Զգուշացում Մոսկվայից Սերժ Սարգսյանին` «փուռը չտալ» Կարեն Կարապետյանին

Բուրժուադեմոկրատական հեղափոխության երբեմնի ջատագով, Կրեմլի հայ «սուրհանդակ», Մոսկվայի «Միաբանություն» կենտրոնի ղեկավար Սմբատ Կարախանյանը կրկին հայտնվեց: 1in.am-ին տված հարցազրույցում նա անդրադարձել է հայաստանյան ներքաղաքական իրավիճակին` Հովիկ Աբրահամյանի ՀՀԿ-ից դուրս գալու հայտարարությունից հետո: Այս հարցազրույցը ցույց է տալիս, իրականում, թե որքան են կախված ներհայաստանյան գործընթացները` ռուսաստանյան տրամադրություններից: Կարախանյանն ակնհայտորեն ցույց է տալիս իր համակրանքը գործող վարչապետի` Կարեն Կարապետյանի նկատմամբ, բացելով որոշ ուշագրավ փակագծեր... «Հանրապետական կուսակցությունն իրենից ներկայացնում է քրեաօլիգարխիկ համակարգի`քաղաքական ինչ-որ թև և այս իրավիճակում, երբ կա նոր վարչապետ, նոր վարչապետի թիմ, նոր կողմնակիցներ են ներմուծվում ՀՀԿ՝ այդ պահից վճռված էր, որ Հովիկ Աբրահամյանը պետք է դուրս գա Հանրապետական կուսակցությունից։ Շատ ուժային կենտրոններում՝ այն գերտերություններում, որոնք հետևում են Հայաստանի ներքաղաքական զարգացումներին, այստեղ ունեն իրենց հետաքրքրությունները՝ այդ մասին արդեն գիտեին, դա պարզ էր։ Եվ դա կապված չէր այն հանգամանքի հետ, որ Հովիկ Աբրահամյանը եկավ Մոսկվա, հանդիպեց Մեդվեդևի հետ՝ իրեն ասացին գնա դուրս արի և այլն։ Նման բան չկա։ Հովիկ Աբրահամյանը, ավանդույթի համաձայն, չէր ցանկանում դառնալ երիտասարդ թոշակառու և բնական է՝ քաղաքականությունից դուրս չի գա։ Իր բոլոր բացասական կողմերով հանդերձ՝ Հովիկ Աբրահամյանը իրենից ներկայացնում է ռեսուրս։ Ճիշտ է՝ համակարգի կարկառուն դեմքերից մեկն է, բայց պայմանականորեն դուրս մնալով համակարգից՝ ունի ռեսուրս, և հիմա իր տեղն է փնտրում։ Այսինքն՝ տեղ, որտեղ կարող է կիրառել իր ռեսուրսները, ուժերը։ Այսօրվա դրությամբ, որ նայենք, բնական է՝ Հովիկ Աբրահամյանը ինքն է դիմել Սերժ Սարգսյանին, որ ուզում է գալ Մոսկվա կոնսուլտացիաներ անցկացնել, հանդիպումներ ունենալ։ Այսինքն՝ իր այցը Մոսկվա Սերժ Սարգսյանի համաձայնությամբ է տեղի ունեցել, որ գա հանդիպումներ ունենա, խորհուրդներ ստանա», ասում է Կարախանյանը։ Այն, որ Հովիկ Աբրահամյանը ռեսուրս է և այնպիսի ռեսուրս, որ  ի ընդլայնմանը նույնիսկ Սերժ Սարգսյանը կարող էր դեմ լինել` իհարկե, իրականություն է: Բայց հազիվ թե Աբրահամյանն այս մթնոլորտում Մեդվեդևին հանդիպելը` համաձայնեցներ Սերժ Սարգսյանի հետ: Ավելին` այդ քայլով, թերևս, Աբրահամյանը կրկին ապացուցել է, որ ռեսուրս է և կարող է առանձին գործել: Ինչևէ, ըստ Կարախանյանի` Աբրահամյանը հիմա ուզում է իր տեղը գտնել. «Եթե կունենա առաջարկներ հետագայում՝ Մոսկվան կմտածի, թե ինչ կլինի։ Կարող է Ռուսաստան-Հայաստան համագործակցության տարբեր ծրագրերով լինի։ Եվ այս ֆոնին հետաքրքիր է դառնում Կարեն Կարապետյանի Մոսկվա կատարած այցը»։ Փաստորեն, ռուսաստանյան «սուրհանդակը» կրկին անգամ ապացուցել է, որ անգամ Հայաստանում պաշտոնազրկված գործիչներն` իրենց գործունեությունը պարտավոր են համաձայնեցնել Մոսկվայի հետ, այլապես... Գալով Կարեն Կարապետյանին` Կարախանյանն արդեն նշում է, որ նա իր թիմով մտած է այդ մոնոպոլ բուրգի մեջ, կամ ոչինչ չի կարող անել, ուղղակի պետք է ծառայի այդ բուրգին։ «Վաղն էլ կասեն, որ Կարեն Կարապետյանը չկարողացավ անել այն բարեփոխումները, որ պետք էր և դրանով կգա Կարեն Կարապետյանի մայրամուտը։ Այսինքն՝ Կարեն Կարապետյանի առաջ Սերժ Սարգսյանը խնդիր է դրել՝ գնա փող բեր, ներդրումներ։ Բնական է, որ հենց այնպես դա տեղի չի ունենալու։ Եվ բնական է, որ եթե Կարեն Կարապետյանը լիներ Հայաստանում ամենամեծ կուսակցության առաջնորդը՝ ներդրումային ծրագրերը շատ ավելի աշխույժ քննարկումներ կունենային Ռուսաստանի բիզնես գործընկերների շրջանակում։ Այսօրվա դրությամբ՝ Կարեն Կարապետյանի գլխին ուղղակի սարքում են՝ օգտագործելով փիարի, բիզնես ներդրում համակարգին նպաստելու համար։ Այսինքն՝ Կարեն Կարապետյանի համար այդ ներդրողները քայլեր կանեն և դա կգնա քրեաօլիգարխիկ համակարգի գրպանը, հետագայում տարբեր պատճառներով կհրաժարվեն ներդրումներ անել։ Դա խփելու է Կարեն Կարապետյանի իմիջին և բերելու են հասցնեն նրան, որ ոչ ասեն Կարապետյանին՝ չկարողացար արդյունավետ անել, ուրեմն քո մայրամուտը եկավ»։ Հարցին, թե իրատեսական չէ՞, որ Կարեն Կարապետյանը պաշտոնավարի նաև 2018-ից հետո, նա պատասխանել է. «Ի՞նչ են ուզում Սերժ Սարգսյանն ու քրեաօլիգարխիկ համակարգը Կարեն Կարապետյանից։ Նրանից ուզում են ահռելի քանակությամբ ներդրումներ, որ իրենք մնան թալանը շարունակեն, իսկ այդ ընթացքում այնքան շատ ներդրում լինի, որ փակի իրենց թալանելու ախորժակը, որը անընդհատ աճում է։ Եթե Կարեն Կարապետյանը բերի այնքան ներդրումներ, որ իրենց թալանը փակի և ամեն ինչ ֆանտաստիկ լինի, մի քիչ էլ ժողովրդի վիճակը լավանա, նոր կարող են մտածել, որ հետո կաշխատի Կարեն Կարապետյանը։ Բայց, հիմա, նա ուղղակի տեխնիկական կառավարության ղեկավար է և որոշ մանր բարեփոխումներ է անում։ Բայց ամեն դեպքում՝ այն քանակի ներդրումները, որ սպասվում է նրանից՝ ֆանտաստիկ է։ Ռուսաստանում ուղղակի ծիծաղում են այն խնդիրների վրա, որ դրված է Կարեն Կարապետյանի առաջ»։ Այսինքն, Կարախանյանը «բացահայտում» է Կարեն Կարապետյանի` վարչապետության գաղտնիքը, բայց նախօրոք արդեն նախանշելով, որ եթե հանկարծ Սերժ Սարգսյանը նրան էլ պաշտոնանկ անի` ուրեմն դա կնշանակի, որ Սերժ Սարգսյանը` նախ Մոսկվայի վստահելի կադրի դեմ է դուրս գալիս: Ասել կուզի, եթե Մոսկվան թեթև է նայել` Հովիկ Աբրահամյանի պաշտոնանկությունը, ապա նույնը չի հանդուրժվի` Կարեն Կարապետյանի դեպքում: Մետաքսյա Շալունց