Ռուս-ադրբեջանաթուրքական «դաշինք»` ԼՂ հարցով
Փետրվարի 12-ին և լույս 13-ի գիշերը Լեռնային Ղարաբաղի և Ադրբեջանի հակամարտ զորքերի շփման գծում արձանագրվել է լարվածության աճ: Լեռնային Ղարաբաղի պաշտպանության նախարարության մամուլի ծառայության փոխանցմամբ՝ հակառակորդը Դ-44 տիպի հրանոթներից, ականանետերից, նռնականետերից ու տարբեր տրամաչափի հրաձգային զինատեսակներից հրադադարի ռեժիմը խախտել է շուրջ 80 անգամ, հայ դիրքապահների ուղղությամբ արձակել է ավելի քան 950 կրակոց: Ադրբեջանական զինուժը արևելյան ուղղությամբ կիրառել է Դ-44 տիպի հրանոթներ՝ արձակելով 13 արկ, իսկ հյուսիսային և հարավային ուղղություններով՝ 60 և 82 միլիմետրանոց ականանետեր ու նռնականետեր՝ ընդհանուր առմամբ արձակելով 49 արկ, որից 41-ը՝ ականանետերից, 8-ը՝ նռնականետերից: ՊԲ առաջապահ զորամասերը աչալրջորեն հետևել են առաջնագծում զարգացումներին և անհրաժեշտ քայլեր ձեռնարկել հակառակորդի նախահարձակ ակտիվությունը ճնշելու համար, ասված է հաղորդագրությունում: Սկսել են ավելի հաճախակիանալ տեսակետներն այն մասին, որ գարնանը հնարավոր է լարվածության էլ ավելի աճ, և նույնիսկ ռազմական գործողությունների վերսկսում: Ապրիլյան պատերազմից 10 ամիս անց` Ադրբեջանը չի ստացել այն, ինչին ձգտում էր հասնել կարճատև ուժի ցուցադրությամբ: Իհարկե, նա երկրի ներսում ներկայացնում է լիովին այլ քարոզչություն, թե ապրիլին հայկական կողմի կորուստներն ավելին են: Սակայն կարգավորման տեսակետից` Ալիևն, իսկապես, դիվանագիտական ծուղակում է: Հայկական կողմը բանակցություններին իր մասնակցությունը պայմանավորում է Ալիևի կողմից սահմանային միջադեպերի առաջարկն ընդունելու պահանջով, իսկ Բաքուն մերժում է: Հայկական կողմն ու միջնորդները խոսում են ԼՂ կարգավիճակի մասին` Ադրբեջանին դա կատաղության է հասցնում: Հետևաբար, նման պայմաններում` Ադրբեջանը ցույց է տալիս, թե ում օգնության կարիքն ունի` Ռուսաստանի: Ադրբեջանի արտգործնախարար Էլմար Մամեդյարովը ռուսաստանյան РИА Новости գործակալության հետ հարցազրույցում անդրադառնալով ԼՂ հակամարտությանն ասել է՝ բանակցություններին մասնակցում են միայն Հայաստանն ու Ադրբեջանը, «իսկ Ղարաբաղի հայկական և ադրբեջանական համայնքները հետաքրքրված կողմեր են»: Համառոտ ներկայացնելով Մինսկի խմբի ստեղծման և գործունեության պատմությունը, Մամեդյարովն ամփոփել է՝ 20 տարի անց էլ հակամարտությունը մնացել է չկարգավորված: «Բոլորը հասկանում են, որ այսօր գոյություն ունեցող ստատուս քվոն ոչ մեկին չի բավարարում, բացի, թերևս, հայկական կողմից: Մենք, իհարկե, գոհ չենք, որ 20 տարվա ընթացքում օկուպացված տարածքները, ցավոք, ազատագրվում են միայն ռազմական ուժով»,- ասել է Ադրբեջանի ԱԳ նախարարը, հավելելով, որ Ջեբրայիլի շրջանում ազատվել է Ջոջուղ Մերջանլի գյուղը, և այնտեղի բնակիչներն արդեն վերադառնում են (խոսքն ապրիլյան պատերազմում հայկական կողմի կորցրած դիրքերից մեկի՝ Լելե Թեփե բարձունքի տակ գտնող գյուղի մասին է): Այնուհետև Ադրբեջանի արտգործնախարարը նաև հայտարարել է, թե իրենք կողմ են Մոսկվայում Ռուսաստան-Հայաստան-Ադրբեջան ձևաչափով ԱԳ նախարարների հանդիպմանը: «Անցած ամիս ես Մոսկվայում էի, և մենք Լավրովի հետ քննարկում էինք այդ պլանը: Մինչ այդ, ինչպես գիտեք, նախագահներն են հանդիպել Սանկտ Պետերբուրգում: Բոլորը հրաշալի գիտեն, թե դա ինչ պլան է և մենք ինչպես պետք է շարժվենք: Ամեն ինչ գրված է: Քաղաքական կամք է պետք, որը պետք է ցուցաբերի հայկական կողմը,»- ասել է Մամեդյարովը: Այսպիսով, ռուսական կայքում տված հարցազրույցում, Մամեդյարովը կրկին շեշտել է, որ գոյություն ունի կարգավորման ռուսական առանձին պլան: Ընդ որում, ոչ առաջին անգամ: Սա հայտարարվել է թե՛ Ադրբեջանի, թե՛ Թուրքիայի իշխանությունների կողմից, իսկ պաշտոնական Մոսկվան երբեք չի հերքել: Այնպես որ, բավական հստակ ուրվագծվում է ռուս-ադրբեջանաթուրքական «դաշինքը» ԼՂ հարցում` ապրիլյան քառօրյայից հետո: Թամար Բագրատունի