Կրիմինալների հրեշտակապետությունն ու Գյումրի ընտրությունները
Հայաստանում տասնամյակներ շարունակ քաղաքականությամբ զբաղվողները իրենց գործունեությամբ նպաստել են, որպեսզի հասարակության մեջ ատելություն, զզվանք, գարշանք առաջանա այն ամենի նկատմամբ, ինչը կապված է քաղաքականության հետ։ Արել են այնպես, որ «քաղաքականությունն անբարոյականություն է» պրիմիտիվ ու քաղաքականության խորքի հետ որևէ կապ չունեցող մտայնությունը մարդկանց ուղեղներում այնքան խորանա, որ նրանք դադարեն վստահել քաղաքականության հետ առնչություն ունեցող ցանկացած երևույթի ու գործչի։ Իրականում, եթե հարցը տեղափոխում ենք բարոյականության դաշտ, ապա անբարոյական են հենց իրենք՝ քաղաքական գործիչները, ոչ թե քաղաքականությունը: Օրինակ ինչպես բնորոշել թասիբով Գյումրի երկու կարկառուն ներկայացուցիչներին, ինչպիսիք նախկին քաղաքապետ Վարդան Ղուկասյանն ու ԱԺ պատգամավոր Մարտուն Գրիգորյանն են: Այս մարդիկ մինչեւ վերջերս պայքարում էին իրար դեմ՝ առաջինը ՀՀԿ-ի թասիբի ու նամուսի համար, երկրորդը՝ ԲՀԿ-ի, այս պայքարի ընթացքում մինչեւ անգամ արյուն թափվեց, քաղաքական կեղտոտ խաղերին մարդկային կյանք մատաղ արվեց, բայց հիմա նրանք դերերով փոխվել են, Գրիգորյանը հայտնվել է իշխանության դաշտում, Վարդան Ղուկասյանն էլ Ծառուկյան Դաշինքում: «Աստված էդպես կամեցավ, հետո ոնց որ մենք նմանություններ ունենք եկեղեցաշինությամբ, խիղճը չկորցնելով, հասկանալի է՝ ողորմած լինելով։ Էդ հարաբերություններն ինձ շատ են դուր գալիս, էդ ապրելակերպը»,- արդեն մի քանի օր Գյումրիի նախկին քաղաքապետը իրեն հրեշտակի տեղ դրած բացատրում է իր որոշումը : Սա այն Ղուկասյանն է, որը 2012-ի խորհրդարանական ընտրություններին պարտվեց Մարդուն Գրիգորյանին, իսկ դրան հաջորդած աղմկահարույց սպանության մասին աղաղակում էր, թե աղջկա նշանածի՝ Կարեն Եսայանի սպանությունը միմիայն քաղաքական է, որ այդ արյունը ծանրացած է ԲՀԿ-ի ուսերին: Ղուկասյանի փեսացուի սպանության մութ պատմության վրա այդպես էլ լույս չսփռվեց: Վարկածները շատ էին, ոմանք կասկածում էին Մարտուն Գրիգորյանի շրջապատին, կասկածյալն իբր Գրիգորյանի հետ քավորսանիկական հարաբերություններ ուներ, կար նաեւ վարկած, որ սպանությունը կազմակերպվել է հենց Ղուկասյանի թիմում, որպեսզի հետագայում շահարկման թեմա դառնա: Երկու թիմերում բանականությունն այնքան էր մթագնել, որ Գյումրի շտապեց Վովա Գասպարյանը ու հնչեցրեց թեւավոր դարձած իր <<Արա, դու պատգամավոր ես, թե գողական>> խոսքերը: Մյուս կողմից նողկալի է նաեւ գողականների հետ սերտ շփումների մեջ գտնվող Մմարտուն Գրիգորյանի բացատրությունը: Նա մի սրտաճմլիկ ստատուս է գրել Ֆեյսբուքում ու ծավալուն ներկայացնում է, թե ինչու է որոշել ՀՀԿ-ով առաջադրվել: Չնայած, որ 2015 թվականից՝ ԲՀԿ-ից դուրս գալուց հետո Մարտուն Գրիգորյանը անմիջապես տեղավորվել էր ՀՀԿ-ի տաքուկ գրկում ու բոլորը գիտեին, որ նա առաջադրվելու է ՀՀԿ ռեյտինգային ցուցակով, այնուամենայնիվ Մարտուն Գրիգորյանն էլ իր հերթին է փորձել սրբերի դասին հավակնել ու կարճ ասած ՀՀԿ-ի հետ ամուսնության մեղքը գցել է Վարդան Ղուկասյանի վրա՝ ասելով, թե չէր կարող հայտնվել մի թիմում, որտեղ Գյումրիի նախկին քաղաքապետն է. <<Իմ ու Գագիկ Ծառուկյանի համագործակցության մասին. 2009թ-ից մինչև 2015-ի փետրվարյան հայտնի դեպքերն իրականացրել ենք բազմաթիվ համատեղ ծրագրեր, որոնք, լինելով ժողովրդանպաստ և կառուցողական, միայն ժողովրդի գովասանքին ու երախտագիտությանն են արժանացել: Մենք փոխլրացրել եք միմյանց աշխատանքն ու հատուցվել ժողովրդի կողմից: Բավական է հիշել 2012թ. խորհրդարանական ընտրությունների արդյունքները. իմ՝ թիվ 034 ընտրատարածքում 8662 ձայն տրվել է ՀՀԿ-ի, 14817ձայն՝ ԲՀԿ-ի օգտին: Վեցամյա համատեղ աշխատանքից չեմ հիշում միմյանց չհասկանալու, առավել ևս, նեղանալու որևէ առիթ: Անկախ քաղաքական ճնշումներից, իմ ու թիմիս նկատմամբ նյութած դավերից ու խարդավանքներից կես քայլ չեմ հեռացել Ծառուկյանից ու նրա թիմից>>. գրել է նա եզրահանգելով.<< Հասկանալի է, որ մենք չենք կարող անցնել ճանապարհ մի թիմի հետ, որի մաս կազմելով 2009-2012թթ իմ պարտքն եմ համարել պայքարել Գյումրիում ամենաթողության, կեղծ բարեպաշտության, կամայականությունների, «եթե իմ ձեռքի տակ չես, իմ դեմ ես» կործանարար սկզբունքի, թայֆաբազության, անկառավարելի ամբոխի, մեկ դերասանի թատրոնի և այլ անհանդուրժելի երևույթների դեմ: Իմ նախկին կուսակցական թիմը ոգևորված էր և ողջունում էր իմ վճռականությունը, համարձակությունը, մինչև վերջ գնալու պատրաստակամությունը: 2012թ ԲՀԿ թիմը տոնեց այդքան երկար սպասված ու շատ թիմակիցների կարծիքով անիրականանալի հաղթանակը և գյումրեցիներին պարգևեց հոգեբանորեն մաքրված քաղաք>>: Դե , ինչ, կարելի է չկասկածել, որ Գյումրին այս անգամ էլ բացառություն չի լինի ու ընտրությունները կվերածվեն գողական ռազբորկաների, կլանների բախման: Անի Սահակյան