Սա նոր խաղի կանոններով ընտրություն է. Ստյոպա Սաֆարյան
Այսօր Հայելի ակումբում լրագրողների հետ հանդիպման ժամանակ, «Ազատ դեմոկրատներ» կուսակցության ընտրացուցակով 3-րդ տեղը զբաղեցնող, ռեյտինգային ցուցակով թիվ մեկ ընտրատարածքում առաջադրված քաղաքագետ Ստյոպա Սաֆարյանը նշեց, որ «Ազատ դեմոկրատների» թիմում հավաքվել են մեծ փորձառություն ունեցող մարդիկ: Անդրադառնալով ՀՀ արտաքին քաղաքականությանը նշեց. «Մեր հարևան Իրանն ուզում է մեզ ավելի էժան գնով գազ վաճառել, բայց մենք չենք կարող գնել. ինքնուրույնություն չունենք: Մենք այսպես չենք կարող ունենալ լավ տնտեսություն ու դրական հեռանկարներ»: Նրա համոզմամբ՝ Իշխանությունը պետք է առաջարկի այն, ինչի մասին քաղաքացին է մտածում, ինչն ուզում է տեսնել քաղաքացին: Համոզիչ ծրագրերն ավելի կարևոր են, քան գլխաքանակն ու մարդաքանակը: «Եթե ասենք՝ եկե՛ք միանանք, որ ՀՀԿ-ին «քցենք», միշտ լինելու են այնպիսիք, ովքեր չեն միանալու: Եթե ասենք՝ եկե՛ք մի կողմ թողնենք տարաձայնությունները, ապա ընթացքում լինելու են այնպիսիք, ովքեր պառակտում են առաջացնելու»,- ասաց նա: Նրա պնդմամբ՝ սա նոր խաղի կանոններով ընտրություն է:
Հետևեք մեզ Viber-ում
