Խորհրդավոր լռություն` փոթորիկից առա՞ջ

Մոսկվայում երեկ կայացել է Ռուսաստանի արտգործնախարար Սերգեյ Լավրովի և Ադրբեջանի արտգործնախարար Էլմար Մամեդյարովի հանդիպումը: Ըստ ՌԴ ԱԳՆ պաշտոնական կայքի՝ նախարարները մտքեր են փոխանակել ԼՂ հակամարտության կարգավորման մասին՝ ընդգրկելով Վիեննայի և Սանկտ-Պետերբուրգի պայմանավորվածությունները: Ադրբեջանական լրատվամիջոցներն իրենց հերթին տեղեկացնում են, որ հանդիպմանը Մամեդյարովը հերթական անգամ ընդգծել է Արցախյան հակամարտության կարգավորման շուրջ Ադրբեջանի դիրքորոշումը՝ նշելով, որ «ներկայիս ստատուս քվոն պետք է փոխվի»: Նկատենք, որ գրեթե նույն հաղորդագրությունն էր տարածել Ռուսաստանի արտգործնախարարությունը նաև Լավրով-Նալբանդյան հանդիպումից հետո։ Հիշեցնենք, որ ԼՂՀ անկախության առնչությամբ Ալիևը ևս հայտարարել էր, թե` «ԼՂ-ն երբեք անկախություն չի ստանա»: Սրան ի պատասխան պաշտոնական Երևանն արձագանքեց` ՀՀ ԱԳՆ փոխնախարար Շավարշ Քոչարյանի մակարդակով. «Այն փաստը, որ մեկ դար էլ չկա, ինչ Ադրբեջան պետությունը հայտնվել է աշխարհի քարտեզի վրա, չի կարող արդարացում հանդիսանալ Ադրբեջանի ղեկավարության կողմից միջազգային իրավունքի հիմնարար նորմերի չիմացության համար: Հարկ է ևս մեկ անգամ հիշեցնել, որ ՄԱԿ Կանոնադրությամբ ինքնորոշված սուբյեկտի կարգավիճակը որոշվում է նրա ժողովրդի կողմից, իսկ պետության տարածքային ամբողջականությունը չի կարող հակադրվել ժողովրդի ինքնորոշման իրավունքին: Ադրբեջանի ղեկավարությանը վաղուց հարկ էր ընթերցել ՄԱԿ Կանոնադրությունը, որպեսզի իր անգրագիտության թմբկահարմամբ ծաղրանքի առարկա չդառնա, և հաշտվել Լեռնային Ղարաբաղի Հանրապետության ճանաչման հեռանկարի անխուսափելիության հետ»: Բաքուն կոշտ քաղաքականություն է վարում նաև այլ միջազգային կառույցներում` ընդդեմ Ղարաբաղի: Իհարկե` ակնկալիքներն ինչպես միշտ Մոսկվայից են` հայկական կողմի նկատմամբ ճնշումներ գործադրելու առումով: Ամեն դեպքում Լավրով-Մամեդյարով հանդիպման արդյունքների մասին հնարավոր կլինի դատել`առաջիկայում Բաքվից «փչող» քամիներից: Մոսկվան ու Բաքուն, չի բացառվում, որ այս օրերին քննարկեն Ադրբեջանին զենքի խմբաքանակի վաճառքը: Նման գործարքների կնքման հավանականությունը մեծ է, այդ մասին արդեն եղան հստակ հայտարարություններ ադրբեջանական կողմից: Ի դեպ, նախօրեին, Ռազմինֆոն ուշագրավ տեղեկություն հայտնեց: Պարզվեց, հունվարի 19-ին ընդունած որոշումներից մեկով Հայաստանի կառավարությունը մոտ 2 մլրդ 94 մլն դրամ կհատկացնի Ռուսաստանից 200 մլն դոլարի վարկով զենքի գնման 5 պայմանագրերի համաֆինանսավորմանը։ Այս մասին հայտնի է դառնում հունվարի 23-ին հրապարակված որոշումից ու դրա նախագծի հիմնավորումից։ Նախագծի հիմնավորման մեջ ասվում է․«ՀՀ-ին պետական արտահանման վարկ տրամադրելու վերաբերյալ ՀՀ և ՌԴ կառավարությունների միջև կնքված համաձայնագրի շրջանակներում ՀՀ ՊՆ և ՌԴ «Ռոսօբորոնէքսպորտ» ԲԸ-ի միջև կնքված թվով 5 պայմանագրերի գծով 10 տոկոսի չափով ՀՀ կողմից 246․312․263,6 ՌԴ ռուբլուն համարժեք 2․093․655,0 հազար դրամով: Նշված պայմանագրերի համաձայն ՀՀ կողմից պայմանագրի արժեքի 10%-ի չափով ֆինանսավորումը չկատարելու դեպքում ՌԴ կողմից կարող են վերանայվել մատակարարման գները, որի արդյունքում կանխատեսվում է գնաճ»: Ռազմինֆոն եզրակացնում է, որ քիչ թե շատ վստահորեն կարելի է պնդել, որ ՀՀ ԶՈւ «Իսկանդերները» ձեռք են բերվել ռուսական 200 մլն. դոլար վարկից դուրս, քանի որ այդ միջոցներով ձեռք բերվելիք սպառազինության հրապարակված ցանկում «Իսկանդերի» մասին ոչինչ չկա։ Թամար Բագրատունի