Սահակ Սրբազանը հայհոյանքներ է տեղացել Կրոնական ժողովի հասցեին, Արամ Աթեշյանն արձագանքել է

arevelk.am. Պոլսահայ համայնքում շարունակվում է քննարկվել Պոլսո Հայոց Պատրիարքարանի Կրոնական ժողովի ատենապետ տեր Սահակ եպիսկոպոս Մաշալյանի հրաժարականը և դրան հաջորդած պոռթկումը: Սահակ Սրբազանը ոչ միայն հրաժարական է տվել Կրոնական ժողովի ատենապետի, այլև՝ պատրիարքարանին կից գործող «Հովակիմ 1461» հիմնարկի փոխատենապետի պաշտոնից, ինչպես նաև իր թեկնածությունն է հանել Պոլսո պատրիարքական hնարավոր ընտրությունից: Հենց հիմնականում պատրիարքական ընտրության նախապատրաստական աշխատանքների հետ էր կապված Սահակ Մաշալյանի պոռթկումը: Նա նամակ է հրապարակել, որում նաև նշել է, որ հեռանում է քաղաքից. «Ակնհայտ է, որ քանի դեռ Արամ սրբազանը Պոլսո պատրիարքական փոխանորդի պաշտոնում է, պատրիարքական ընտրությունները չեն կարող կայանալ: Իր լիազորություններն օգտագործելով ութ տարի մանիպուլյացիա իրականացնելը, սեփական պաշտոնը չարաշահելը հանցավոր բնույթ ունեն, և համաձայն եկեղեցական օրենքների նա արժանի է պատժի»,-համայնքային մամուլին ուղարկած իր նամակում նշել է Սահակ եպս. Մաշալյանը, ավելացնելով, որ պատմության մեջ երբեք պատրիարքի աթոռը ութ տարի թափուր չի մնացել: Իր նամակում եպիսկոպոսը նշել է նաև, որ եկեղեցու գլխավոր հոգևոր խորհուրդը չորս հոգևորականից բաղկացած հանձնաժողով է կազմել, որը պետք է իշխանություններին ներկայացվելիք դիմում կազմեր նոր ընտրություն անցկացնելու վերաբերյալ: Սակայն Արամ Աթեշյանը թույլ չի տվել, որ նամակը ներկայացվի Ստամբուլի նահանգապետարան, ինչի պատճառով դիմումի ներկայացման գործընթացն առկախվել է: Ստամբուլի «Ժամանակ» օրաթերթը ներկայացրել է Արամ արք. Աթեշյանի արձագանքը՝ Սահակ Մաշալյանի պոռթկմանը: «Ես իսկապես ցավ ապրեցի: Տ. Սահակ եպիսկոպոս Մաշալյանի հետ մենք հոգևոր եղբայրներ ենք: Որպես Ստամբուլի մեջ գտնվող երկու եպիսկոպոս` ներկա դժվար ժամանակաշրջանում մեզ է վիճակվել պատրիարքարանի նավը խաղաղ նավահանգիստ առաջնորդելու գործը: Եղբայրների միջև կարող են լինել տարակարծություններ: Կրոնական ժողովի պարագայում էլ կարող եմ ասել նույնը: Ժողովում կարող են ծագել տարակարծություններ, սակայն այդ ամենից հետո պետք է ընդունել քվեարկության արդյունքը: Սահակ եպիսկոպոս Մաշալյանը լքեց մեր երեկվա ժողովը և առանց նույնիսկ խորհրդակցելու ներկայացրեց հրաժարականը` ի զարմանս բոլորի: Տեսնենք, թե առաջիկա օրերին ինչ իրադարձություններ տեղի կունենան»,- թերթին ասել է Աթեշյանը: «Ժամանակ»-ի փոխանցմամբ, փետրվարի 13-ին Սահակ Մաշալյանի հրաժարականը համընկել է Համայնքային Վագըֆների Հարթարկի («VADİP») հերթական ժողովին, որին մասնակցելով, Սահակ սրբազանը, ափերից դուրս գալով հայհոյանքներ է տեղացել Կրոնական ժողովի հասցեին: Նույն ժողովում նա Արամ Աթեշյանի մասին ասել է. «Թող լքի և գնա, թող երջանիկ լինի, արդեն բավականաչափ դրամ ունի: Թե չէ այս ընտրությունը հանրաքվեից հետո էլ չի կայանալու»: