Այս տարի զինծառայողների աշխատավարձերի բարձրացում նախատեսված չէ.նախարար

Այսօր տեղի ունեցած ամփոփիչ ասուլիսի ընթացքում ՀՀ պաշտպանության նախարար Վիգեն Սարգսյանը, անդրադառնալով զորակոչին, նշեց, որ ամեն ինչ պետք է արվի զորակոչն ավելի հարթ և համաչափ կազմակերպելու համար։ «Սրանով չենք բավարարվում: Մեր գնահատականով, միջանկյալ արդյունք է: Մինչև ամառային զորակոչը մեկ քայլ առաջ պետք է անենք զորակոչն ավելի հարթ, համաչափ կազմակերպելու համար»,- ասաց նախարարը: Հավաքակայանն առաջին կետն է, որտեղ քաղաքացին, ծնողը շփվում է զինված ուժերի, բանակի հետ,ասաց նախարարը: Վիգեն Սարգսյանը խոսեց ազգ-բանակ կոնցեպտից՝ նշելով, որ հասարակության մեջ ամեն ինչ անելու են, որ ձեւավորվի հարգանք զինվորական, սպայական ծառայության նկատմամբ, այդ մասնագիտությանը վերադարձվի իր գրավչությունը: «Այս տարի զինծառայողների աշխատավարձերի բարձրացում նախատեսված չէ:  Սսկսնակ սպան մրցունակ, միջին աշխատավարձից բարձր աշխատավարձ է ստանում: Այն գերազանցում է նաեւ կարմիր դիպլոմով ավարտած ամենահեղինակավոր ֆակուլտետներն ավարտած, ասենք՝ իրավաբանի կամ միջազգային հարաբերությունների շրջանավարտի առաջին աշխատավարձից: Սակայն այս պարագայում պետք է հաշվի առնենք սպայի աշխատանքային պայմաններն ու ծանրաբեռնվածությունը»,ասաց նա: Ինչ վերաբերում է «Հազար դրամների» աղմկահարույց օրենքին, ըստ որի պետք է հունվարից սկսվեն զոհված կամ վիրավորում ստացած զինծառայողների ընտանիքների փոխհատուցումները, նախարարն ասաց, որ հիմնադրամի խորհուրդը դեռ պետք է ձեւավորվի, օրենսդրական ակտերը ձեւավորվեն, հետո միայն սկսեն փոխհատուցումների տրամադրումը. « Հունվարից սկսած բոլոր դեպքերը փոհատուցվելու են: Հունվարի մեկից օրեր առաջ մենք դեպք ունեցանք Տավուշի մարզում: Մենք գտնելու ենք ձեւ՝ այդ ընտանիքի փոխհատուցման: Թեեւ նախատեսված չեն այդ վճարումները, մենք կսկսենք այդ փոխհատուցման տարբերակները գտնել լրացուցիչ հովանավորների հաշվին»,-հավելեց նախարարը: