Գերիներ թողնելու ժամանակը. Ալիևը` դիվանագիտական ծուղակում

Ադրբեջանը հերթական հետախուզա-դիվերսիոն ներթափանցման փորձն է իրականացրել: Երեկ Լեռնային Ղարաբաղի պաշտպանության նախարարությունը հաղորդեց, որ փետրվարի 1-ին ժամը 15.00-ի սահմաններում Ղարաբաղի և Ադրբեջանի հակամարտ զորքերի շփման գծի հյուսիսային (Թալիշ) ուղղությամբ հակառակորդը, օգտագործելով եղանակային մառախլապատ պայմանները, ձեռնարկել է հետախուզա-դիվերսիոն ներթափանցման փորձ: Ըստ հաղորդագրության, Պաշտպանության բանակի առաջապահ ուժերը, ժամանակին հավաստանշելով ադրբեջանական հատուկ ջոկատայինների առաջխաղացումը, դիմել են կանխարգելիչ գործողությունների և կորուստներ պատճառելով հետ շպրտել: Կազմակերպված հակադիվերսիոն գործողության արդյունքում՝ առաջնագիծը պաշտպանող հայկական ուժերին հաջողվել է գերեվարել ադրբեջանական բանակի զինծառայող, 1995 թվականին Բարդա քաղաքում ծնված Էլնուր Հյուսեին Զադեին: Նախարարությունը նշում է, որ ըստ հավաստի տվյալների՝ հակառակորդը տվել է նաև առնվազն 1 վիրավոր, որն, ի դեպ, պաշտոնապես հաստատվել է Ադրբեջանի պաշտպանության նախարարության կողմից այսօր տարածված հաղորդագրությամբ: «Պաշտպանության բանակի առաջապահ ստորաբաժանումները շփման գծի ողջ երկայնքով շարունակում են վստահորեն իրականացնել իրենց առջև դրված մարտական խնդիրը և պատրաստ են չեզոքացնել ցանկացած նախահարձակ գործողություն», - ասվում էր Լեռնային Ղարաբաղի ռազմական գերատեսչության հաղորդագրությունում: Նշյալ միջադեպը վկայում է այն մասին, որ հայկական կողմն իսկապես առանձնացել է պատրաստվածությամբ և արժանի հակահարված տվել ադրբեջանական կողմի հերթական հետախուզա-դիվերսիոն ներթափանցման փորձին: Հայկական բանակում իրականացված փոփոխությունները պետք է էլ ավելի ամրացնեն առաջնագիծն ու թիկունքը: Ադրբեջանական կողմը պետք է վստահ լինի, որ այսուհետ սանձազերծած արկածախնդրությունների համար ծանր գին է վճարելու: Ադրբեջանը շարունակելու է իր սանձարձակ քաղաքականությունը նույնիսկ այն պայմաններում, երբ միջնորդ պետությունները ջանում են Սարգսյան-Ալիև հանդիպում կազմակերպել, իսկ Ռուսաստանը խոսում է առաջիկա շաբաթներին ԱԳ նախարարների հանդիպման կազմակերպման մասին: Այսինքն` բանակցային գործընթացը փակուղում պահելը Ալիևի հիմնական խնդիրն է: Բայց ինչպե՞ս ստիպել Ադրբեջանին չկրակել: Իհարկե, այստեղ նախևառաջ մեր բանակի մարտունակությունն է: Հաջորդը` ռազմաքաղաքական հավասարակշռության պահպանումը Ադրբեջանի հետ: Հաջորդը` տեղեկատվական պատերազմն է, որը ոչ մի կերպ չի զիջում ռազմական գործողություններին: Հայկական կողմը պետք է առաջնային դիրքերում լինի նաև տեղեկատվական պատերազմում: Այն, որ Ադրբեջանը հրաժարվում է հետաքննության մեխանիզմների ներդնումից` փաստում է, թե որ կողմն է անընդհատ միջադեպեր նախաձեռնում: Ապրիլյան քառօրյայից հետո Ալիևի հույսը նոր ադրբեջանանպաստ կարգավորման տարբերակն է: Սակայն միջնորդները շարունակում են պնդել հետաքննության մեխանիզմների ներդրմանը: Այլ կերպ ասած` Ադրբեջանը գտնվում է բավական ծանր վիճակում, Ալիևը հայտնվել է դիվանագիտական ծուղակում: Իհարկե, այս վիճակում Բաքուն կարող է դիմել նոր էսկալացիայի, լարվածություն մտցնել շփման գծում, դրանով շանտաժի ենթարկել միջնորդներին: Թերևս, միակ զսպող գործոնը` Մոսկվան է, որը առայժմ շարունակում է կարգավորման ուղղությամբ իր առանձին ծրագիրն առաջ տանել: Թամար Բագրատունի