Սերժ Սարգսյանի ծրագիրը Մանվել Գրիգորյանի դեմ
Արդեն վերջնականապես պարզ է դառնում, որ գեներալ Մանվել Գրիգորյանն ու իր «հերոսական» գերդաստանը հայտնվել են իշխանության «սեւ ցուցակում»։ Դոն Պիպոյի ասպարեզ բերելը, հետո գեներալի որդու՝ Կարեն Գրիգորյանին առնչվող քրեական գործում շրջադարձային փոփոխությունները ու ընդհանրապես վերջին իրադարձություններն ու գործընթացները հուշում են այն մասին, որ Մանվել Գրիգորյանի վիճակն այնքան էլ լավ չէ։ Մի քանի օր առաջ Էջմիածնի նախկին քաղաքապետ Հրաչիկ Աբգարյանը նաեւ հայտարարեց, որ ՀՀԿ-ի հետ է ընտրությունների գնալու։ Դրանից շաբաթներ առաջ Աբգարյանը Արթուր Բաղդասարյանի ՀՎԿ-ին անդամակցելու դիմում էր ներկայացրել։ Իսկ Աբգարյանի եւ Գրիգորյանների հարատեւ թշնամության մասին մամուլում լեգենդներ է նույնիսկ պտտվում։ Սա նշանակում էր, որ եթե Աբգարյանը մնար ՀՎԿ-ում եւ առաջադրվել այդ կուսակցության կողմից, ապա գեներալի մարդիկ ընտրություններին անելիք էին ունենալու, դրանով պայմանավորված բարձրացնելու էին իրենց գինը, շեշտելու իրենց անփոխարինելիությունը։ Միգուցե հենց այս նկատառումով էլ իշխանության գործուն աշխատանքների շնորհիվ Հրաչիկ Աբգարյանը փոխեց որոշումը։ Թե ինչը կարող է պատճառ դառնալ, որպեսզի Գրիգորյանները, որոնց ոչ վաղ անցյալում ներվում էր ամեն ինչ, նրանք վայելում էին Սերժ Սարգսյանի սերն ու վստահությունը, կարելի է վերլուծել։ Իշխանական շրջանակներից հորդող բացատրությունն այն է, թե պառլամետարիզմը չի խրախուսում Մանվել Գրիգորյանի պես անձանց ներկայությունը, որը անցած չորս տարիներին աչքի ընկավ բացառապես սրա-նրա «հետեւին» ձեռք տալու իր մոլուցքով։ Բայց սա պարզունակ ու ոչ արժանահավատ բացատրություն է թեկուզ այն պատճառով, որ նրա «զույգին»՝ Սեյրան Սարոյանին կարելի է այս անգամ էլ առաջադրվել։ Ամենայն հավանականությամբ Սերժ Սարգսյանն անդավաճան է մնում տարիներ շարունակ որդեգրած սկզբունքներին ու չի թողնում, որպեսզի իշխանության որեւէ թեւ, որեւէ բեւեռ, մինչեւ անգամ որեւէ անձ ուժեղանա, հզորանա՝ ստվերելով Սերժ Սարգսյանին ու նրա համբավը՝ դրանից բխող վտանգավոր հետեւանքներով։ Վերջինս տարբեր ճանապարհներով զսպում է, կոտրում նման վերելքները, օրինակ Մհեր Սեդրակյանի դեմ ոստիկանության միջոցով պայքարեց՝ նրա տան դեմ խուզարկող բրիգադ ուղարկելով, Հովիկ Աբրահամյանի դեպքում եղավ այն, ինչ եղավ ու այսպես շարունակ։ Մանվել Գրիգորյանի ու նրա մարդկանց ազդեցությունը թուլացնելու, ուժը նրանց ձեռքում չկենտրոնացնելու նպատակով ասպարեզ է բերվել այն գործոնները, որոնց մասին վերեւում թվարկեցինք։ Բայց կա մի վտանգ եւս, որից դրդված Սերժ Սարգսյանը կարծես թե «մահակի» տակ է պահում Գրիգորյաններին: Չի բացառվում, որ Սերժ Սարգսյանը մտահոգություններ ունի, որ նորից գլուխ կբարձրացնի Մանվել Գրիգորյանի ընդդիմության նկատմամբ համակրանքը , որը դրսեւորվեց 2008 թվականին։ Հատկապես, որ այս անգամ ընդդիմության դաշտում հայտ է ներկայացրել նաեւ Մանվել Գրիգորյանի մարտական ընկերը՝ Սեյրան Օհանյանը, որի հետ երկար տարիներ ՝ Մանվել Գրիգորյանը ճանապարհ է անցել։ Սերժ Սարգսյանը հսկողության տակ է պահում Մանվել Գրիգորյանին, որպեսզի որեւէ կերպ ու ոչ մի ճանապարհով իր դեմ «խաղեր» չտա։ Որովհետեւ, եթե ինչ-որ խնդիր լիներ գեներալի դեմ, ապա նրա որդին դեռեւս քաղաքապետի պաշտոնում չէր լինի։ Անի Սահակյան
Հետևեք մեզ Viber-ում
