Հայաստանում տեղի են ունենում կամայական ձերբակալություններ. Էլինար Վարդանյան
«Օհանյան-Րաֆֆի-Հովհաննիսյան» դաշինքի առաջին համաժողովում ԱԺ պատգամավոր Էլինար Վարդանյանը նշեց, որ Հայաստանում տեղի են ունենում կամայական ձերբակալություններ, ոստիկանությունն ուժ է կիրառում խաղաղ հավաքներ իրականացող մարդկանց ու լուսաբանող լրագրողների վրա: «2016 թվականի տվյալներով, Հայաստանը լքել է 50 հազար անձ, ու պետք է ծրագրեր մշակվեն այս ուղղությամբ, պետք է դեմոգրաֆիական խնդիրը լուծվի, մայրերին պետք է աջակցենք: Հայաստանն արդարության վերականգնման կարիք ունի, մենք այսօր այստեղ ենք, որպեսզի ՀՀ-ն դառնա արդար երկիր, որտեղ մարդու ընտրական իրավունքը չի խեղվի, ու մարդը պաշտպանված կլինի»,- ասաց նա: Ինչպես հայտարարեց` իրեն համար որպես ՀՀ ԱԺ Մարդու իրավունքների պաշտպանության և հանրային հարցերի մշտական հանձնաժողովի նախագահ, նախընտրական փուլը ևս մեկ հնարավորություն է կարևորելու, հանրության ուշադրության կենտրոնում պահելու այն խնդիրները, որոնց շուրջ ես աշխատել եմ վերջին հինգ տարիների ընթացքում: «Միջազգային բազմաթիվ զեկույցներ ահազանգում են այն, որ խախտվում է հավաքների ազատության իրավունքը, հավաքների մասնակիցների նկատմամբ կիրառվում է անհամաչափ ոստիկանական ուժ, տեղի են ունենում կամայական կալանավորումներ, կիրառվում է բռնություն ինչպես հավաքների մասնակիցների, այնպես էլ լրագրողների նկատմամբ: Եւ այս ամենի շրջանակներում կարևոր է արդար և անկախ դատական իրավունքի ձևավորումը», - ասաց Էլինար Վարդանյանը:
Հետևեք մեզ Viber-ում
