«Չիստկա»՝հանուն ժառանգորդի

Սյունիքի մարզում անհանգիստությունը չի թուլացել, շաբաթներ առաջ մեկնարկած շռնդալից փոփոխությունների շարունակությանը վտանգը դեռ կախված է ոմանց գլխին։ Հայտնի է, որ մարզպետ Վահե Հակոբյանի համառ ջանքերի ու աշխատանքների շնորհիվ մարզի բժշկական հաստատությունների ղեկավարները աղմկահարույց պատմություններով ազատվում են պաշտոնից։ Նախ Կապանի բժշկական կենտրոնի տնօրենը: Լուրն անմիջապես մեծ հնչեղություն ստացավ:Արդեն նախկին տնօրեն Սմբատ Օրբելյանը հայտարարեց, որ իր պաշտոնանկությունը Սյունիքի նորանշանակ մարզպետ Վահե Հակոբյանի սուբյեկտիվ որոշման հետեւանքն է ու որ իրեն ոչ ոք այդպես էլ չի պարզաբանել, թե ինչու է միակողմանիորեն լուծվել աշխատանքային պայմանագիրը: Սյունիքի մարզպետ Վահե Հակոբյանի որոշումը դժգոհություն էր առաջացրել Կապանի բուժկենտրոնի աշխատակիցների շրջանում, որոնց համար այնքան ակնհայտ էր մարզպետի դիտավորությունը, որ նրանք գնացին մարզպետարան բողոքի ձայն բարձրացնելու։ Բայց կար նաեւ սրան հակընդեմ քայլ։ Մի գիշերվա ընթացքում ասպարեզ բերվեց ինչ-որ բռնաբարության զավեշտալի թեմա, թե իբր ԲԿ տնօրենին ազատել են, քանի որ նախորդ գիշեր հիվանդանոցում բժշկի կողմից բռնաբարության փորձի դեպք է արձանագրվել։ Իբր անեսթեզիոլոգը ոչ սթափ վիճակում փորձել է բռնաբարել հիվանդանոց դիմած 18 տարեկան աղջկա՝ պատճառելով ծանր մարմնական վնասվածքներ: «Աղջիկն ինքնասպանության նպատակով դեղ է ընդունել եւ նրան հիվանդանոց են տեղափոխել հիստերիայի նոպայով: Նա ցանկացել է վերջ տալ կյանքին, քանի որ բռնաբարվել է» ,- իր հերթին պարզաբանել էր Սմբատ Օրբելյանը՝ մեկ անգամ եւս վեր հանելով կատարվածի աբսուրդը։ Դրան հետեւեց նաեւ Գորիսի ԲԿ տնօրենի ազատումը։Գորիսի ԲԿ տնօրեն Սաշիկ Խաչատրյանը, որը Լիսկայի հորեղբոր թոռն է՝ «Որոտանի կասկադի» նախկին գլխավոր տնօրեն Սասուն Խաչատրյանի որդին, ազատվեց պաշտոնից։ Նա լրատվամիջոցներից մեկի հետ զրույցում իր պաշտոնանկություն բացատրել էր, թե չի ուզում մարզպետի համար աշխատել, բայց իրականում Խաչատրյանի ազատումն էլ նույն մոտիվներով է։Մեր տեղեկություններով նա այդ պաշտոնում նշանակվել է իր հորեղբոր կողմից, որի համար սկզբունքային հարց է եղել եղբոր տղային պահել պաշտոնում։ Մարզպետ Վահե Հակոբյանը շաբաթներ առաջ մարզպետարանի վերահսկողությանն է ուղարկել այդ հիվանդանոց ստուգումների, ըստ մամուլի ստուգումների արդյունքում պարզվել է, որ տնօրեն Սաշիկ Խաչատրյանն իրեն 1.5 մլն դրամ աշխատավարձ է նշանակել, գնումների գործընթացում հայտնաբերված խախտումներն էլ են աղաղակող եղել։ Hayeli.am-ի տեղեկություններով այս ստուգումներից հետո Սուրիկ Խաչատրյանն անձամբ է գնացել նախագահական ու խնդրել Սերժ Սարգսյանին, որ մարզպետի ստուգումները հիմք չընդունի եւ իր վերահկողությունը վերստուգումներ իրականացնի։Ի դեպ, այդ օրերին մամուլում ծամծմվում էր Սաշիկ Խաչատրյանի պաշտոնանկության թեման, քանի որ դեռ ստուգումներ էին ընթանում։ Ստուգումներից հետո պարզվել է, որ մարզպետի «բացահայտումները» իրականում խիստ չափազանցված են եղել։ Ինչ խոսք, Վահե Հակոբյանը կարող էր այլ ճանապարհով ազատվել այս մարդկանցից եւ այնպիսի պատմություններ չմոգոնվեին, որոնք կառաջացնեին հավի ծիծաղը, բայց սյունեցիները ըստ ամենայնի չեն սխալվում՝ համարելով նրան ԿԳԲ-ական մեթոդներով գործող անձնավորություն։ Նրան այդպես հիմնականում անվանում են Սուրիկ Խաչատրյանն ու իր կողմնակիցները՝ պատահածի մոտ բողոքելով, որ իրենց ամեն քայլը, շարժը վերահսկվում է։ Ստացվում է այնպես, որ տարիներ շարունակ Սերժ Սարգսյանը աշխատել է այս մարդկանց հետ, նրանք են համարվել իր իշխանության հենարանները, բայց հիմա նրանցից հրաժարվում է, իսկ սա նշանակում է մի բան, որ նա մարզերում զտումներ ու իշխանափոխություններ է անում՝ հարմարեցնելով դրանք այն մարդուն, որին պատրաստվում է փոխանցել իշխանությունը ։ Այդ փոփոխություններով իշխանության է բերվում ավելի ենթարկվող, կառավարելի տեսակը։ Ի դեպ, մենք տեղեկացրել ենք նաեւ, որ Հակոբյանը անձամբ կընդգրկվի ՀՀԿ ռեյտինգային ցուցակում ու վերջերս այդ առիթով ժողով է հրավիրել՝ ասելով, որ պատգամավոր չի դառնալու, շարունակելու է ղեկավարել մարզը։ Իհարկե, Հակոբյանը վստահ է, որ շնորհիվ Ջերմուկ գրուպի սեփականատեր Աշոտ Արսենյանի ՀՀԿ-ն այդ ընտրատարածքում բարձր տոկոսներ է ապահովելու։ Անի Սահակյան