Ալիևի սադրանքների նպատակը
Վերջին օրերին սահմաններում անհանգիստ է: Ադրբեջանն ակնհայտորեն սկսում է լարվածության նոր ալիք: Նախօրեին` հակառակորդն իր բնակավայրերի մերձակայքում տեղակայված կրակային հենակետերից 85մմ-ոց Դ-44 տիպի հրանոթներից ուղիղ նշանառությամբ արկակոծության է ենթարկել ՊԲ արևելյան ուղղությամբ տեղակայված մարտական դիրքերը», - տեղեկացրեց ԼՂ ՊՆ մամուլի ծառայությունը: «Բացի հրանոթներից ադրբեջանական զինուժը ինչպես արևելյան, այնպես էլ հյուսիսային (Թալիշ) ուղղությամբ կիրառում է տարբեր տրամաչափի ականանետեր: Այս պահի դրությամբ, հրանոթներից և ականանետերից, ընդհանուր առմամբ, արձակվել է 46 արկ, որից 22-ը հրանոթներից, 24-ը՝ ականանետերից», - ասված է ԼՂ ՊՆ հաղորդագրությունում: ԼՂՀ պաշտպանության նախարարությունը հայտարարեց, որ` «Ադրբեջանի կողմից ձեռնարկված սադրիչ գործողությունների և դրանց հետևանքների ողջ պատասխանատվությունն ընկնում է պաշտոնական Բաքվի ռազմաքաղաքական ղեկավարության վրա: Նման սադրանքների շարունակականության դեպքում ԼՂՀ պաշտպանության բանակն, Արցախի պետական սահմանների անվտանգությունն ապահովելու նպատակով, իրեն իրավունք է վերապահում դիմելու ոչ համարժեք քայլերի»: Փետրվար 8-ին ԼՂ ՊՄ-ի հյուսիսային ուղղությամբ տեղակայված զորամասերից մեկի պահպանության տեղամասում, հակառակորդի կողմից հրադադարի ռեժիմի խախտման արդյունքում, մահացու վիրավորում է ստացավ ՊԲ 38-ամյա պայմանագրային զինծառայող Գեղամ Հենրիկի Մանուկյանը: Նույն օրը հակամարտ զորքերի շփման գծի մեկ այլ՝ Մարտակերտի ուղղությամբ ժամը 12-ի սահմաններում, կրկին հակառակորդի կողմից հրադադարի ռեժիմի խախտման արդյունքում, ծանր վիրավորում է ստացել ՊԲ 29-ամյա ժամկետային զինծառայող Կորյուն Կամոյի Կիրակոսյանը: Սահմանին լարվածությունը մերթընդմերթ ավելանում է, և եթե նախկինում կրակոցներն էին սովորական, ապա այժմ՝ արկակոծություններ: «Տարբեր զինատեսակներ են օգտագործում: Կան և՛ նռնականետներ, և՛ Դե-44 հրանոթ, և՛ ականանետներ: Օրինաչափ է՝ հատկապես հաշվի առնելով 2017թ. յուրահատկությունը: Գիտեք, որ այս տարի մենք պետք է տոնենք Շուշիի ազատագրման 25-ամյակը, Բերձորի: Իրենց համար էլ դա հակառակ բանն է․ չէ՞ որ իրենք պարտվել են», նկատել է ԼՂ նախագահի մամլո խոսնակ Դավիթ Բաբայանը: Ադրբեջանը փաստացի հրաժարվել է բանակցային պրոցեսից ու փորձում է միջազգային հարթակներում ակտիվություն ցուցաբերել: Բաքուն փորձեց փակել Հայաստանում ԵԱՀԿ-ի գրասենյակը, կարծես`մեկուսացնել Հայաստանը աշխարհից: Գումարած` Լապշինի գործը: Հստակ` Ղարաբաղն ու Հայաստանը մեկուսացնելու քաղաքականություն է տարվում: Ադրբեջանն իր դաշնակիցների միջոցով` Բելառուսի միջոցով փակում է ՀԱՊԿ-ում Հայաստանի կողմից գլխավոր քարտուղարի ընտրությունը: Մարտահրավերներն, իսկապես, բավական լուրջ են: Ադրբեջանը շարունակելու է իր սանձարձակ քաղաքականությունը նույնիսկ այն պայմաններում, երբ միջնորդ պետությունները ջանում են Սարգսյան-Ալիև հանդիպում կազմակերպել, իսկ Ռուսաստանը փորձում է առաջիկայում ԱԳ նախարարների հանդիպում կազմակերպել: Բանակցային գործընթացը փակուղում պահելը Ալիևի հիմնական խնդիրն է: Ինչպե՞ս զսպել Ադրբեջանին: Նախևառաջ մեր բանակի մարտունակությունն է, որը պետք է լինի ամենաբարձր մակարդակում: Հաջորդը` ռազմաքաղաքական հավասարակշռության պահպանումը Ադրբեջանի հետ: Ադրբեջանը հրաժարվում է հետաքննության մեխանիզմների ներդնումից` փաստում է, թե որ կողմն է անընդհատ միջադեպեր նախաձեռնում: Ապրիլյան քառօրյայից հետո Ալիևի հույսը նոր ադրբեջանանպաստ կարգավորման տարբերակն է: Սակայն միջնորդները շարունակում են պնդել հետաքննության մեխանիզմների ներդրմանը: Այլ կերպ ասած` Ադրբեջանը գտնվում է բավական ծանր վիճակում, Ալիևը հայտնվել է դիվանագիտական ծուղակում, հայկական կողմը պետք է օգտվի այս իրավիճակից, լուրջ աշխատանք տանի միջազգային հանրության հետ Հենց դրա համար է, որ Բաքուն դիմում է նոր սադրանքների` դրանով շանտաժի ենթարկելով միջնորդներին: Հայաստանը պետք է մտորի, թե ինչպես է այսուհետ հակադարձելու Արցախի ու Հայաստանի դեմ այս արշավին: Ռուսաստանը ստանձնել է ԼՂ կարգավորման ղեկը, և թույլ չի տալու, որ այն խլեն այլ շահագրգիռ կողմերը, հետևաբար ՌԴ-ի հետ աշխատանք պետք է տարվի ի շահ Հայաստանի ու Արցախի: Թամար Բագրատունի