Սերժ Սարգսյանը կչկչան «առվակների» հավաքագրում է անում

Հովիկ Աբրահամյան-Սերժ Սարգսյան «առվակների» ու «գետերի» դիմակայությունը կարծես թե դուրս է գալիս ափերից։ Արարատը այսօր դիմավորեց իր ութերորդ մարզպետին՝ Ավշարի գինու կոնյակի գործարանի սեփականատեր եղբայրներից Արամայիս Գրիգորյանին: Նախկին մարզպետներից միայն Ալիկ Սարգսյանն է երկար ղեկավարել մարզը՝ մոտ 8 տարի՝ 2000-2008թթ․, իսկ մյուսների առավելագույն ժամկետը եղել է 2 տարին: Արարատում մարզպետները փոխվում են այն ժամանակ, երբ մարզի երկու ազդեցիկ գերդաստանները դիրքային փոփոխությունների են ենթարկվում։ Սերժ Սարգսյանը Աբրահամյաններին ու Գրիգորյաններին բոլոր ժամանակներում պահել է միմյանց հակակշռելու դիրքերում, Սերժ Սարգսյանը խաղն այնպես է տարել, որ ինքը միշտ հաղթող դուրս գա։ Հիմա, երբ նախկին վարչապետ Հովիկ Աբրահամյանը ինչ-ինչ պատճառներով հեռացել է կուսակցությունից, ապա պետք է մարզը հարմարեցնել Գրիգորյանների համար։ Հարկ է նշել, որ երբեւէ Աբրահամյաններ-Գրիգորյաններ առճակատում տեղի չի ունեցել, երկու կողմերն էլ մշտապես կարողացել են զսպվածություն ցուցաբերել, մնալ կոռեկտության սահմաններում ու ցույց չտալ մրցակցային հարաբերությունները։ Մարզում նրանց հարաբերությունները շատ չեն քննարկում, քանզի դրանք զուտ մրցակցային են․երբ ոուժեղանում է մեկը, մյուսը պետք է զիջի նրան։ Հովիկ Աբրահամյանի հեռանալուց շատ չանցավ, երբ հայտնի դարձավ, որ հրաժարականի դիմում է ներկայացրել նաեւ Արարատի արդեն նախկին մարզպետ Ռուբիկ Աբրահամյանը։ Վերջինս որեւէ բացատրություն չի տվել հրաժարականի դիմումի առիթով, բայց արդեն իսկ պարզ է, թե ինչու։ Ռուբիկ Աբրահամյանը մարզպետի պաշտոնում հայտնվեց 2014 թվականի մայիսին, երբ Արամայիս Գրիգորյանը տեղափոխվեց գործադիր եւ զբաղեցրեց բնապահպանության նախարարի աթոռը։ Ռուբիկ Աբրահամյանը դարձավ մարզպետ, քանի որ համարվում էր Հովիկ Աբրահամյանի մտերիմը, նա Արարատի մարզի Խարբերդ գյուղից է, փոքրիկ բիզնեսներ ունի։ Երեկ էլ պարզ դարձավ, որ ՀՀԿ-ից դուրս գալու դիմում են ներկայացրել մարզպետարանի մի շարք աշխատակիցներ, ինչպես նաեւ Հովիկ Աբրահամյանի զարմուհին՝Կարինե Պողոսյանը, որը գլխավորում էր Արտաշատի ՀՀԿ կառույցը, ընդհանուր թվով՝ 13 հոգի։ Եւ ահա, այսօր էլ մարզի երեք գյուղապետեր են ՀՀԿ-ն լքելու մտադրություն հայտնել, այս մարդիկ, կամ ինչպես կասեն «կարկաչուն» առվակները դեռեւս լռում են, խոսում է տրամաբանությունը առ այն, որ մարդիկ դուրս են գալիս բացառապես Հովիկ Աբրահամյանի հետ ունեցած ջերմ հարաբերությունների պատճառով։ Նշենք, որ Կարինե Պողոսյանին մարզային կառույցում կփոխարինի նախկին ոստիկանապետ Ալիկ Սարգսյանը, որը նույնպես պատահական ընտրված մեկը չէ։ Ալիկ Սերգեյիչի ու Աբրահամյանների վաղեմի հակամարտությունների մասին գիտեն բոլորը, մամուլում տարիներ շարունակ այդ մասին հրապարակումներ է եղել։ Ի տարբերություն Գրիգորյանների, Սարգսյանների հետ հարաբերություններն ավելի ցայտուն են,որը պայմանավորված է նրանով, որ երկուսն էլ Արտաշատի շրջանից են ու թե պաշտոնների, թե բիզնեսների եւ առհասարակ բոլոր հարցերում բախումն անմիջական է եղել։ Մի բան հստակ է, որ կչկչան «առվակների» հավաքագրում է տեղի ունենում։ Անի Սահակյան