Սամվել Ալեքսանյանի «դաբրոն» ու ցուցակի գզվռտոցը, նախընտրական կրքերը թեժ են

Նախընտրական քարոզարշավի մեկնարկը դեռ չի տրվել, բայց քաղաքական գործիչների գրեթե բոլոր հայտարարությունները, ելույթները եւ անգամ շփումները նախընտրական մարաթոնի են վերածվել։ Խորհրդարանի վերջին քառօրյան հենց այսպիսի մթնոլորտում է անցնում, քաղաքական ուժերը կեսօրին գալիս ներկայանում են, իրենց նախընտրական ելույթներն ունենում ու գնում իրենց գործերով։ Բայց մինչեւ հեռանալը ՀՀԿ-ական պատգամավոր Սամվել Ալեքսանյանը՝ Լֆիկ Սամոն ԱԺ միջանցքում հասցրեց նախընտրական «բոյի» բռնվել Հեղինե Բիշարյանի հետ ու վերջինից մի նախընտրական հուժկու քոթակ ստացավ։ ՕԵ խմբակցության ղեկավար Հեղինե Բիշարյանը խորհրդարանը ինչպես երեւաց չէր կարողացել «կուլ տալ» Ալեքսանյանի մեկ օր առաջ արված հայտարարությունն այն մասին, որ թող ինքը չառաջադրվի։ Երեկ, երբ լրագրողները Ալեքսանյանից հետաքրքրվել էին, թե ինչպե՞ս է ռեյտինգային ընտրակարգով առաջադրվելու նույն ընտրատարածքում՝ Շենգավիթում, որտեղ նաև Հեղինե Բիշարյանն է առաջադրվելու, ում Սամվել Ալեքսանյանը համարում է իր քույրը, նա պատախսանել էր. «Է, թող իմ քուրն իմ դեմ չառաջադրի: Ես ընդեղ կայի, ինքն ա նոր եկել»: «Ես արդեն երեք անգամ Շենգավիթում առաջադրված թեկնածու եմ», - իր կենսագրության փառահեղ էջերի մասին հիշեցրեց Բիշարյանը ու Ալեքսանյանին փորձեց ներքաշել մարտի։ Սամվել Ալեքսանյանը սակայն հոլիվուդյան ժպիտով լսում էր Բիշարյանին մինչեւ այն պահը, երբ ՕԵԿ-ի ծանր հրետանին «տղայականով» հաշիվ պահանջեց . «Դու ինձ պիտի՞ ասես՝ առաջադրվեմ, թե չէ, դու ինձ պիտի՞ խանգարես»: Շվարած Սամվել Ալեքսյանյանը մեղքը լրագրողների վրա գցեց՝ ասելով, որ իրեն սխալ են հասկացել: «Դու կարաս առաջադրվես», Բիշարյանին «դաբրո» տվեց ՀՀԿ-ի կարկառուն օլիգարխը։ Մեկ ուրիշ ֆոյեում էլ «Համախմբում» կուսակցության վարչության անդամ Ստեփան Մարգարյանն էր վստահեցնում, թե դաշինքում «գզվռտոց» չկա ի հեճուկս ԱԻՄ առաջնորդ Պարույր Հայրիկյանի հայտարարության, Ստեփան Մարգարյանը վստահեցնում էր, որ կան առողջ քննարկումներ, իսկ դաշինքի վերջնական կազմը պարզ կլինի 1-2 օրից: «Անունն էլ այդ ժամանակ կհայտարարենք: 1-2 օրից վերջանալու են բանակցությունները, և ամբողջանալու է այդ պահին «ինչ ունենք` ունենք» տարբերակով: Այս պահին բանակցություններն ավարտում ենք «Ժառանգության» հետ, որի հետ վաղուց բանակցել էինք, և քանի որ իրենք ներսում ունեին խնդիրներ` դաշինքով մասնակցել-չմասնակցելու մասով, ձգձգվեց, բայց իրենք մասնակցել են նաև մեր գաղափարական հենքի ձևավորմանը»,- ասաց Մարգարյանը: Նշենք, որ այսօր ԱԻՄ առաջնորդը հրավիրած ասուլիսում բացահայտել է, որ դաշինքում ցուցակի տեղերի գզվռտոց կա․«Եթե Օհանյան-Օսկանյան դաշինքը շարունակի հապաղել և գաղտնի պահել ժողովրդից իր գործողությունները, ապա հնարավոր է ԱԻՄ-ը դուրս գա այդ միությունից»,-ասել է Հայրիկյանը։ Անի Սահակյան