Հայ լուսանկարչուհու հուզիչ ֆոտոշարքը հայտնվել է 2017 Sony World Photography Awards-ի թեկնածուների լավագույն տասնյակում (լուսանկարներ)

Հայ լուսանկարչուհի Յուլյա Գրիգորյանցը մասնակցում է աշխարհում խոշորագույն լուսանկարչական մրցույթին՝ 2017 Sony World Photography Awards-ին, որի տարբեր անվանակարգերում հաղթողների անունները հրապարակվելու են ապրիլի 20-ին: Ինչպես նշվում է us1.campaign-archive2.com կայքում, ընդհանուր առմամբ, մրցույթին մասնակցելու հայտ են ներկայացրել հազարավոր լուսանկարիչներ՝ աշխարհի 183 երկրից: Հետաքրքրական է, որ մրցույթին ներկայացված ավելի քան 227.000 լուսանկարից ժյուրին ընտրել է Գրիգորյանցի «Դատարկության բնակիչները» (Inhabitants of the Empty) խորագրով ֆոտոշարքը, որը ներառվել է Professional Daily Life անվակարգի լավագույն տասնյակում: Ի դեպ, սա առաջին դեպքն է, երբ Հայաստանի ներկայացուցիչը հայտնվում է Sony World Photography Awards-ի թեկնածուների լավագույն տասնյակում: Հայտնի է, որ «Դատարկության բնակիչները» ֆոտոնախագիծն իրականացվել է Գյումրիում: Այն ներկայացնում է քաղաքի ամենակարիքավոր բնակիչներից մի քանիսին ու նրանց սոսկալի կենսակերպը: Աղբյուրը մանրամասնում է, որ Երևանում ծնված, սակայն այժմ Ֆրանսիայում ապրող և ստեղծագործող Գրիգորյանցը պայքարում է նաև «Տարվա լուսանկարչուհի» կոչման համար: Հաղթանակի դեպքում հայուհին կստանա բարձրորակ մասնագիտական սարքավորումներ, ինչպես նաև՝ 25.000 դոլար: «Ինձ համար մեծ պատիվ է Sony World Photography Awards-ի թեկնածուների լավագույն տասնյակում հայտնվելը: Իմ ֆոտոշարքը պատմում է հայրենիքիս պատմությունը, որն անձամբ ինձ էլ է վերաբերում: Այն, որ ես հայտնվեցի թեկնածուների լավագույն տասնյակում, նշանակում է, որ ներկայացրած պատմությունը հուզել է մարդկանց, դա ինձ համար շատ կարևոր է»,-նշել է Գրիգորյանցը:   Լուսանկարչուհին՝   tert.am