Սերժ Սարգսյանն ահազանգ է հնչեցրել
Իրանն ու Թուրքիան արձագանքել են՝ հայ-ադրբեջանական սահմանին տիրող իրավիճակին: Իրանի արտաքին գործերի նախարարության մամուլի խոսնակ Բահրամ Քասեմին Հայաստանին և Ադրբեջանին «զսպվածության» կոչ է արել: «Իրանը հյուսիսային իր երկու հարևաններին կոչ է անում անել առավելագույնը երկխոսության և բանակցությունների միջոցով տեղում իրավիճակը կայունացնելու համար»,-ասել է Քասեմին և հավելել, որ իրանական կողմը պատրաստակամ է «երկու կողմերի օգնությամբ» տարածաշրջանում խաղաղություն և անվտանգություն հաստատել։ Ի տարբերություն Իրանի կոչին, որը ուղղված է հակամարտող երկու կողմերին, Թուրքիան, բնականաբար, հանդես է եկել միակողմանի հայտարարությամբ: Թուրքիայի ԱԳՆ-ն նախ դատապարտել է արցախա-ադրբեջանական հակամարտ զորքերի շփման գծում փետրվարի 24-25-ը տեղի ունեցած «ինտենսիվ գնդակոծությունը»՝ մեղադրելով Հայաստանին և «կոչ անելով նրան պահպանել հրադադարի ռեժիմը, անհապաղ դադարեցնել բռնությունը»: Թուրքիան նաև ցավակցել է Ադրբեջանին՝ զոհվածներին անվանելով «եղբայրներ»: Հայտնի է, որ Թուրքիայի ԱԳ նախարար Մևլութ Չավուշօղլուն իրավիճակի վերաբերյալ հեռախոսազրույց է ունեցել ադրբեջանցի իր գործընկեր Էլմար Մամեդյարովի հետ։ Առաջիկայում Թուրքիայի և Ադրբեջանի նախագահներ Ռեջեփ Թայիփ Էրդողանը և Իլհամ Ալիևը պայմանավորվել են հանդիպել: Պայմանավորվածությունը ձեռք է բերվել ադրբեջանական կողմի նախաձեռնությամբ տեղի ունեցած հեռախոսազրույցի ընթացքում: «Պետությունների ղեկավարները պայմանավորվել են մոտ ժամանակներս հանդիպել»,- ասվում է հաղորդագրության մեջ: Հանդիպման ամսաթիվը և տեղը չի նշվում: «Նախագահներ Ալիևը և Էրդողանը վստահություն են հայտնել երկու երկրների բարեկամական և եղբայրական հարաբերությունների հետագա զարգացման հարցում»,- նշվում է հաղորդագրության մեջ: Ադրբեջանն ու Թուրքիան, վստահաբար, կսկսեն առաջիկայում ցույց տալ միասնություն` «հայկական ագրեսիային» դիմագրավելու կեղծ պատճառաբանությամբ: Այստեղ կարևոր է, թե ինչպես է միջազգային հանրությունն իրեն կդրսևորի: Ալիևի հաշվարկը պարզ է` լարվածության աճ ստեղծել, այնուհետև` տեսնել, թե ինչպես է դրան արձագանքում միջազգային հանրությունը: Երեկ, ի դեպ, Սերժ Սարգսյանն այսօր Բելգիա կատարած աշխատանքայի այցի շրջանակներում ՆԱՏՕ-ի կենտրոնակայանում հանդիպել է ՆԱՏՕ-ի Գլխավոր քարտուղար Յենս Ստոլտենբերգի հետ և համատեղ մամուլի ասուլիսում ուշագրավ դիտարկում է արել. «Ապրիլյան պատերազմն ու դրանից հետո շարունակվող կանոնավոր կրակահերթերը՝ ծանր հրետանու և զինտեխնիկայի կիրառմամբ, փաստում են, որ այլևս այդ հակամարտությունն «ակտիվ» է, և այսօր առավել քան երբևէ անհրաժեշտ է, որպեսզի ողջ միջազգային հանրությունը միավորվի քաղաքակիրթ լուծման շուրջ՝ աջակցելով հակամարտության խաղաղ կարգավորման ուղղությամբ գործադրվող ԵԱՀԿ Մինսկի խմբի ջանքերին»: Սա նշանակում է, որ պաշտոնական Երևանը ահազանգ է հնչեցնում, նպատակ ունենալով` միջազգային հանրությանը համախմբել` Ալիևին կարգի բերելու անհրաժեշտության շուրջ: Բացի այդ, հայտնի է, որ առաջիկայում կայանալու է Պուտինի և Էրդողանի հանդիպումը: ՌԴ նախաագահի մամուլի քարտուղար Դմիտրի Պեսկովը հաստատել է, որ Թուրքիայի նախագահ Ռեջեփ Թայիփ Էրդողանը մարտի 9-10-ին կայցելի Ռուսաստան և բանակցություններ կվարի Վլադիմիր Պուտինի հետ: Թուրքական հեռուստաալիքները արդեն իսկ հաղորդել էին այն մասին, որ Էրդողանը մարտին կայցելի Մոսկվա: «Այո, նման բանակցություններ նախատեսվում են»,-ասել է Պեսկովը: Պուտին-Էրդողան հանդիպմանը, ամենայն հավանականությամբ, կքննարկվի իրավիճակը ղարաբաղյան ճակատում: Ինչ որոշումներ կկայացնեն` Ռուսաստան-Թուրքիա-Ադրբեջան ֆորմատում, կարևոր է: Իրավիճակը հայկական կողմի համար մնում է բավական վտանգավոր: Փաստ է, որ առաջիկա օրերին, շաբաթներին ղարաբաղյան խնդրում «շահագրգիռ» կողմերի դիրքորոշումից է կախված լինելու էսկալացիայի մեծացման հնարավորությունները, և սա հստակ գիտակցում է Սերժ Սարգսյանը, որն էլ երեկ Բրյուսելում արդեն հնչեցրել է այդ ահազանգը: Թամար Բագրատունի