Սերժ Սարգսյանը ասաց, թե ինչ է լինելու Հովիկ Աբրահամյանի հետ
ՀՀԿ խորհրդի նիստին Սերժ Սարգսյանի ելույթում հնչած մի շարք ուշագրավ հայտարարություններից կարելի է ընդհանուր եզրակացություն անել մի բանի մասին, որ իշխանության գործը լուրջ է, այն ճաքեր է տալիս։ Անդրադառնալով Գագիկ Ծառուկյանի քաղաքականություն վերադառնալու հարցին Սերժ Սարգսյանը կարճ է կապել․« Շատ հակիրճ եմ ասում՝ ես չեմ ողջունել Գագիկ Ծառուկյանի քաղաքական դաշտ վերադառնալը»,- ասել է նա։ Սերժ Սարգսյանի անդրադարձն ինքին զարմանալի է, քանի որ եթե, ինչպես ՀՀԿ-ականներն են պնդում, Հայաստանը իրավական եւ օրինակարգ երկիր է, ապա որեւէ քաղաքացու քաղաքականությամբ զբաղվելու իրավունքը սահմանում է ոչ թե Սերժ Սարգսյանը, կամ երկրի ղեկավարը, այլեւ Մայր օրենքը՝ Սահմանադրությունը։ Բայց սա ըստ ամենայնի նշանակում է, որ Սերժ Սարգսյանի գծած սխեման իր հունով չի գնում։ Հասկանալի է, որ երկու տարի առաջ Ծառուկյանի հետ կատարվածից հետո միայն փոխպայմանավորվածության արդյունքում կարելի էր վերադառնալ, բայց Սերժ Սարգսյանի ու ՀՀԿ-ականների տրամագծորեն հակառակ հայտարարություններից կարելի է եզրահանգել, որ իրավիճակ է փոխվել։ Հիշեցնենք, որ ՀՀԿ-ականները, գրեթե ծափողջուններով ողջունեցին Գագիկ Ծառուկյանի վերադարձը, նույնիսկ Ծառուկյանի ամենամոլի քննադատ Արմեն Աշոտյանը հայտարարեց․«Ես դրական եմ վերաբերում քաղաքական ուժերի ու գործիչների, այդ թվում՝ Գագիկ Ծառուկյանի ու ԲՀԿ-ի մտադրություններին մասնակցելու 2017 թվականի խորհրդարանական ընտրություններին» ասաց նա ու կանխատեսեց հետաքրքիր ընտրապայքար։ Ստացվում է, որ Սերժ Սարգսյանը կամ «քցում» է թիմակիցներին՝ ինքը սկզբունքային երեւալով, կամ էլ ինչ-ինչ պայմանավորվածություններ են խախտվել, համենայն դեպս, ոչ հօգուտ Սերժ Սարգսյանի։ Մյուս ուշագրավ հայտարարությունը Հովիկ Աբրահամյանի ՀՀԿ-ից հեռանալու վերաբերյալ է։ Սերժ Սարգսյանը թեպետ անվանական չի խոսում, բայց ակնարկից հասկանալի է, թե խոսքն ում է ուղղված․«Մյուս հարցը առավել քան ծիծաղելի է. ուղղակի զավեշտական են այն փորձերը, որ անում են մարդիկ՝ ցանկանալով ներկայացնել, թե Հանրապետականից արտահոսք կա: Ի՞նչ ասեմ, դուք էլ գիտեք, որ դա անհեթեթություն է. միայն վերջին մի քանի ամիսներին մեր կուսակցությանը անդամագրվել է 11000-ից ավելի մարդ: Ուզում եմ այս թեմային արձագանքել փոխաբերաբար: Գիտեք՝ մայր գետերը, առաջընթաց են ապահովում իրենց հոսքի ողջ երկայնքով, կյանք են տալիս, հաց են տալիս, ջուր են տալիս, և այն առվակները, որոնք պոկվում են մայր գետից և կարճ ժամանակում նորից չեն մտնում նույն հոսքի մեջ, չորանում ու գնում են: Սա՛ է բնության օրենքը, և որևէ մեկը մեզնից չի կարող հակադրվել բնության օրենքներին, մենք կարող ենք փորձել կառավարել, կարգավորել, բայց, ըստ էության, այսպես է լինելու», հայտարարել է նա։ Հովիկ Աբրահամյանի հեռանալուց հետո լուրեր են պտտվում, որ նրա հետեւից գնալու են բազմաթիվ կուսակցականներ, քանի որ վերջինս ՀՀԿ-ում առանցքային դերակատար էր ու այս տարիներին հասցրել էր մեծ թիմ հավաքել։ Սերժ Սարգսյանի համեմատությունը կարելի է սպառնալիք որակել ուղղված նախկին վարչապետի հասցեին, որ «կչորացնի» վերջինիս։ Սակայն մի հարցի վրա Սերժ Սարգսյանը ուշադրություն չի դարձրել, որ քիչ չեն գետերը, որոնք սկիզբ են առել փոքր վտակների միավորումից, եթե ցամաքեն փոքրիկ վտանկները, կցամաքի նաեւ գետը։ Անի Սահակյան
Հետևեք մեզ Viber-ում
