Մոսկվան գծել է սահմանը
Հայաստանում Ռուսաստանի դեսպան Իվան Վոլինկինը հարցազրույց է տվել ՏԱՍՍ գործակալությանը, որում խոսել է հայ-ռուսական հարաբերությունների մասին: «Հայաստանի և Ռուսաստանի միջև ռազմատեխնիկական համագործակցությունը կրում է համալիր բնույթ և զարգանում է մեր երկրների միջև միութենական հարաբերությունների հունով», Aravot.am-ի փոխանցմամբ, ասել է ՌԴ դեսպանը: «Պարբերաբար կատարելագործվում է պայմանագրային-իրավական բազան. ինչպես գիտեք, անցյալ տարվա վերջին ստորագրվեց զորքերի միավորված խմբավորում ստեղծելու մասին համաձայնագիր, վերջերս ուժի մեջ մտավ Կովկասյան տարածաշրջանում տարածաշրջանային միավորված ՀՕՊ համակարգերի մասին համաձայնագիրը: Ռուսական սպառազինության մատակարարման արդիական հարցերը, ինչպես նաև ռուսական և հայկական ձեռնարկությունների պաշտպանական-արդյունաբերական համալիրների միջև համագործակցության զարգացումը պարբերաբար ուսումնասիրվում է ռազմատեխնիկական համագործակցության հարցերով միջկառավարական հանձնաժողովի կողմից», հավելել է նա: Հետաքրքրականն այն է, որ հայ-ռուսական ռազմատեխնիկական համագործակցությունը երկու երկրների միջև միութենական հարաբերությունների հունով զարգանալը ֆիքսելով, դեսպանը ոչ մի խոսք չի ասում, թե ինչու է «միութենական» հարաբերություններով առանձնացող հարաբերությունների համատեքստում Հայաստանի հակառակորդ Ադրբեջանը զինվել Ռուսաստանի կողմից ու դեռ շարունակվելու է զինվել: Դեսպանի ուշադրությունից չի վրիպել Հայաստանի ներքաղաքական կյանքը, նա կարևորել է ՀՀ ապագա խորհրդարանում «կայուն մեծամասնության» երաշխավորումը, որը պետք է ապահովի Հայաստանի քաղաքական գործընթացի չընդհատվածությունը: «Հաշվի առնելով այս փաստերը՝ մենք ծանրակշիռ պատճառներ ենք տեսնում, որ Երևանը կարող է կտրականապես փոխել արտաքին քաղաքական կուրսը», նկատել է դեսպանն, այնուհետև` հավելել. «Ռուսաստանն ու Հայաստանը իրար կապված են միութենական բնույթի հարաբերություններով, ռուս և հայ ժողովուրդները եղբայրական ժողովուրդներ են: Երկու պետություններն էլ մտնում են ինտեգրացիոն միավորման՝ ԵԱՏՄ-ի և ՀԱՊԿ-ի մեջ, որոնց առաջ նրանց անդամները համապատասխանաբար ունեն տնտեսական և քաղաքական պարտավորություններ: Ելնելով այդ պարտավորությունների առաջնահերթությունից՝ բնականաբար, ԵՄ-ի հետ հարաբերություները կառուցվում են ոչ ի վնաս դրանց, և բոլորը դա հիանալի հասկանում են»: ԵԱՏՄ-ի և ՀԱՊԿ-ի մեջ տնտեսական և քաղաքական պարտավորություններն ավելի են և անդամ պետությունները չպետք է խախտեն «պայմանավորվածությունները», փաստացի հասկացնում է Վոլինկինը: Նա անթաքույց նշում է այն սահմանները, որոնցից չպետք է դուրս գա Հայաստանը: Վոլինկինի ձևակերպումը, թե` «ԵՄ-ի հետ հարաբերություները կառուցվում են ոչ ի վնաս դրանց, և բոլորը դա հիանալի հասկանում են», շարունակաբար կրկնում է ՀՀ արտգործանախարար Էդվարդ Նալբանդյանը, հարկ եղած դեպքում հատուկ պարզաբանելով, որ Հայաստանի պարտավորությունները ԵՄ-ի հետ փոխհարաբերություններում չպետք է հակասեն ԵԱՏՄ-ին ստանձնած մեր պարտավորություններին: Այնպես որ, դատելով Հայաստանում ՌԴ դեսպանի և ՀՀ ԱԳ նախարարի ելույթներից` Հայաստանը դուրս չի գալիս Մոսկվայի գծած սահմաններից և չի էլ կարող դուրս գալ: Ի դեպ, Հայաստանում Ֆրանսիայի արտակարգ և լիազոր դեսպան Ժան-Ֆրանսուա Շարպանտիեն մոտ օրերս ակնկալում է Եվրամիություն-Հայաստան շրջանակային նոր համաձայնագրի ստորագրմանն ուղղված բանակցությունների ավարտ: Լրագրողների հետ զրույցում նա այսօր նշել է, որ բանակցությունների ավարտն էլ ենթադրում է պայմանագրի ստորագրում: «Մի քանի կետեր, որոնց վերաբերյալ ԵՄ-ն և Հայաստանը պետք է համաձայնության գան, դեռևս մնում են: Իմ պատկերացմամբ՝ բանակցությունները բավականին գոհացնող պայմաններում են տեղի ունենում, և իմ կարծիքով՝ շուտով արդեն երկուստեք պայմանագիր կստորագրենք»,-ասել է նա: Նրա խոսքով՝ պայմանագրի ստորագրումը էլ ավելի կընդլայնի ԵՄ-Հայաստան, հետևաբար Ֆրանսիա-Հայաստան համագործակցության շրջանակները տարբեր ոլորտներում. դա կլինի քաղաքական երկխոսություն, տնտեսական, իրավական հարցեր, աջակցություն՝ ուղղված թե՛ տնտեսությանը, թե՛ ժողովրդավարությանը: Փաստորեն, կարող ենք կանխատեսել, որ Հայաստան-ԵՄ նոր իրավական փաստաթուղթը կունենա այնպիսի տեսք, որը որևէ կերպ չի կարող դժգոհություն առաջացնել Ռուսաստանում: Այսինքն, ՀՀ-ԵՄ փոխհարաբերությունների նոր մակարդակը պետք է հենց այդ պայմանավորվածության հիմքում լինի, կամ` պարզապես չի կարող իրագործվել: Թերևս, այդ փաստաթղթի ընդունման երկարաձգված պրոցեսը հենց այդ խնդրի շուրջ ընդհանուր հայտարարի գալու հետ է կապված: Թամար Բագրատունի