Սա նույնն է, որ ասենք դանակի ներկրումն արգելեն, որովհետև մարդիկ կարող են գնալ, դանակով մարդ սպանել
ԱԺ ՀԱԿ խմբակցության պատգամավոր Նիկոլ Փաշինյանը Կառավարության հետ հարցուպատասխանի ժամանակ նախ հիշեցրեց վարչապետ Կարեն Կարապետյանի հայտնի հայտարարությունը, թե այսուհետ ամեն մարդ կարող է ցանկացած ապրանք ներմուծել Հայաստան: Նա ներկայացրեց մի փաստ կոնկրետ ընկերության վերաբերյալ, որը մեկ ամիս է՝ 460 տոննա կերոսին չի կարողանում մաքսազերծել: «Ես այնպես հասկացա, որ այս հարթակից ավելի լավ է չհեռանամ»,- ամբիոնին մոտենալով՝ ծիծաղելով ասաց վարչապետն՝ ավելացնելով.«Ես իմ հայտարարությանը տեր եմ ու ձեր հայտարարությունը տեղ է հասել՝ իմ օգնականը զբաղվում է: Մինչդեռ նման ներկրման արդյունքում կունենանք անորակ վառելիք, երբ այն խառնվի կերոսինի հետ: Այս ապրանքի ներկրման առումով, այո, կա քաշքշուկ, դուք ճիշտ եք»: Փաշինյանն արձագանքեց, որ ունի փաստաթուղթ, որ դա կերոսին է, մասնագետները հաստատել են, որ դա այդպես է. «Եթե նույնիսկ դա վառարանային վառելիք է, նույն ՀՀ օրենքով արգելք չկա այն ներկրելու վերաբերյալ: Բայց սա կերոսին է: Ինչ վերաբերում է այդ տրամաբանությանը, ապա սա նույնն է, որ ասենք դանակի ներկրումն արգելեն, որովհետև մարդիկ կարող են գնալ, դանակով մարդ սպանել»,- ասաց պատգամավորը:
Հետևեք մեզ Viber-ում
