Սահմանադրական հանրաքվեն ԼՂ ժողովրդի ներքին խնդիրն է․ Արտակ Զաքարյանը՝ ՄԽ-ին
Մյունխենում կայացած Հայաստանի եւ Ադրբեջանի արտաքին գործերի նախարարների հետ հանդիպումից հետո ԵԱՀԿ ՄԽ համանախագահները հայտարարություն են տարածել՝ վերահաստատելով, որ ԼՂ հակամարտության խաղաղ լուծմանն այլընտրանք չկա, եւ Հայաստանն ու Ադրբեջանը ժողովուրդներին պետք է խաղաղության պատրաստեն։ ՀՀ ԱԺ Արտաքին հարաբերությունների հանձնաժողովի նախագահ Արտակ Զաքարյանը ողջունում է մունխենյան հանդիպումը․ «Իրավիճակը, որն այսօր առկա է ղարաբաղա-ադրբեջանական շփման գծում, չի կարող չմտահոգել Մինսկի խմբի համանախագահներին, համանախագահները հայտարարություն տարածելով փորձում են ավելացնել իրենց ջանքերը՝ առաջիկայում բանակցային գործընթացը տեղից շարժելու համար»,-Hayeli.am-ի հետ զրույցում ասաց Զաքարյանը։ Զաքարյանի խոսքով՝ Ադրբեջանն ամեն կերպ փորձում է ձախողել բանակցային գործընթացի որեւէ պայմանավորվածություն, եւ առաջին հերթին Վիեննայի եւ Սանկտ Պետերբուրգի պայմանավորվածությունները: «Բայց գնալով էլ ավելի են կարեւորվելու Միսնկի խմբի ջանքերն այդ հարցում, եւ մենք ակնկալում ենք, որ հրադադարի պահպանման ռեժիմի հայտարարությունները լինեն հասցեական՝ ուղղված լինեն Ադրբեջանին, որովհետեւ հայկական կողմը շահագրգիռ է խաղաղ կարգավորման հարցում»,-ասաց Զաքարյանը՝ հավելելով, որ շատ կարեւոր է, որ ՄԽ-ն ակտիվացնի իր ջանքերը Ադրբեջանի վրա համապատասխան քաղաքական ճնշում գործադրելու հարցում։ Համանախագահաներն անդրադարձել էին նաեւ 2017 թվականի փետրվարի 20-ին սպասվող ԼՂՀ սահմանադրական հանրաքվեին՝ ասելով, որ չեն ճանաչելու Ղարաբաղը որպես անկախ պետություն։ Այս առնչությամբ Արտակ Զաքարյանն ասաց․ «Սահմանադրական փոփոխությունները Ղարաբաղի ժողովրդի ներքին խնդիրն է, եւ այն իր իրավունքների տիրույթում է գտնվում, ուստի միայն ԼՂՀ ժողովուրդն է իրավասու սահմանադրական բարեփոխումների գործընթացին տալ իր վերաբերմունքը, որովհետեւ դա առաջին հերթին ներքին կյանքի կազմակերպման եւ պետության կառավարման բարձրացմանն ուղղված խնդիրն է։ Անկախ նրանից Ղարաբաղը ճանաչված է, թե ոչ, այնուամենայնիվ, այն փաստացի ձեւավորվող պետություն է, եւ որեւէ բան չի կարող խանգարել ԼՂ-ին իր ներքին քաղաքական կյանքը կազմակերպելու համար»։ Սեդա Ղուկասյան