«Ծառուկյան» դաշինքը այլընտրանք է լինելու Հանրապետական կուսակցությանը.Զուրաբյան
Լրագրողները ՀՀՇ վարչության անդամ Արարատ Զուրաբյանին հիշեցրեցին Գագիկ Ծառուկյանի հետ երկու տարի առաջ տեղի ունեցած իրադարձությունները եւ հետաքրքրվեցին`մտավախություններ չունեն, որ ինչ-որ մի պահի Գագիկ Ծառուկյանը կարող է կրկին լքել քաղաքական դաշտը: Արարատ Զուրաբյանն ասաց, որ այն ժամանակ տեղի ունեցածը ընտրական տրամաբանությունից դուրս էր. «Դա ընտրական շրջան չէր, գործի էր դրվել ողջ պետական մեքենան: Այդ փուլում Գագիկ Ծառուկյանը ստիպված էր անհատական որոշում կայացնել: Այդ որոշումը ես դատապարտելի չեմ համարում: Շատ բուռն գործընթացներ էին`անկանխատեսելի հետեւանքներով: Այն ժամանակ ընտրական գործընթաց չէր ու հետեւանքները բերելու էին բախման»: «Անցկացվել են մի շարք սոցիոլոգիական հետազոտություններ, եւ դրանք ցույց են տալիս, որ «Ծառուկյան» դաշինքն այսօր առաջին տեղում է գտնվում:Երկու տարի առաջ քննադատել եմ Ծառուկյանի եւ Տեր-Պետրոսյանի նախաձեռնած բուրժուադեմոկրատական հեղափոխությունը, բայց իմ թիրախը առաջին նախագահն էր՝ ընտրություններ չէին եւ հնարավոր էին բախումներ: Այսօր այլ վիճակ է: «Ծառուկյան» դաշինքի համար շատ նպաստավոր պայմաններ է կոնկրետ ստանալ քվեները եւ ստանալով քվեները՝ ձեւավորել կոնկրետ մեծամասնություն, ինչով եւ տեղի կունենա այն բոլորի կողմից սպասված իշխանափոխությունը, որը նախորդ ճանապարհով ոչ մեկին չէր հաջողվում»,-ասաց Արարատ Զուրաբյանը Գագիկ Ծառուկյանն այդպես էլ 10 տարվա ընթացքում պատգամավորի մանդատը չի ծառայեցրել օրենսդրական նախաձեռնություններին, նույնիսկ չի հասկացել, թե ինչ կուսակցություն էր ԲՀԿ-ն,նկատում են լրագրողները: «Ես համոզված եմ, որ «Ծառուկյան» դաշինքը այլընտրանք է լինելու Հանրապետական կուսակցությանը»,ասում է Զուրաբյանը: Արարատ Զուրաբյանն ասում է, որ Գագիկ Ծառուկյանին հաջողվել է ձեւավորել այլ բեւեռ, կուռ ամուր քաղաքական թիմ, որեւէ այլ գործչի դա չի հաջողվել: Արարատ Զուրաբյանը վստահ է, որ Հանրապետականն այս անգամ չի կարողանալու տոկոսներ խփել. «Նախ նախադեպ չկա, որ Հանրապետական կուսակցությունը մեծամասնություն ձեւավորած լինի ինչ-որ ժամանակ, երկրորդը՝ անկախ այն ծավալներից ընտրակեղծարարության, անկախ միջոցներից, ճնշումներից, առավելագույն ձայների քանակը կազմում է մասնակիցների մոտավորապես 51-52 տոկոսը»:
Հետևեք մեզ Viber-ում
