«Ոչինչ չանելու քասթինգն ուժեղացել է». Արամ Մանուկյան
ԱԿ խմբակցության քարտուղար Արամ Մանուկյանի կարծիքով ընտրություններին այսքան դաշինքներով մասնակցելը բացասական երևույթների շարքին կարելի է դասել: «Ոչինչ չանելու քասթինգն ուժեղացել է հիմա: Ժողովուրդը հիասթափվում է այդ գործընթացից»,- նկատեց ՀԱԿ քարտուղարը: Ըստ նրա՝ նախընտրական այս փուլում գաղափարական հայտեր չեղան: Բոլոր քաղաքական ուժերն ասում են՝ ինչ են ուզում, և մրցույթ է՝ ով է ավելի շատ լավ բան ուզում, բայց որևէ մեկը չի ասում ծրագիր: «Իրատեսական լուծումներ երկրի առջև ծառացած խնդիրները լուծելու համար առաջարկում են շատ քիչ քաղաքական ուժեր: Միակը, որ բժշկի կեցվածքով դառն անալգին է առաջարկում մեր քաղաքացիներին, ՀԱԿ-ն է: Հասել ենք այն փուլին, երբ հարկավոր է թվեր ասել, իրականությունը բարձրաձայնել, համարձակ նայել իրերին»: Թե ինչ ռեսուրսներ ունի ՀԱԿ-ը հաղթելու եւ ինչ ակնկալիքներ ունեն՝ Արամ Մանուկյանն ասաց. «Թող իշխանությունը մեր ծրագիրն իրականացնի, թող մենք խորհրդարանում չլինենք»: Հարցին, թե ո՞վ է իրենց վարչապետի թեկնածուն, Ա. Մանուկյանն այսպես պատասխանեց. «Թող լինի Պողոսը, Տիգրանը, բայց խաղաղ երկրի վարչապետ լինի, սահմանները բաց լինեն»:
Հետևեք մեզ Viber-ում
