Տիգրան Ուրիխանյանը ներել է «Analitik.am» -ի տնօրենին
Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր շարունակվեց «Analitik.am» կայքի տնօրեն Անի Հովհաննիսյանի գործով դատական երկրորդ նիստը: ԱԺ պատգամավոր Տիգրան Ուրիխանյանը ներել է ամբաստանյալ Անի Հովհաննիսյանին եւ տուժողի դիրքերից հանդես գալու ցանկություն չունի: Այսպիսի դիմում այսօր պատգամավորը մուտք էր արել դատարանի գրասենյակ՝ նշելով, որ չի ցանկանում նաեւ ներկա լինել նիստերին՝ տուժող կողմի դիրքից հանդես գալու ցանկության բացակայության պատճառով: «Անալիտիկ» կայքի տնօրեն Անի Հովհաննիսյանը մեղադրվում է ԱԺ պատգամավոր Տիգրան Ուրիխանյանից շորթում կատարելու մեջ: Ըստ մեղադրանքի նա Տիգրան Ուրիխանյանից ամսական պահանջել է վճարել 300 հազար դրամ: Նախագահող դատավոր Արշակ Վարդանյանը նկատեց, որ արդար դատաքննության շահերից ելնելով, այնուամենայնիվ, առնվազն մեկ դատական նիստին պետք է ապահովվի Տիգրան Ուրիխանյանի ներկայությունը՝ ցուցմունք տալու տեսանկյունից: Այսօրվա դատական նիստին դատարանը սկսեց գործում առկա ապացույցների հետազոտումը. գործի նյութերը կազմում է մոտ 18 հատոր: Ապացույցների հետազոտումը կշարունակվի նաեւ մարտի 6-ին: