Պահում են միֆը

Ինչպես հայտնի դարձավ ՀՀԿ ԳՄ նիստից հետո ընտրական ցուցակը կգլխավորի ոչ թե Սերժ Սարգսյանը, այլ Պաշտպանության նախարար Վիգեն Սարգսյանը։ Դեռեւս հայտնի է ընտրական ցուցակի առաջին տասնյակը, որտեղ տեղ են գտել հիմնականում ՀՀԿ երիտթեւի ներկայացուցիչներ։ Երկրորդը քաղաքապետ Տարոն Մարգարյանն է, հաջորդաբար Արփինե Հովհաննիսյան, Արա Բաբլոյան, Արմեն Ամիրյան, Արմեն Աշոտյան, Էդուարդ Շարմազանով եւ այլք։ Քաղաքագետ Լեւոն Շիրինյանը մեզ հետ զրույցում անդրադառնալով ՀՀԿ ցուցակին եւ պատասխանելով հարցին, թե առաջին տասնյակը համապատասխանում է Սերժ Սարգսյանի տված խոստումներին, որ թեւակոխում ենք նոր քաղաքական մշակույթի փուլ ու քաղաքական սերնդափոխություն է տեղի ունենալու, պատասխանեց․․«Բոլոր դեպքերում ռասկլադը փոխում են» նկատեց քաղաքագետը հիմնավորելով․«Այստեղ հիմնականում միջին տարիքի, առույգ, փողկապավոր , սափրված մարդիկ են։ Բայց հիմա խնդիրը հետին պլանը մաքրելն է» միաժամանակ նշեց Լեւոն Շիրինյանը։ Նա այդ «մաքրման» գործընթացը պայմանավորեց ընդդիմադիր երեք դաշինքների՝ Օհանյան-Րաֆֆի-Օսկանյան , Ծառուկյան դաշինքի եւ Ելք-ի ակտիվությամբ․«Այդ դաշինքների ակտիվությամբ է պայմանավորված, թե ինչ որոշում կնդունի Սերժ Սարգսյանը։ Կհրաժարվի՞ արդյոք Սերժ Սարգսյանը հետին պլանում սպասող հատվածից, կախված է դաշինքների՝ հասարակության շրջանում ցուցաբերած ակտիվությունից։ Միայն այդ ժամանակ նա կարգի կբերի երկրորդ պլանը»։ Հիշեցրեցինք, որ ՀՀԿ-ն հրապարակել է ռեյտինգային ցուցակները, որոնցում տեղ են գտել մականունավորներ, սակայն քաղաքագետը կրկին ընդգծեց, որ դաշինքների ակտիվությամբ պայմանավորված՝ Սերժ Սարգսյանը կարող է «ետնամասը» առաջ բերել։ Լեւոն Շիրինյանի գնահատմամբ չնայած այդ դաշինքներում առանձնապես որոշակիություն դեռեւս չի նկատվում, բայց ցուցակների գրանցումից հետո հնարավոր է անակնկալներ ի հայտ գան․։ Շիրինյանի գնահատմամբ չնայած սերնդափոխության , այդուհանդերձ ողջունելի չէ, որ այդ սերնդափոխությունը կատարվում է «հայրերից որդիներին» սկզբունքի համաձայն․«Պարզվում է, որ բոլոր եղբայրներով լավ պատգամավորներ են, մայր եւ տղա լավ նախարար են, դա շատ վատ է։Այդպիսի բան Հայաստանում չի եղել»։ Անդրադառնալով այն փաստին, որ Սերժ Սարգսյանն անձամբ չի ղեկավարում ցուցակը, ցուցակում տեղ չի գտել նաեւ վարչապետ Կարեն Կարապետյանի անունը, քաղաքագետն ասաց․«Իրենք իրենց վեր են դասել այդ գործընթացից, որպեսզի ղեկավարեն այն։Կա նաեւ երկրորդ մասը, որ եթե վարչապետը գլխավորեր ցուցակը, ապա քննադատությունը նրան նոր վիճակի մեջ կդներ, կասեին՝ գեղեցիկ խոսեց,խոստումներ տվեց, բայց արդյոք տեսեք հիմա ուր է։ Դրա համար պահում են միֆը, առասպելը»։ Անի Սահակյան