ՀՀԿ-ն խոսել է շատ ուղիղ

Հրապարակ օրաթերթը գրում է.Սերժ Սարգսյանը երեկ ՀՀԿ խորհրդի նիստում ասել է՝ ՀՀԿ-ն գաղափարական կուսակցություն է․ «Մեզ համար իշխանությունը վայելք չէ, այլ պատասխանատվություն, եւ բոլոր նրանք, ովքեր գալիս են ՀՀԿ՝ ստանալու արտոնություններ, միգուցե ճիշտ կուսակցություն չեն ընտրել»։ ՀՀԿ խոսնակ Էդուարդ Շարմազանովից հետաքրքրվեցինք՝ այս խոսքերում ակնարկ կա՞ր՝ ուղղված Հովիկ Աբրահամյանին։ «Մենք միշտ խոսում ենք երեւույթներից, ոչ թե անձերից, առավել եւս՝ ՀՀ նախագահը։ Մենք խոսել ենք շատ ուղիղ եւ երեւույթներից»,- վստահեցրեց նա։ Մենք հիշեցրինք Գարեգին Նժդեհի խոսքը․ «Հայը պատճառ չունի կուսակցականանալու, հայը կուսակցականանալու նաեւ իրավունք չունի», հնարավո՞ր է, որ Հովիկ Աբրահամյանը, հետեւելով նժդեհական այս հորդորին, որոշել է դուրս գալ ՀՀԿ-ից։ «Խնդրում եմ՝ Հովիկ Աբրահամյանի գնահատականների եւ խոսքերի վերաբերյալ դիմեք Հովիկ Աբրահամյանին»,- ասաց նա եւ հիշեց․ «Նժդեհն ասել է՝ կուսակցությանս հետ, բայց ազգիս համար»։ Ապա անդրադարձավ Աբրահամյանի հեռանալուն։ «Ես ընթերցել եմ Հովիկ Աբրահամյանի ֆեյսբուքյան գրառումը, այնտեղ փնտրել եմ եւ չեմ գտել որեւէ քաղաքական դրդապատճառ։ Ես կարծում եմ, որ յուրաքանչյուր քաղաքական գործիչ քաղաքականության մեջ որոշում կայացնելիս պետք է առաջնորդվի քաղաքական հիմնավորումներով։ Կներեք, ես քաղաքական հիմնավորում չեմ տեսել»։ Այս հարցը չեն քննարկել նաեւ խորհրդի նիստում, միայն հարգել են նրա որոշումը եւ վերջ։ Ի դեպ, ՀՀԿ նիստին երեկ չի մասնակցել նաեւ ՀՀԿ-ական Մհեր Սեդրակյանը, պատճառը հայտնի չէ իրենց, ասաց Շարմազանովը։