Կպատժի՞ Պուտինն Ալիևին

Ադրբեջանում կալանքի տակ գտնվող ռուս բլոգեր Ալեքսանդր Լապշինի արտահանձնումն առայժմ անհնար է։ Այս մասին հայտարարել է Լապշինի փաստաբան Սաֆար Հուսեյնովը։ «Լապշինի դեմ հարուցված քրեական գործով քննությունը շարունակվում է։ Քննության ավարտից հետո նա կկանգնի դատարանի առաջ։ Դատարանի որոշումից հետո կուսումնասիրվի նրա արտահանձնման հարցը այն երկրներից մեկին, որի քաղաքացին նա հանդիսանում է։ Նախքան դատարանի որոշումը Լապշինը չի կարող արտահանձնվել որևէ երկրի»,- ասել է փաստաբանը։ Մինչ Ադրբեջանը պահում է Լապշինին, երեկ, խիստ ուշագրավ տեղեկություն ստացվեց: Ռուսաստանն, ըստ երևույթին, որոշեց թեթևակի պատասխանել Լապշինի արտահանձնմանը Ադրբեջանին: Տեղեկություն ստացվեց այն մասին, որ Ռուսաստանում ադրբեջանցիներ են ձերբակալվել... Պարզվեց, Դերբենտի ոստիկանության քաղաքային վարչությունում պահվում են Ադրբեջանի ավելի քան 300 քաղաքացիներ, հաղորդեց Ազադլիք ռադիոկայանը։ Ըստ այդ տեղեկության` նրանք ձերբակալվել են անօրինական կերպով շինարարության մեջ աշխատելու համար։ Դա պարզվել է իշխանությունների կողմից անցկացված ստուգումների արդյունքում։ Ձերբակալվածների կողմից սոցցանցերում տարածված տեսանյութի համաձայն` նրանց արդեն երկու օր է պահում են ինչ-որ մարզադահլիճում և ոչինչ չեն ասում։ Ըստ տեղեկությունների` նրանց ազատ են արձակել, բայց նրանց գործերն ուղարկվել են դատարան` միգրացիոն օրենսդրությունը խախտելու համար։ Ռուսաստանում Ադրբեջանի դեսպանատունն արձագանքեց Դաղստանում ադրբեջանցիների զանգվածային ձերբակալություններին: Ռուսաստանում Ադրբեջանի դեսպանատունը դիմել է այդ երկրի համապատասխան կառույցներին` կապված Ադրբեջանի ավելի քան 300 քաղաքացիների ձերբակալության հետ։ Այս մասին ասվում է դեսպանատան հաղորդագրության մեջ։ Հաղորդվում է, որ փետրվարի 9-ին Դերբենտ քաղաքի շինարարական օբյեկտներում կատարված ստուգայցերի հետևանքով ձերբակալվել է Ադրբեջանի քաղաքացիներ, որոնք Ռուսաստանում ապրելու և աշխատելու համապատասխան թույլտվություն չեն ունեցել։ Հաշվի առնելով ձերբակալվածների մեծ թիվը` նրանց ժամանակավորապես տեղավորել են մարզադահլիճում։ Իսկ փետրվարի 10-ին համապատասխան ստուգումների ավարտից հետո նրանք ազատ են արձակվել։ Դժվար է միանշանակ պնդել, որ Ադրբեջանի ավելի քան 300 քաղաքացիների ձերբակալությունը պատասխան էր Ադրբեջանին Լապշինի արտահանձնմանը: Ի վերջո, արտահանձնողն Ադրբեջանը չէր, այլ` Ռուսաստանի դաշնակի Բելառուսը: Իհարկե, պարզ է, որ Ադրբեջանի պահանջով է Լապշինը արտահանձնվել, սակայն մյուս կողմից կարելի է ենթադրել, որ թե Ռուսաստանը որոշի պատժել, թերևս, նույնչափ կպատժեր Բելառուսին: Պաշտոնական Մոսկվան մի քանի անգամ արտահայտվեց Լապշինի արտահանձնման գործով, հստակ նշելով, որ բացասական է վերաբերվում այդ գաղափարին: Սակայն չի բացառվում, որ Մոսկվան էլ ադրբեջանցիների ձերբակալություններով էլ փորձում է հիշեցնել իր երկրում գտնվող ադրբեջանցիների և ՌԴ-ից նրանց կախվածության աստիճանի մասին: Ի վերջո, բոլորի համար է պարզ, որ Լապշինը երկար ժամանակ չի մնա Բաքվում, նրան կհանձնեն Ռուսաստանին, կամ Իսրայելին: Ալիևի նպատակը մեկն էր` աշխարհին ցույց տալ Լապշինի հարցում իր «հաղթանակը» և նախադեպ ստեղծել` վախեցնելով Արցախի պոտենցիալ այցելուներին: Մետաքսյա Շալունց