«Քեզ փող առաջարկողը հոգիդ է ուզում, մարմինդ է ուզում». Արամ Մանուկյան

ՀԱԿ փոխնախագահ, խմբակցության քարտուղար Արամ Մանուկյանը չբացահայտեց, թե ՀԱԿ-ի ցուցակը ե՞րբ վերջնական տեսքի կգա,դրանք դեռ կազմում են: «Դա ինձ այնքան էլ չի հուզում: Կարող եմ միայն հայտարարել, որ առաջին համարը լինելու է Լևոն Տեր-Պետրոսյանը:Խորհրդարանական ընտրություններին ՀԱԿ-ը մասնակցելու է ՀԺԿ-ի հետ դաշինքով: Մեր դաշինքը բաց է բոլոր այն կուսակցությունների համար, որոնք կհամաձայնեն առաջ գնալ մեր կողմից առաջ քաշված խաղաղության ծրագրով` կապված ԼՂՀ հիմնախնդրի կարգավորման հետ: Մենք այդ մասին հայտարարել ենք մեր համագումարի ժամանակ, և այստեղ մեխը ոչ թե մեխանիկական միացումներն են, այլ քաղաքական ծրագիրը, որը հստակ է, և դա խաղաղության ծրագիրն է»,- ասաց Ա.Մանուկյանը: Ուսումնասիրել են  նաև հասարակության կարծիքը, հաշվի է առել բոլոր մարտահրավերները և համարձակ գնում է ընտրությունների` ասելու ճշմնարտությունը: «90-ականներին իրենք և՛ հացի գին են բարձրացրել, և՛ ամենածանր խնդիրներն են ունեցել Ղարաբաղյան ճակատամարտում, երկրաշարժ, վերջին հաշվով, արել են բոլոր ռեֆորմները: Մենք  հասարակության մեջ 90 % մեծամասնություն չենք ունեցել: Բայց վիրաբույժը միշտ չի սիրելի հիվանդի համար, և միշտ կլինեն աղմուկ անողներ, թիմեր ղժղժացողներ: Վստահ եմ՝ հասարակությունը շատ լավ գիտի՝ ինչ է ուզում, ու կունենանք բավական համախոհներ հենց այս ծրագրի շուրջ»: Անդրադառնալով ՀԱԿ-ի ընտրական ցուցակներին` Ա.Մանուկյանը վստահեցրեց, որ որևէ խնդիր չունեն. «Մենք ճանաչված ենք, մենք ընդունված ենք, մեր ցուցակում ընդգրկված են մտավորականներ, գիտնականներ, համարձակ մարդիկ: Ես Արաբկիրում եմ առաջադրվելու, մարդիկ ինձ ճանաչում են: Իհարկե, գիտեմ, որ գումարային լավ ռեսուրսներ ունեն, և արդեն ունենք տեղեկություններ, որ փող են բաժանում, սոցիալական հարցեր են լուծում: Մի մեսիջ կարող եմ ուղղել ժողովրդին՝ նայեք՝ ով փող չի տալիս, ով խոստում չի տալիս, և ով է ասում դառը ճշմարտությունը: Մի քիչ եթե քաղաքացիները քաղաքականապես մոտենան խնդրին, կզգան, թե ում պիտի ձայն տան: Դա բացատրելու բան էլ չի: Պարզ չի՞, որ քեզ փող առաջարկողը հոգիդ է ուզում, մարմինդ է ուզում»: