Ձեռնոց նետել` Մեհրիբանով
Ադրբեջանի նախագահ Իլհամ Ալիևը ստորագրել է իր կնոջը՝ Մեհրիբան Ալիևային, Ադրբեջանի առաջին փոխնախագահ նշանակելու վերաբերյալ հրամանագիր: Մեհրիբան Ալիևան Ադրբեջանի միլլի մեջլիսի անդամ է: Իլհամ Ալիևն արդեն հասցրել է հրավիրել անվտանգության խորհրդի նիստ, որի ժամանակ ներկայացրել է տիկնոջը նոր պաշտոնում: Այս նշանակումը հաջորդում է անցած սեպտեմբերին Ադրբեջանում տեղի ունեցած սահմանադրական փոփոխություններին: Հիշեցնենք, որ սեպտեմբերի 26-ին Ադրբեջանում կայացավ երկրի սահմանադրությունում փոփոխություններ կատարելու վերաբերյալ հանրաքվե: Սահմանադրական փոփոխություններով նախագահի պաշտոնավարման ժամկետը հինգ տարուց երկարաձգեց յոթի, մտցվեցին առաջին փոխնախագահի և փոխնախագահների պաշտոնները, ինչպես նաև նվազեցվեց երկրի նախագահի և պատգամավորի թեկնածուների համար գործող տարիքային շեմը: Սեպտեմբերի 26-ին Ադրբեջանի քաղաքացիները Ադրբեջանի պատմության մեջ երրորդ հանրաքվեով որոշեցին նախագահական լիազորությունների ժամկետի՝ 5-ից 7 տարվա երկարացման հարցը, Ադրբեջանում փոխնախագահների պաշտոնների անհրաժեշտության հարցը, ինչպես նաև պետության ղեկավարի և պատգամավորի թեկնածուների համար տարիքային սահամանափակման վերացումը։ Ադրբեջանում սահմանադրական փոփոխությունների հարցով հանրաքվեն անց կացվեց կոպտագույն խախտումներով, այն արժանացավ ընդդիմադիրների և միջազգային հանրության սուր քննադատությանը: Իլհամ Ալիևի պաշտոնավարման ներկայիս ժամկետը սպառվում է 2018-ին։ Ադրբեջանում շատերը կարծում էին, որ սահմանադրական հանրաքվեն անց կացվեց հանուն մեկ քաղաքացու՝ 19-ամյա կրտսեր Ալիևի, ով ներկայումս սովորում է Բաքվի դիվանագիտական ակադեմիայում։ Գործող Սահմանադրությամբ նախագահության թեկնածուն պետք է լիներ առնվազն 35 տարեկան: Այդ նվազագույն շեմը չեղարկվեց, խորհրդարանի պատգամավորի թեկնածուն պետք է լինի 25 տարեկան, նոր Սահմանադրությամբ շեմը իջեցվեց մինչև 18 տարի: Փաստորեն, Ադրբեջանի չափահաս քաղաքացին ստացավ և՛ նախագահ, և՛ Միլի մեջլիսի պատգամավոր ընտրվելու հնարավորություն: Ըստ ադրբեջանական ընդդիմության, Իլհամ Ալիևի որդին՝ պապի անունը կրող Հեյդար Ալիևը կարող է ապագայում հնարավոր ինչ-ինչ արտակարգ քաղաքական հանգամանքներում զբաղեցնել բարձր պաշտոններ: Նույնը կանխատեսում էին Ալիևի կնոջ` Մեհրիբան Ալիևայի, և դուստրերի` Լեյլայի և Արզուի համար, որպես կլանին հավատարիմ մարդիկ: Երեկվանից աշխարհը կանգնեց դեմ հանդիպման ալիևյան ռեժիմի հաստատման նոր փուլի առջև: Առաջին քայլը` Մեհրիբանով էր: Ալիևյան կլանը ձեռնոց է նետում միջազգային հանրությանը, ինչպես ասում են` «թքած ունենալով» մինչ այժմ այդ երկրում ավտորիտար, բռնատիրական երևույթների նկատմամբ միջազգային հանրության քննադատության տարափներին: Մետաքսյա Շալունց