Սամվել Ալեքսանյանը ստիպում է․ ահազանգում են լեռնագոգցիները

Արմավիրի մարզի Լեռնագոգ գյուղում գտնվող «Բաղրամյանի ալրաղաց» գործարանը, որը պատկանում է ԱԺ պատգամավոր Սամվել Ալեքսանյանին, ընտրություններին ողջ կազմով  «աջակցելու» է վերջինիս։ Hayeli.am-ին հայտնի է դարձել, որ գործարանի ղեկավարությունն աշխատակիցներին ստիպում է ներկայացնել անձնագրային տվյալները, որպեսզի ընտրությունների համար կարողանան փոխել գործարանի աշխատակիցների հաշվառման վայրը։ Հիշեցնենք, որ ԸՕ-ն տալիս է նման հնարավորություն, երբ քաղաքացին հաշվառված է մի բնակավայրում, բայց փաստացի մեկ այլ բնակավայրում է ապրում, ապա ընտրությունների ժամանակ՝ լրացուցիչ ցուցակների միջոցով, քվեարկում է  այն ընտրատեղամասում, որտեղ փաստացի բնակվում է։ Այժմ Սամվել Ալեքսանյանը ստիպում է իր աշխատակիցներին ժամանակավոր դառնալ Մալաթիա-Սեբաստիայի բնակիչներ, որպեսզի ընտրություններին քվեարկեն իր օգտին։ Ստացվում է՝ ապրիլի 2-ին մի քանի հարյուր լեռնագոգցիներ կդառնան Երեւանի բնակիչներ՝ պարտադիր, բայց ոչ պարտադրված քվեարկելով թիվ 3 ընտրատարածքում ռեյտինգային ընտրակարգով առաջադրված Սամվել Ալեքսանյանի օգտին։ Մեզ դիմած աշխատակիցը չցանկացավ ներկայանալ՝ ասելով, որ արդեն իսկ սպառնացել են տվյալները չտրամադրելու դեպքում աշխատանքից հեռացնել։ Նույն մեթոդով է աշխատում նաեւ ԱԺ ՀՀԿ խմբակցության պատգամավոր, «Սովրանո» ընկերության սեփականատեր Արման Սահակյանը, նրա աշխատակիցների ահազանգի մասին արդեն գրել ենք՝ hayeli.am-ում: Ի դեպ, ԱԺ պատգամավոր Նիկոլ Փաշինյանն այսօր ԱԺ-ում հայտարարեց, որ ըստ ոստիկանություն ուղարկած իր հարցման, ավելի քան 7000 քաղաքացի վերջին մեկ մասում փոխել է հաշվառման հասցեն։ Սեդա Ղուկասյան