«Ելք»-ի լոսանջելեսյան արկածները
Պայմանավորված առաջիկա ընտրություններով , ինչպես հայտնի է , հայաստանյան քաղաքական ուժերը բուռն իրարանցման մեջ են գտնվում: Օրերս, Լոս Անջելես էին այցելել «Ելք» դաշինքի անդամները` Ալեն Սիմոնյանն, Էդմոն Մարուքյանն ու Արամ Զավենի Սարգսյանը , որոնց այս այցի մասին կանխատեսվում էր դեռևս շաբաթներ առաջ: Թե հատկապես որն էր «Ելք»-ի այցի իմաստը Լոս Անջելես, թերևս, կարելի է կռահել: Արևմտամետ դիրքերից հանդես եկող այս նորաթուխ քաղաքական գոյացությունը որին «ընդդիմադիր» անվանելը, մեղմ ասած, այնքան էլ տեղին չէր լինի, քանի որ փորձում է ինչ-որ կերպ տեղավորվել այն կերպարի մեջ, որ վերագրել է ինքն իրեն` ընդամենը մեկ նպատակից ելնելով: Շարժման պարագլուխները ցանկանում են տեղ գտնել ապագա խորհրդարանի կազմում ու դրա համար, վստահաբար, պատրաստ են կրել ցանկացած դիմակ` առաջնորդվելով, բնականաբար իշխանությունների հետ նախապես համաձայնեցված սցենարով: Ոչ մեկի համար էլ գաղտնիք չէ, թե իրականում միմյանց հետ ինչ կապերի մեջ են գտնվում ասենք նույն Էդմոն Մարուքյանն ու Բարսեղ Բեգլարյանը.... Մի խոսքով` ընդդիմություն մի ասա,մի զուլում ասա: Իսկ հիմա «1in. am» -ի «նախկին» գլխավոր խմբագիր Արման Բաբաջանյանի կողմից Լոս Անջելեսի Իրանահայերի միության սրահում կազմակերպված «Ելք»-ի ու ամերիկահայերի միջև բուն հանդիպման մասին: Ի դեպ, «տարօրինակ» զուգադիպությամբ իր ակտիվ մասնակցությունն էր բերել իշխանությունների հետ սերտ հարաբերությունների մեջ գտնվող ու օրուգիշեր Սերժ Սարգսյանի գովքն անող Թոմիկ Ալեքսանյանն, ում էլ, ի դեպ պատկանում է այդ սրահը: Միանգամից նշենք, որ որևիցե բովանդակային առանձնահատկությամբ կամ գոնե ինչ-որ բաղադրիչով այդ հանդիպումն այդպես էլ մինչև վերջ աչքի չընկավ: Ընդդիմադիր հայացքներով ներշնչված մարդկանց կողմից կազմակերպված հանդիպում ՝ ոչ մի կերպ չի կարելի համարել, քանի որ բանախոսները` Էդմոն Մարուքյանն, Ալեն Սիմոնյանն ու Արամ Սարգսյանն այդպես էլ մի կծու, թթու կամ գոնե դառը խոսք չարտասանեցին իշխանությունների հասցեին`բավարարվելով ընդամենը հավաքվածներին հույս տալով, թե իրենք կանեն ամեն ինչ` Հայաստանի առջև ծառացած խնդիրները ըստ պատշաճի լուծելու,եթե, իհարկե, ստանան գոնե որոշակի տոկոս ընտրություններին: Ավելին` ըստ երևույթին` ընդգծելու համար սեփական բացառիկությունն ու անզուգականությունն` իսկական վայնասուն էին բարձրացրել ընդդեմ Սեյրան Օհանյանի ու Գագիկ Ծառուկյանի`այսպիսով «ջուր լցնելով իշխանությունների ջրաղացին» ու բացահայտ հակաքարոզչություն անելով ընդդիմության դեմ` ընդդիմության , որն , ինչպես հայտնի է , հանդես է գալիս մեծամասամբ ռուսամետ դիրքերից : Մի խոսքով` մարդիկ Լոս Անջելես էին գործուղղվել ընդդիմության դեմ հակաքարոզչություն անելու,այլ ոչ թե սեփական ծրագրերը առաջարկելու կամ իշխանություններին որպես այլընտրանք ներկայանալու: Նրանց, այդ երկար-բարակ ելույթներից այդպես էլ ոչ մեկի համար պարզ չդարձավ, թե կոնկրետ ինչ ծրագիր են նրանք առաջ քաշում կամ ինչպես են անելու`Հայաստանի առաջ ծառացած խնդիրներին լուծում տալու համար: Իսկապես, հավաքվածներիս համար այդ հանդիպումը ոչինչ չտվեց, այլ՝ միայն ականատես դարձանք թիկնապահների ուղեկցությամբ «Ելք» դաշինքի անդամների «մուտքին» ու «ելքին» ովքեր հեռացան ներկաներին հուզող խնդիրներին պատասխան չտալով: Այս իրողությունն, անկասկած, զրոյացնում է «Ելք»-ի ապագա հավաքների հնարավորությունն ու նպատակահարմարությունը , քանի որ ոչ ոք այլևս իր ժամանակը չի՛ զոհի ու չի՛ գնա մասնակցելու ևս մեկ նմանատիպ հանդիպման: Իմաստ՝ պարզապես չկա: Ինչ վերաբերում է հանդիպման եկածների ու հանդիպումը կազմակերպիչների միջև շփումներին, որ համաձայն կարգի, նման դեպքերում լինում է, ապա պետք է նշենք, որ այս առումով առհասարակ իսկական խայտառակություն էր տիրում, քանի որ հանդիպման մասնակիցներն անգամ հնարավորություն չունեցան`հենց ուղղակի իրենց հարցերը հավուր պատշաճի ուղղելու բանախոսներին` ո՛չ հանդիպման ընթացքում, ո՛չ սկզբում, ո՛չ էլ վերջում: Հանդիպման ընթացքում կազմակերպիչների կողմից բաժանվեցին փոքրիկ այցեքարտի չափսի թղթեր, որոնց վրա ներկաները գրեցին իրենց հարցերը, որոնք վերաբերում էին ՀՀ իշխանություններին: Արման Բաբաջանյանն ու Թոմիկ Ալեքսանյանը բավական հմտորեն խմբագրեցին, մաղեցին հարցերը, իսկ բանավոր հարց ուղղելու հնարավորություն մասնակիցներին այդպես էլ չթույլատրեցին: Ի դեպ` ներկա գտնվողներից պարոն Թիթիզյանը հայտնեց իր բողոքն այս հարցի շուրջ ու նույնիսկ հանդիպման վերջում ամոթանք տվեց հանդիպման կազմակերպիչներին ` նման անորակ միջոցառում կազմակերպելու համար: Ի դեպ, չափազանց ուշագրավ մի դրվագ. այս հանդիպումը բավական փակ ռեժիմով էր կազմակերպված ու ԶԼՄ-ներ, առհասարակ, հրավիրված չէին: Քանի օր է անցել, բայց այդ հանդիպման մասին գրեթե ոչ ոք չի անդրադարձել`ո՛չ «Araratnews»-ը, ո՛չ էլ «1in.am»-ը`չնայած թվում էր, թե պետք է որ ինչ-որ անդրադարձ, այնուամենայնիվ, լրտավամիջոցները կատարեին, բայց քար լռություն է: Ինչ վերաբերում է հանդիպման գլխավոր կազմակերպիչներից Արման Բաբաջանյանին,ապա նրա` Լոս Անջելեսում հայտնվելը,պետք է նկատել, բավական կասկածամտորեն է ընկալվել հայ համայնքի կողմից,ու դրա անդամները հստակ պլանավորված ու իշխանությունների կողմից ուղղորդվող քայլեր են որակում այս ամենը `իրականացվող Բաբաջանյանի ձեռամբ: Մարդը, փաստացի, մոլորեցնում է հանրությանը`մի բան,որի համար էլ,խոշոր հաշվով գործուղվել է Լոս Անջելես: Այսպիսով` ստիպված ենք արձանագրել,որ «Ելք» դաշինքի անիմաստ այցը Լոս Անջելես, լիակատարորեն տապալված կարելի է համարել հայ համայնքի շրջանում, բացի խորը հիասթափությունից ու հակասական զգացողություններից, ուրիշ ոչինչ չառաջացրեց: Թե ինչու էին հազարավոր կլիոմետրեր կտրել-անցել այս պարոններն, այդպես էլ մինչև վերջ հասկանալի չդարձավ: Արտակ Ոսկերչյան Լոս Անջելես