Սյունիքի նախկին մարզպետ Վահե Հակոբյանը չի մասնակցի խորհրդարանական ընտրություններին
Սյունիքի նախկին մարզպետ և Ազգային ժողովի նախկին պատգամավոր Վահե Հակոբյանը՝ Զանգեզուրի պղնձամոլիբդենային կոմբինատի նախկին տնօրեն Մաքսիմ Հակոբյանը որդին, այս խորհրդարանական ընտրություններին չի մասնակցի:
Երեկ «Հայկական Ժամանակ»-ի հետ զրույցում Վահե Հակոբյանը չի ցանկացել մեկնաբանել՝ ՀՀԿ-ն հարմար չի՞ համարել իր առաջադրումը, թե ինքը չի ցանկացել առաջադրվել: «Դա կարևոր չէ, չեմ առաջադրվել ու վերջ», - ասել է Հակոբյանը:
«Մենք ունենք այն, ինչ ցուցակներում ներկայացված է, բնականաբար, ցանկացողներ շատ կան», - իր հերթին ասել է ՀՀԿ կազմակերպչական հանձնաժողովի նախագահ Ռուբեն Թադևոսյանը՝ ակնարկելով, որ կուսակցությունը չի ներկայացրել նրա թեկնածությունը:
Իսկ Վահե Հակոբյանը հավելել է, որ հիմա «Ուզբեկների հետ շատ ամբիցիոզ բիզնես պրոյեկտներով» է զբաղված:
Արդյոք այդ ծրագիրը գյուղատնտեսության կամ հանքարդյունաբերության ոլորտների՞ն է վերաբերում, որտեղ Վահե Հակոբյանն ու իր հայրը խոշոր սեփականություն ունեն, նա հրաժարվել է մանրամասնել: Նա նաև չի ցանկացել ասել՝ ծրագիրը Սյունիքի մարզում, թե մեկ այլ բնակավայրում են իրականացնելու:
Հետևեք մեզ Viber-ում
