Ճաքեր` անհավատարիմների «դաշինքներում»
Բելառուսի նախագահ Ալեքսանդր Լուկաշենկոն օրերս մամուլի ասուլիս է հրավիրել, որում նա դաժան քննադատության է ենթարկել Մոսկվային: Նա իր ասուլիսի մեծ մասը նվիրվել է Բելառուս-Ռուսաստան հարաբերություններին: Վերջին շրջանում ռուս-բելառուսական հարաբերությունները լարվել են նավթային խնդրի, Ռուսաստանի կողմից սահմանային վերահսկողություն սահմանելու պատճառով: Լուկաշենկոյի ասուլիսից մեկ օր առաջ էլ ռուսական Ռեգնումը գրել էր, որ Բելառուսը պատրաստվում է դուրս գալ ԵԱՏՄ-ից և ՀԱՊԿ-ից: Ահա, Լուկաշենկոն չի թաքցրել, որ երկու երկրների հարաբերություններում խնդիրներ կան: Լուկաշենկոն նշել է, որ Ռուսաստանը փորձում է նավթի ու գազի միջոցով ճնշում գործադրել Բելառուսի վրա, և դա արդեն սովորություն է դարձել: Բելառուսի ղեկավարը նշել է, որ երկրի անկախությունն անհամեմատելի է նավթի հետ, և առանց ռուսական նավթի էլ Բելառուսը ելք կգտնի: Լուկաշենկոն նշել է, որ ցավոք, դա Ռուսաստանում չեն հասկանում: Բելառուսի ղեկավարը Ռուսաստանին մեղադրել է երկկողմ պայմանավորվածությունները չկատարելու, բելառուսական ապրանքների համար խոչընդոտներ ստեղծելու մեջ: Նա հավելել է, որ ռուսական ընկերություններն ապրանքի որակի առումով չեն կարողանում մրցակցել բելառուսականների հետ, այդ պատճառով գնային խոչընդոտներ են ստեղծում: Նրա խոսքով, Բելառուսը Ռուսաստանի գնային քաղաքականության պատճառով 15 միլիարդ դոլար է կորցրել: Լուկաշենկոն նշել է, որ ռուսական կողմը միշտ չէ, որ պատշաճ կերպով ընդունում է բելառուսական պատվիրակություններին: Նրա խոսքով, վերաբերմունքը բելառուս պաշտոնյաների նկատմամբ երբեմն արհամարհական է: Մինսկը կարող է առանց ռուսական նավթի, չնայած շատ դժվար կլինի, նետել է Լուկաշենկոն. «Ինչո՞ւ պետք է բռնել մեր կոկորդից։ Հասկանալի է, որ առանց ռուսական նավթի մենք կարող ենք։ Շատ դժվար կլինի, բայց Բելառուսը ելք կգտնի»,-նշել է Լուկաշենկոն։ Նրա խոսքով՝ ազատությունը, անկախությունը ոչ մի գումարով, ոչ մի թվով չի գնահատվում։ «Բացարձակապես անհամեմատելի է, եթե մի կողմում անկախությունն է, մյուս կողմում՝ ռուսական, իրանական, ադրբեջանական կամ ամերիկյան նավթը»,-հավելել է Լուկաշենկոն։ Եթե Բելառուսի նման հզոր ռեսուրսներով երկրի ղեկավարը բարձրաձայնում է, որ երկիրը 15 միլիարդ դոլար է կորցրել ԵՏՄ-ում անհավասար պայմանների պատճառով, որքա՞ն է կորցրել Հայաստան, որքան վնա՞ս է հասցվել հայկական տնտեսությանը: Թե՞ Հայաստանի համար հավասար պայմաններ են ստեղծված... Հազիվ թե: Լուկաշենկոյի հայտարարությունը բացահայտում է այն մեխանիզմը, որով գործում է Մոսկվան: Ստացվում է, որ Ռուսաստանի քմահաճությունների պատճառով երկրները հայտնվում են անհավասար պայմաններում, սակայն այնուհետև Մոսկվան վարկեր է առաջարկում այդ երկրներին` կրկին նրանց կախվածության մեջ պահելով: Բայց, փաստորեն, փոխհատուցումն էլ կորցրածին ոչ համարժեք է: Ի՞նչ քաղաքականություն է սա: Լուկաշենկոն հազիվ թե` չեղած տեղից, ինչպես ասում են` հերթական աղմուկը բարձրացներ: Ուրեմն, իսկապես «դանակը հասել է ոսկորին»: Ավելին, անգամ Լուկաշենկոն է հասկանում Մոսկվայի քայլերի շարժառիթները ու դրանք ջրի երես է հանում, Մոսկվան այդպես է վարվում, որպեսզի անդամ պետությունները «չթեքվեն» արևմուտքի կողմը: Ահա, սա է Մոսկվայի կողմից կառույցներ ունենալու միակ պատճառաբանությունը: Պուտինի ամբիցիաները բավարարվում են այլ դաշնակիցների ու գործընկերների շահերի հաշվին: Մետաքսյա Շալունց
Հետևեք մեզ Viber-ում
