Նախընտրական լապշաներ
Ազգային ժողովի այսօրվա նիստի սկզբում բոլոր խմբակցությունների պատգամավորները բարձրացրեցին Բելառուսի կողմից բլոգեր Լապշինին Ադրբեջանին արտահանձնելու հարցը: Բելառուսի Գերագույն դատարանը դռնփակ նիստում,հիշեցնենք, որ օրինական է ճանաչել բլոգեր Ալեքսանդր Լապշինին Ադրբեջանին արտահանձնելու մասին երկրի գլխավոր դատախազության կողմից հունվարի 20-ին կայացված որոշումը: 2011 թվականի ապրիլին եւ 2012 թվականի հոկտեմբերին Ալեքսանդր Լապշինն այցելել է Արցախ, իսկ այս տարվա ապրիլի 9-ին՝ քառօրյա պատերազմից հետո, իր կայքում ծաղրել է Արցախը զավթելու Բաքվի փորձերը: Բլոգերն իր այցելած 122 երկրի շարքում որպես անկախ պետություն կայքում նշել է նաեւ Արցախը: Այս ամենի համար Ադրբեջանի գլխավոր դատախազության ծանր հանցագործությունների հարցերով քննչական կոմիտեում նրա նկատմամբ քրեական գործ է հարուցվել քրեական օրենսգրքի 281.2 (պետության դեմ ուղղված հրապարակային կոչեր հնչեցնելը) եւ 318.2 հոդվածներով (Ադրբեջանի պետական սահմանների անօրինական հատում): Ադրբեջանի գլխավոր դատախազության դիմումի հիման վրա Ալեքսանդր Լապշինը 2016 թվականի դեկտեմբերի 15-ին Մինսկում ձերբակալվել է: Եւ, ի վերջո, Ադրբեջանի պահանջով երեկ արտահանձնվել այդ երկրին: Պատգամավոր Խաչատուր Քոքոբելյանն ասաց, որ Հայաստանի թիվ մեկ քաղաքական մարմինը՝ խորհրդարանը պետք է իր դիրքորոշումը հստակ հայտնի այս հարցում: Նիկոլ Փաշինյանը Բելառուսի քայլը համարժեք որակեց Հունգարիայի կողմից Ռամիլ Սաֆարովին Ադրբեջանին արտահանձնելուն՝ կոչ անելով այսօր, ժամը 15:00-ին հավաքվել Հայաստանում Բելառուսի դեսպանատան շենքի մոտ ու բողոքի ակցիա անել: «Բելառուսում Հայաստանի դեսպանին պետք է հետ կանչել, դիվանագիտական կոշտ միջոցներ ձեռնարկել»,- ասաց Փաշինյանը: ԲՀԿ խմբակցության ղեկավար Նաիրա Զոհրաբյանն աննախադեպ լկտիություն ու ցինիզմ որակեց Բելառուսի քայլը: «Այստեղ ամենամեծ անելիքն ունի ՀՀ-ն, եթե իրեն համարում է արժանապատիվ պետություն: Ես կողմ կլինեմ, որ այս պահին ՀԱՊԿ-ում Հայաստանի անդամությունը սառեցվի, հետ քաշվենք, մինչև իրավական ճանապարհով հարցին լուծում կտրվի»,- ասաց Զոհրաբյանը: Ընդդիմադիր պատգամավոր Հրանտ Բագրատյանն էլ հետևյալ առաջարկեց.«Դիմեք, թող Բելառուսին ՀԱՊԿ-ից հանեն, դուք դուրս եկեք ՀԱՊԿ-ից, հեռացեք ԵՏՄ-ից, չգիտեմ, Տիգրան Սարգսյանին հետ կանչեք»: Պատգամավոր Թևան Պողոսյանն էլ ասաց, որ պետք է այս և մի շարք հարցերի շուրջ Հայաստանի խորհրդարանը արտահերթ լսումներ անցկացնի: «Լապշինն ընդամենը մեկ դեպքն է, մենք ունենք մեծ խումբ հարցեր քննարկելու»,- ասաց նա: ՀՀԿ խմբակցության ղեկավար Վահրամ Բաղդասարյանը հակադարձեց՝ «Մենք չպետք է հարց բարձրացնենք, որ Հայաստանը դադարեցնի անդամակցությունը ՀԱՊԿ-ին, այլ պետք է հարց բարձրացնենք, որպեսզի Բելառուսը դադարեցնի»,- ասաց նա: ՀՅԴ խմբակցության քարտուղար Աղվան Վարդանյանն էլ հորդորեց զերծ մնալ զգացմունքային ելույթներից, առաջարկեց հայտարարության տեքստ մշակել: ԱԺ նախագահ Գալուստ Սահակյանին անգամ դաշնակցական անատամ առաջարկը ցնցեց.« Ասում եք՝ Ազգային ժողովը հայտարարություն անի, այսինքն՝ հայտարարություն անի, խնդիրը փակվի ու վերջանա՞: Ես կարծում եմ, որ սա սովորական խնդիր չէ, լուրջ քայլեր են պետք»,- ասաց նա: Խորհրդարանի դահլիճում մի խոսքով՝ ամբողջովին նախընտրական մարաթոն էր, ով ոնց կարողանում էր փորձում էր վազանց անել մրցակից գործընկերներին՝ էլ ՀԱՊԿ-ից դուրս գալ, էլ ֆլան-ֆստան, սակայն, եթե հերթը հասնի ռեալ քայլերի, պետք չէ կասկածել, որ այդ ֆրակցիաներում խմբակային վիրուսներ կներթափանցեն ու հաշված պատգամավորներ կմասնակցեն հարցի քվեարկությանը: Անի Սահակյան