«ՀԺ». Արման Սահակյանի կինն ընտրողների հավաքագրմամբ է զբաղված

«Հայկական ժամանակ» թերթը գրում է. «ՀԺ»-ն երեկ ահազանգ էր ստացել, որ Երեւան քաղաքի թիվ 38 մանկապարտեզի տնօրեն Սեդա Հակոբյանը հրահանգում է իր ենթակայությամբ աշխատող մարդկանց, որպեսզի վերջիններս մարզերում բնակվող իրենց հարազատներին վերագրանցեն թիվ 2 ընտրատարածքում: Բանն այն է, որ Սեդա Հակոբյանը կառավարությանն առընթեր պետական գույքի կառավարման վարչության պետ Արման Սահակյանի կինն է, իսկ Արման Սահակյանը պատգամավորության թեկնածու է եւ ՀՀԿ ռեյտինգային ցուցակով առաջադրվել է թիվ 2 ընտրատարածքում: Ահազանգի իսկությունը ստուգելու համար, որպես Արման Սահակյանի շտաբի աշխատակից ներկայանալով, դիմեցինք մանկապարտեզի աշխատակիցներին, սակայն նրանք խուսափեցին տնօրենի հանձնարարականի վերաբերյալ որեւէ բան ասել: Միակ տարբերակը մնաց անձամբ Սեդա Հակոբյանի հետ խոսել նույն եղանակով: Թիվ 38 մանկապարտեզի տնօրենի հետ մեր զրույցը ներկայացնում ենք ստորեւ: Ալո, բարեւ ձեզ: Բարեւ ձեզ: Տիկին Հակոբյան դո՞ւք եք: Այո: Ներողություն, ինձ պարոն Սահակյանի շտաբից էին ասել գրանցումների հետ կապված: Հիմա մարդ կա, բայց Արաբկիրում ա գրանցվում, նորմա՞լ ա: Հա: Ոչ մի խնդիր չկա չէ՞, ինքը կկարողանա հանգիստ մասնակցի ընտրությանը, պրոբլեմ չի լինի չէ՞: Եթե Արաբկիրում ա, չէ: Իսկ ընդե մի հատ նուրբ բան կար, Ազատության պողոտայի ինչ-որ մի մասն Արաբկիր ա, մյուսը՝ Քանաքեռը, մյուս մասը չի լինի չէ՞: Չէ, թող լինի, կասեք ում ընտրի, բայց Արաբկիր ա պետք: Հասկացա: Մենակ Արաբկիր հասցեն տաք մեզ: Ասեք, թե տվյալ հասցեում ով կա, որ մենք էլ տանք Արաբկիրում: Պարտադիր պետք ա ասվի չէ՞ պարոն Սահակյանի մասով: Հա, ըհն, իհարկե: Նշենք, որ նման ահազանգերն առաջին անգամ չեն այս ընտրություններում: Մամուլում եղան հրապարակումներ, որ «ՍԱՍ գրուպ»-ի սեփականատեր, ԱԺ պատգամավոր Արտակ Սարգսյանը նույնպես իր աշխատակիցներին հրահանգում է գրանցվել Արաբկիր վարչական շրջանում, որպեսզի ապրիլի 2-ին ընտրությանը քվեարկեն իր օգտնին: Ի դեպ, Արման Սահակյանն ու Արտակ Սարգսյանը նույն ընտրատարածքում են նման մեթոդներով աշխատում: ԱԺ պատգամավոր Նիկոլ Փաշինյանն էլ այսօր ֆեյսբուքյան իր էջի միջոցով հայտարարեց, որ ոստիկանությունից ստացել է իր հարցման պատասխանը, որի համաձայն՝ 2017 թվականի հունվարի 10-ից փետրվարի 10-ն ընկած ժամանակահատվածում 7 հազար ընտրող իր հաշվառման հասցեն փոխել է»: Առավել մանրամասն՝ թերթի այսօրվա համարում