ՀՀԿ-ն անհանգիստ է
Այս տարվա առաջին ու այս գումարման վերջին ԱԺ քառօրյայի մեկնարկը նախընտրական մեկնարկ ունեցավ։ Նիստերի դահլիճում իշխանության «գլխին՞ սրեր ճոճվեցին, Նիկոլ Փաշինյանը իր նախագիծը ներկայացրեց, որով առաջարկում է ստեղծել հանձնաժողով, որը կուսումնասիրի պաշտոնյաների ունեցվածքը, նախագծին, բնականաբար, կողմ արտահայտվեցին բոլոր ընդդիմադիրները, ապա համատեղ բոցաշունչ պահանջներ հղեցին ընտրությունների օրը տեղափոխելու մասին։ Որքան խիզախ էր ընդդիմությունը, նույնքան երկչոտ իշխանությունը։ Գրեթե բոլոր մականունավորներն ԱԺ-ում խուսափում էին պատասխանել լրագրողների հարցին՝ իրենց առաջադրվելու մասին։ Սեյրան Սարոյանը բացառիկներից էր, որը մի երկու խոսք փոխանակվեց լրագրողների հետ։ Ասաց, թե ներկա պահին հստակ չէ՝ կմասնակցի՞ խորհրդարանական ընտրություններին, թե`ոչ․«Էդ խմբակային գործ ա, հո ես իմ գլխին չե՞մ, էթամ ասեմ` անհատական ա, միլիոն մուծեմ»,- մուննաթ գալով բացատրեց նա: Սարոյանն ինքը կարծում է, թե օրենսդիր մարմնում դեռևս անելիք ունի. «Իհարկե, անելիք ունեմ, լիքը գործ ունեմ անելու»։ «Կլինի մրցում ա, ժողովուրդն ում կընտրի, պարզ ա լինելու, էս անգամ ոչ մեկ չի կարա խախտում անի, իմ ընտրատարածքում չի եղել խախտում, բոլորիդ էս անգամ էլ հրավիրելու եմ» նաեւ վստահեցրեց գեներալը, որը հայտնի է որպես իշխանության կարկառուն ընտրակեղծարար: ՀՀԿ փոխնախագահ Հովիկ Աբրահամյանի` կուսակցության շարքերը լքելու մասին, բնականաբար, խոսել չցանկացավ ու իրեն բնորոշ խորամանկությամբ զգուշավորություն ցուցաբերեց ․ «Ես ո՞վ եմ, որ քննադատեմ` Հովիկ Աբրահամյանը գնաց, թե մնաց, կամ ինքն ո՞վ ա, որ ինձ քննադատի: Եթե տունը 10 ախպեր ես, մի ախպերը գնաց, բնական ա, իհարկե, թուլանում ա»: Սարոյանն ասաց, որ ամեն մարդ ինքն է իր ճակատագիրը որոշում, նեղանալը նրա խոսքով՝ տղամարդուն հարիր չհամարեց․.«Որ ես նեղանամ, կեթամ մեր տուն, ոչ մի տեղ չեմ էթա: Հետո նեղանալս ո՞րն ա, մենք տղամարդ ենք»,- ասաց նա: ՀՀԿ խմբակցության ղեկավար Վահրամ Բաղդասարյանն ի պատասխան լրագրողների հարցին, թե ՀՀԿ-ն չունի՞ վախ ռեյտինգային քվեարկության համակարգից, որի պարագայում ՀՀԿ տարբեր օդիոզ դեմքեր նույն ընտրատարածքում մրցակցելու են միմյանց հետ, ուշագրավ պատասխան տվեց՝ ասելով, թե քաղաքականության մեջ մտնելիս պետք է մի կողմ դնել վախը: «Քաղաքականության մեջ մտնողի վախը պետք է պորտի հետ կտրած գցած լինեն, պետք չէ վախենա որևէ մեկը, ով քաղաքականության մեջ է»,- ընդգծեց նա: ՀՀԿ-ն, թեև, չի վախենում, միևնույն է, անհանգստություն ունի` կապված ընտրությունների անցկացման հետ, քանի որ կառավարման համակարգ է փոխվում: «Պետք է այնպիսի ընտրություններ անցկացնեն, որպեսզի և՛ հասարակության, և՛ միջազգային կառույցների համար ընկալելի լինեն: Այս ընտրություններից հետո նոր համակարգ է լինելու, նոր խորհրդարան, և պետք է այնպիսի աշխատանքներ տանենք, որ կարողանանք կանոնակարգել, մենք դա գիտակցում ենք: Դուք անակնկալներ չեք տեսնի, բայց ընտրությոններ են, ոչ ոք ապահովագրված չի. կարող են դեպքեր լինեն, միջադեպեր լինեն, դրա համար էլ գործում է օրենքը և օրենքի սահմաններում պետք է կանոնակարգենք դրանք»,- ասաց նա: Հատկանշական է, որ ՀՀԿ-ականներից շատերը միմյանցից կամ լրագրողներից էին ճշտում՝ լինելու են իրենք հաջորդ խորհրդարանում, թե համալրելու են երիտասարդ թոշակառուների շարքերը։ Օրվա երկրորդ կեսից փնտրվում էր պատգամավոր։ Անի Սահակյան
Հետևեք մեզ Viber-ում
