Թրամփի հրամանագրի նկատմամբ համաշխարհային հանրության արձագանքը
Ամերիկայի Ձայն Փախստականների վերաբերյալ նախագահ Դոնալդ Թրամփի հրամանագիրը ոչ միանշանակ արձագանքների է արժանացել տարբեր երկրների իշխանությունների ու քաղաքական գործիչների կողմից: Ավստրալիայի վարչապետ Մալքոլմ Թերնբուլը հայտարարել է, որ ԱՄՆ-ը ստորագրել է համաձայնագիր Օբամայի վարչակազմի օրոք՝ պարտավորվելով ընդունել 1200 փախստական Իրանից, Իրաքից ու Աֆղանստանից, ովքեր ներկայումս հանգրվանել են Պապուա Նոր Գվինեայի ու Նաուրոյի ճամբարներում: Սպիտակ տունը սակայն հայտարարել էր, որ ներմուծվող նոր համակարգը վերաբերում է բոլոր փախստականներին: Իրանի նախագահ Հասան Ռուհանին ասել է, որ կիրառվող արգելափակումը հակասում է բոլոր միջազգային պարտավորություններին ու սկզբունքներին: Ըստ նախագահի, այս հրամանագիրը հակասում է նաև ԱՄՆ-ի մոտեցմանը, ըստ որի այն դեմ է ոչ թե Իրանի ժողովրդին, այլ՝ Իրանի իշխանություններին: «Այս որոշման հիմքում ընկած է անօրինական խտրականությունը: Նրանք միշտ ասում են՝ մենք պաշտպանում ենք մարդու իրավունքները, սակայն սա մարդու իրավունքների խախտում է», – հայտարարել է նախագահը: Միևնույն ժամանակ Թրամփի հրամանագրերին աջակցություն է հայտնել մահմեդական մեծամասնություն ունեցող Արաբական Միացյալ Էմիրությունների արտգործնախարար շեյխ Աբդալահ բին Զայեդը, ով հայտարարել է, որ նախագահի հրամանագրերն ԱՄՆ-ի ինքնիշխան իրավունքն է և կապված չէ որևէ կրոնի հետ: Նման մի արձագանք է տվել նաև Իտալիայի արտգործնախարար Անջելինո Ալֆանոն, ով ասել է, որ Եվրոպան այսօր այն դիրքերում չէ, որ ուրիշների ընտրության մասին կարծիք հայտնի: Թրամփի վարչակազմի հրամանագրերին աջակցություն են հայտնել Եվրոպայի ծայրահեղ աջակողմյան ուժերը: Ֆրանսիայի նախագահի թեկնածու Մարին Լա Պենը, ով խոստացել է հաղթանակի դեպքում սահմանափակել ներգաղթն ու փակել երկրի սահմանները, կողմ է Թրամփի հրամանագրերին, իսկ Նիդերլանդների ծայրահեղ աջակողմյան թեկնածու Գերտ Ուիլդերսը շնորհավորել է Թրամփին հրամանագրերի կապակցությամբ՝ ընդգծելով, որ սա միակ ձևն է ապահովելու անվտանգությունը: Նախագահ Թրամփին այս հարցում աջակցություն են հայտնել նաև Գերմանիայի և Իտալիայի պոպուլիստական կուսակցությունները: Փորձագետների կարծիքով, սակայն, խնդիրը կապված է ոչ թե ներգաղթի, այլ՝ ներգաղթյալների երկրորդ սերնդի ինտեգրացման հետ, որի վառ ապացույցը Փարիզի և Բրյուսելի ահաբեկչություններն էին՝ իրականացված ներգաղթած եվրոպացիների երկրորդ սերնդի ներկայացուցիչների կողմից: Իսկ ՄԱԿ-ի Գլխավոր քարտուղարը եւ ԵՄ ղեկավարությունը հետեւյալ հայտարարություններն են արել. կարդալ այստեղ
Հետևեք մեզ Viber-ում
