։ Այդ թոհուբոհից հետո Սեդրակյանը հայտնվել էր խորհրդարանում, նա արտաքուստ բավական տխուր-տխուր տեսք ուներ, բայց աչքի ընկավ որոշ համարձակ պատասխաններով, որոնցից կարելի է հեռուն գնացող եզրահանգումներ անել։ «Ուրեմն ես ոչ մեկից նեղացած չեմ, ես քաղաքականությունից դուրս եմ եկել, համ դուք ինձանից կպրծնեք, համ ես ձեզանից», -լրագրողների հետ շփումը փորձեց կարճ-կոնկրետ կանխել Թոխմախի Մհերը, բայց չստացվեց։ Նա չէր ուզում բացատրել, թե որն է պատճառը, որ հեռանալու որոշում է կայացրել․ «Լավ եմ արել, ոչ մեկից էլ նեղացած չեմ, անգամ ձեզնից, որ հոգիս հանել եք»: Հետո փորձեց բացատրել, որ տարիքի պատճառով է որոշել հեռանալ քաղաքականությունից, բայց անմիջապես հիշեցին նրա երիտասարդ որդուն։ Սեդրակյանը հակադարձեց, թե իրեն չհաջողվեց որդուն որեւէ կուսակցության ցուցակում տեղավորել, ասաց, թե որոշել են բիզնեսով զբաղվել․«Ես եթե մի բանի ձգտում եմ, հասնում եմ» ,-վստահեցրեց նա,-«Իմ որդին պատգամավոր դառնալով պետք ա իրա կարիենան ստեղծի, կամ չստեղծի՞: Եթե դառնա պատգամավոր, կարիերան փայլելու ա, եսիմ ի՞նչ ա ըլնելու: Կրկնում եմ՝ եթե մի բան ուզենամ, հասնում եմ»: Հարցին, որ տեղեկություններ կան, որ Սերժ Սարգսյանն իրեն կանչել ու հիշեցրել է Հովիկ Աբրահամյանի օրոք իր որդու շահած մրցույթների մասին, նա պատասխանեց, որ նման բան չի եղել: Հովիկ Աբրահամյանի կամ Գագիկ Ծառուկյանի հետ էլ, ասաց, որ չի հանդիպել ։ Տեղեկությանը, որ Հովիկ Աբրահամյանն իրեն առաջարկել է միավորվել, նա պատասխանեց. «Ինձ առաջարկություն չի եղել, էդքան հե՞շտ ա ինձ բան առաջարկելը»: Հարցին՝ մտավախություն չունի՞, որ իշխանություններն իրենից կնեղանան, որ այս անգամ չի աջակցում․ «Եթե ձեր հետ ընկեր եմ, բայց չեմ ուզում օգնեմ ձեզ, դուք կնեղանա՞ք: Դե տարիքս էն տարիքն ա հասել, որ ես չեմ ուզում քաղաքականությամբ զբաղվել»։ Բայց ամենաուշագրավը նա պատասխանեց հարցին, որ իրենից Էրեբունին խլում են, իր դիրքերն էլ կորցնում է․«Էրերբունին վեկալան, հո ամբողջ քաղաքը, աշխարհը չեն վեկալի»։ Սա նշանակում, էր Մհեր Սեդրակյանը չի պատրաստվում հանձնվել ու սպառնում է, որ կյանքը միայն Էրեբունիով չի ավարտվում, ինքը հեղինակություն է ամենուր եւ բոլոր տեղերում կարող է իր գործն անել։ Անի Սահակյան