Սերժ Սարգսյանը լուսանցք է մղում Կարեն Կարապետյանին

  Խոստումի համաձայն Սերժ Սարգսյանը ՀՀԿ համամասնական ցուցակի գոնե առաջին տասնյակին նոր շունչ ու երանգ հաղորդեց, այս տասնյակում չկան քրեաօլիգարխիկ դեմքեր, որպիսիք խորհրդարանական նախորդ ընտրություններին էին: ՀՀԿ-ի պատմության ընթացքում թերեւս բացառիկ իրադարձություն եղավ, երբ կուսակցության ղեկավարը հրաժարվեց ցուցակը գլխավորելուց, սակայն այսքանով հանդերձ իշխող կուսակցության ցուցակը բազմաթիվ ինչուների ու հրացականների տեղիք է տալիս, էլ չենք խոսում, որ արտահոսքով հայտնի դարձած ցուցակի հաջորդ տասնյակներն առանձնապես նույն տրամաբանությամբ չեն ձեւավորվել, ինչպես առաջինը: Արդեն գրել ենք, որ ՀՀԿ-ի հենց երկրորդ տասնյակում տարեցների պակաս չի զգացվում, Գալուստ Սահակյանը, Հերմինե Ննաղդալյանը, Սամվել Նիկոյանը, Գագիկ Մինասյանն ու ուրիշներ են տեղ գտել սերնդափոխված ցուցակում, իսկ քաղաքական սերնդափոխության մասին հիշատակում էին իրենք՝ մեծերը: Միեւնույն ժամանակ հայտնի դարձած ցուցակի 30-յակի մեջ մեկ ձեռքի վրա կարելի է հաշվել օրենք գրողներին: Այնինչ հին կազմում պատգամավորների մի տասնյակ կար, որը այդ դժվարին առաքելության պատասխանատուն էր, ՀՀԿ-ի դիմագիծը կերտող հատվածը, պատգամավորների մի խումբ, որոնք տարբեր ու դժվարին պահին հայտնվում էին մամուլի ակումբներում,հարցազրույցներ տալիս՝ իրենց վրա վերցնելով կուսակցության դեմ ուղղված ծանր հարվածները: Այդ շարքում են Հովհաննես Սահակյանը, Գագիկ Մելիքյանը, Վահրամ Բաղդասարյանը, Արտակ Դավթյանը,Կարինե Աճեմյանը,Լեռնիկ Ալեքսանյանը, Սուքիաս Ավետիսյանը, Վարդան Այվազյանը եւ ուրիշներ, որոնց անունները մինչեւ այս պահը չի քննարկվում ՀՀԿ անցողիկ ցուցակի համատեքստում: Եթե այս ամենին գումարենք ռեյտինգային ցուցակներում ընդգրկված պատգամավարների կալիբրը՝ քրեաօլիգարխիկ ու մականունավոր՝ Շմայս, Նովո, Լֆիկ եւ ուրիշներ,  ապա վստահաբար կարելի է արձանագրել, որ հաջորդ խորհրդարանում օրենքները գրվելու են բոլորովին այլ տեղում: ՀՀԿ կանանց խմբից այս առումով կարելի է ամբողջությամբ հույսը կտրել, նրանց մեջ թերեւս կան երկուսը, որոնց վրա կարելի է հենվել: Արդարադատության գործող նախարար Արփինե Հովհաննիսյանն է մեկը, սակայն դեռեւս հայտնի չէ՝ նրան կթողնեն խորհրդարանում, թե կտեղափոխեն գործադիր մարմին: Կանանց կոնտինգենտում հաջորդ խելացին Վարդան Այվազյանի օգնականն է՝ Մարիամ Ավետիսյանը, որը ակտիվ մասնակցություն է ունեցել ՀՀ օրենսդիր աշխատանքներին և ունի բարձր կրթական ցենզ: Բայց ցուցակում ակնառուն եւ ամենատարօրինակը վարչապետ Կարեն Կարապետյանի թիմի բացակայությունն է: Համենայն դեպս մինչ այս պահը անցողիկ տեղերի թեկնածուները գրեթե բոլորը հայտնի են, իսկ անցողիկության շեմը 25-30 հորիզոնականներն են, բայց միայն վարչապետի խորհրդական Շուշան Սարդարյանի մասին է հայտնի, նա ցուցակում 25-րդն է լինելու: Սա ուշագրավ ու խոսուն փաստ է, որովհետեւ ՀՀԿ-ին անդամագրվելուց հետո Կարեն Կարապետյանը կուսակցություն տարավ ավելի քան 7000 հոգու,  մի գիշերվա մեջ  այդ յոթ հազարի մոտ անդիմադրելի ցանկություն առաջացավ անդամակցելու այն կուսակցությանը, որին վարչապետն էր անդամակցել: Նորագիրների մասին մամուլը գրեց, որ վարչապետի համախոհներն ու թիմակիցներն են՝ գազի աշխատակիցները: Այսկերպ Կարեն Կարապետյանը փորձում էր ցույց տալ ՀՀԿ-ում իր  դերակատարումը, թիմի ձեւավորումը: Սակայն համամասնական ցուցակում, գոնե նշմարվող առաջին երեք տասնյակում  նրա թիմակիցները չեն երեւում, ինչը նշանակում է, որ Սերժ Սարգսյանը չի պատրաստվում թիմային խաղ տանել ու խաղի մեջ մտցնել նաեւ Կարեն Կարապետյանին՝ դրանից բխող հետեւանքներից խուսափելով: Եթե չասենք , որ նա լուսանցք է մղում Կարապետյանին, ով հավակնոտ հայտարարություններ է անում ու նույնպիսի ամբիցիաներ ունի: Անի Սահակյան